މުސްތަޤުބަލު ބިނާކުރުމުގެ މުހިންމު މަރުޙަލާ: މިއަހަރުގެ އޭލެވެލް އިމްތިޙާނު ފެށިގެން ކުރިއަށް!

އިޝްތިހާރު

މިއަހަރުގެ މަތީ ސާނަވީ (އޭލެވެލް) އަދި އެޗްއެސްސީ އިމްތިޙާނު މިއަދު ރާއްޖޭގެ 53 ސެންޓަރެއްގައި ރަސްމީކޮށް ފަށައިފިއެވެ.

މިނިސްޓްރީ އޮފް އެޑިއުކޭޝަނުން ހާމަކުރެއްވި ގޮތުގައި، މިއަދުން ފެށިގެން އަންނަ އޮކްޓޫބަރު މަހުގެ 30 ވަނަ ދުވަހުގެ ނިޔަލަށް ކުރިއަށްދާ މި އިމްތިޙާނުތައް ބޭއްވުމަށް ހަމަޖެހިފައިވަނީ މާލޭ ސަރަޙައްދުގެ 4 ސެންޓަރަކާއި، އަތޮޅުތެރޭގެ 49 ސެންޓަރެއްގައެވެ.

އިޝްތިހާރު

މި އިމްތިޙާނުގައި ބައިވެރިވާ ދަރިވަރުންގެ ތަފްޞީލް ޙިއްސާކުރައްވަމުން އެޑިއުކޭޝަން މިނިސްޓްރީން ވިދާޅުވީ، މާލޭ ސަރަޙައްދުން އެކަނިވެސް އޭލެވެލް އިމްތިޙާނުގައި 3,284 ދަރިވަރުން އަދި އެޑެކްސެލް އެޗްއެސްސީ އިމްތިޙާނުގައި 1,357 ދަރިވަރުން ބައިވެރިވާ ކަމަށެވެ. އަދި އަތޮޅުތެރޭގެ ސެންޓަރުތަކުން އޭލެވެލް އިމްތިޙާނުގައި 1,689 ދަރިވަރުން ބައިވެރިވާއިރު، އެޗްއެސްސީ އިމްތިޙާނުގައި ބައިވެރިވަނީ 906 ދަރިވަރުންނެވެ.

އިމްތިޙާނު ފެށުމާ ގުޅިގެން ރައީސުލްޖުމްހޫރިއްޔާ އެކްސް (X) ގައި ކުރެއްވި ޕޯސްޓެއްގައި، މިއަހަރުގެ މަތީ ޘާނަވީ އިމްތިޙާނުގައި ބައިވެރިވާ ދިވެހި ހުރިހާ ދަރިވަރުންނަށާއި، އެ ކުދިންގެ އާޢިލާތަކުގެ އިތުރުން މަދަރުސާތަކަށް ވަނީ ފުރިހަމަ ކާމިޔާބީއަކަށް އެދިވަޑައިގެންފައެވެ.

🔗 ތަފްޞީލް ކިޔުމަށް: [ލިންކް]

ރައީސްގެ މެސެޖުގައި ވިދާޅުވީ، މަތީ ޘާނަވީ އިމްތިޙާނަކީ ދަރިވަރުންގެ މުސްތަޤުބަލު ބިނާކުރުމުގައާއި، ވަކިން ޚާއްޞަކޮށް މަތީ ތަޢުލީމު ޙާސިލުކުރާނެ ދާއިރާއެއް އިޚްތިޔާރުކޮށްގެން ކުރިއަށްދިއުމުގައި އެޅޭ ވަރަށް މުހިންމު މަރުޙަލާއެއް ކަމަށެވެ.

އަދި މި އިމްތިޙާނަށް ތައްޔާރުވުމަށްޓަކައި ދަރިވަރުން ކުރި ބުރަ މަސައްކަތުގެ ފޮނިމޭވާ ލިބޭނެ ކަމަށް އުންމީދު ކުރައްވާ ކަމަށްވެސް ރައީސް ވިދާޅުވިއެވެ. މީގެއިތުރުން، މާތްﷲ ގެ ހެޔޮ ރަޙްމަތްފުޅާއެކު އިމްތިޙާނުގައި ފަސޭހަކަމާއެކު މޮޅަށް ޖަވާބުދީ، މުޅި ޤައުމު ފަޚުރުވެރިވާނެ ފަދަ ރަނގަޅު ނަތީޖާތަކެއް ދަރިވަރުން ހޯދާނެ ކަމަށް ޔަޤީންކުރައްވާ ކަމަށްވެސް ރައީސްގެ ޕޯސްޓުގައި ވިދާޅުވެފައިވެއެވެ.

އިޝްތިހާރު