ކަނޑަށް ފަރިތަ ޖީލެއް ބިނާކުރުމަށް މާއުނގޫދޫ މުއައްސަސާތަކުން އަތުގުޅާލައިފި!

އިޝްތިހާރު

މާއުނގޫދޫ ސްކޫލްގެ ޕޭރެންޓް ޓީޗަރ އެސޯސިއޭޝަން (ޕީ.ޓީ.އޭ) ގެ އިސްނެގުމުގެ މަތިން، އެ ރަށު ކައުންސިލް އިދާރާއާއި ރަށުގެ ހުރިހާ މުއައްސަސާތަކެއް ގުޅިގެން ސްކޫލްގެ ދަރިވަރުންނަށް އަމާޒުކޮށްގެން ބާއްވާ ޚާއްޞަ “ސްވިމް ކޭމްޕް” ގެ ޙަރަކާތްތައް ރަސްމީކޮށް ފަށައިގެން ކުރިއަށް އެބަދެއެވެ.

ޖުމްލަ 15 ދުވަހުގެ މުއްދަތަކަށް ކުރިއަށްގެންދިއުމަށް ހަމަޖެހިފައިވާ މި ކޭމްޕް ރަސްމީކޮށް ފަށާފައިވަނީ 20 ސެޕްޓެމްބަރު 2026 ވީ އާދީއްތަ ދުވަހުއެވެ. މާއުނގޫދޫ ސްކޫލްގެ ގްރޭޑް 1 އިން ފެށިގެން ގްރޭޑް 9 އާ ދެމެދުގެ ކުލާސްތަކަށް ހުޅުވާލައިގެން ކުރިއަށްގެންދާ މި ޕްރޮގްރާމްގައި އެ ސްކޫލްގެ 160 އަށްވުރެ ގިނަ ދަރިވަރުން ވަނީ ބައިވެރިވެފައެވެ.

އިޝްތިހާރު

މި ކޭމްޕަކީ ދަރިވަރުންނަށް ފެތުމުގެ އަސާސީ ހުނަރުތަކާއި، މޫދުގައި އުޅޭއިރު ރައްކާތެރިވުމުގެ ގޮތުންނާއި ފުރާނަ ސަލާމަތްކުރުމަށް ބޭނުންވާނެ މުހިންމު އުކުޅުތައް ދަސްކޮށްދިނުމުގެ މަޤްޞަދުގައި ހިންގޭ ޙަރަކާތެކެވެ. ގިނަ އަދަދެއްގެ ދަރިވަރުން ބައިވެރިވާ މި ކޭމްޕްގެ ތަމްރީނުތައް ކުރިއަށްދަނީ ދަރިވަރުންގެ އުމުރުފުރާތަކަށް ބަހާލައިގެން، މޫދުގެ އަމަލީ ޙަރަކާތްތަކާ އެކުގައެވެ.

މާއުނގޫދޫ ކައުންސިލުން ހާމަކުރެއްވި ގޮތުގައި، ކުދިންނަކީ މޫދަށް ފަރިތަ، ފަތަން ދަންނަ ކުދިބަޔަކަށް ހެދުމަށް ޕީ.ޓީ.އޭ އިން ކުރިއަށްގެންދާ މިފަދަ ބޭނުންތެރި ޙަރަކާތްތަކަށް ކައުންސިލްގެ ފުރިހަމަ އެއްބާރުލުމާއި އެހީތެރިކަން އަބަދުވެސް ލިބޭނެއެވެ. އަދި ރަށުގެ ހުރިހާ މުއައްސަސާތަކެއް ގުޅިގެން ދަރިވަރުންގެ ކުރިއެރުމަށް މިފަދަ ޕްރޮގްރާމްތައް އެކުވެރިކަމާއެކު ހިންގުމަކީ ކާމިޔާބު މުޖުތަމަޢެއް ބިނާކުރުމަށް އެޅޭ މުހިންމު ފިޔަވަޅެއްކަން ކައުންސިލުން ފާހަގަކުރެއެވެ.

މި ސްވިމް ކޭމްޕްގެ ތެރެއިން ދަރިވަރުންނަށް ފެތުމުގެ ހުނަރުތައް ދަސްކޮށްދިނުމުގައި ޚާއްޞަ ތަމްރީނުލިބިފައިވާ އިންސްޓްރަކްޓަރުން ޙަރަކާތްތެރިވަމުންދާއިރު، ދަރިވަރުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި މާއުނގޫދޫ ސްކޫލްގެ އިސްވެރިންނާއި، ޕީ.ޓީ.އޭ ގެ މެންބަރުންގެ އިތުރުން ރަށުގެ މުއައްސަސާތަކުގެ މުވައްޒަފުންނާއި ގިނަ އަދަދެއްގެ ބެލެނިވެރިންވެސް ދަނީ ޢަމަލީގޮތުން އެހީތެރިކަން ފޯރުކޮށްދެމުންނެވެ.

މި ޕްރޮގްރާމް ނިމޭއިރު، ބައިވެރިވި ހުރިހާ ދަރިވަރުންނަށްވެސް ފެތުމުގެ އަސާސީ ހުނަރުތައް ޙާސިލްވެގެންދާނެ ކަމަށް ސްކޫލާއި، ޕީ.ޓީ.އޭ އަދި ކޭމްޕް އިންތިޒާމްކުރާ ހުރިހާ ފަރާތްތަކުން އުންމީދުކުރެއެވެ.

އިޝްތިހާރު