އިޤްތިޞާދީ އާ ފެށުމެއް: އެކޮމޮޑޭޝަން ބްލޮކް 20 އަހަރަށް ބަލްމާ ސަންސެޓަށް!
ފާޠިމަތު ޢަރޫޝާ
ށ. ފީވަކުގައި ލޯކަލް ޓޫރިޒަމް ފުޅާކޮށް، ރަށުގެ އިޤްތިޞާދު އާ ހިސާބަކަށް ހިއްލާލުމަށްޓަކައި އެ ރަށު ކައުންސިލުން އަލަށް ތަރައްޤީކުރި އެކޮމޮޑޭޝަން ބްލޮކް ކުއްޔަށް ދޫކުރުމުގެ އެއްބަސްވުމުގައި މިއަދު (01 އޮކްޓޯބަރު 2026) ރަސްމީކޮށް ސޮއިކޮށްފިއެވެ.
ފީވަކު ކައުންސިލުން މި ބޮޑު މަޝްރޫއު ހަވާލުކޮށްފައިވަނީ ބަލްމާ ސަންސެޓް ރެސްޓޯރެންޓާއެވެ. މި އެއްބަސްވުމުގެ ދަށުން ކުރިއަށް އޮތް 20 އަހަރުދުވަހުގެ ދިގު މުއްދަތަކަށް އެ ކުންފުންޏަށް މި ބްލޮކް ބަލަހައްޓައި ހިންގުމުގެ ޒިންމާ ލިބިގެންދާނެއެވެ.
ކައުންސިލް އިދާރާގައި ބޭއްވުނު ޚާއްޞަ ރަސްމިއްޔާތެއްގައި، މި އެއްބަސްވުމުގައި ބަލްމާ ސަންސެޓް ރެސްޓޯރެންޓްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަލްފާޟިލް އަޙްމަދު މުޖުތަބާއެވެ. އަދި ފީވަކު ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް ޢަލީ ރަޝީދު ޙަސަންއެވެ.
ލޯކަލް ގަވަރމަންޓް އޮތޯރިޓީ އާއި ށ. އަތޮޅު ކައުންސިލްގެ ލަފަޔާއި އިރުޝާދުގެ ދަށުން ކުރިއަށްގެންދާ މިފަދަ މަޝްރޫޢުތަކަކީ ރަށު ކައުންސިލްތަކުގެ މާލީ ތަނަވަސްކަން އިތުރުކުރުމަށާއި، ރަށުން ވަޒީފާގެ އާ ފުރުޞަތުތައް އުފައްދައި، ޒުވާނުންނަށް އާމްދަނީ ހޯދޭނެ މަގުތައް ތަނަވަސްކޮށްދިނުމަށް އެޅޭ މުހިންމު ފިޔަވަޅެކެވެ.
ފީވަކުގައި އަލަށް ހުޅުވުނު މި އެކޮމޮޑޭޝަން ބްލޮކާއެކު، އެ ރަށަށް ޒިޔާރަތްކުރާ ފަތުރުވެރިންނަށާއި ދަތުރުވެރިންނަށް ފެންވަރު ރަނގަޅު ޚިދުމަތްތަކެއް ލިބިގެންދާނެއެވެ.
ގުޅުންހުރި
ޚިޔާލުތައް (0)