ދަރަނބޫދޫގައި އުފެދޭ ކުނި މެނޭޖްކުރުމާއި ގުޅޭ ސައިޓްގެ މަސައްކަތް ކުރުމަށް ވެމްކޯގެ ޓީމެއް ޙަރަކާތްތެރިވާން ފަށައިފިއެވެ.
ކުނީގެ މައްސަލަ އިންތިހާއަށް ބޮޑުވެފައިވާ ދަރަނބޫދޫގެ ކުނީގެ ހާލަތު ރަނގަޅުކުރުމަށް ސަރުކާރުން ވަނީ މިއަހަރު ވެމްކޯއާއި މަސައްކަތް ހަވާލު ކޮށްފައެވެ. އެކަމާއި ގުޅިގެން ވެމްކޯގެ ފަރާތުން ޓީމެއް މިއަހަރުގެ މެއި މަހުގެ 5 ވަނަ ދުވަހު ދަރަނބޫދޫއަށް ވަޑައިގެން ވޭސްޓް މެނޭޖްމަންޓް ސެންޓަރު ޤާއިމްކުރާ ސައިޓް ބަލައި، ކައުންސިލާއެކު މަޝްވަރާ ބައްދަލުވުމެއް ބާއްވާފައިވެއެވެ.
ވެމްކޯއިން މިއަދުވަނީ ވެހިކަލްތަކާއެކު ދަރަނބޫދޫއަށް އަރައި ވޭސްޓް މެނޭޖްމަންޓް ސެންޓަރު ސާފުކުރުމުގެ ޢަމަލީ މަސައްކަތް ފައްޓަވާފައެވެ. މަޢުލޫމާތު ލިބިފައިވާ ގޮތުގައި މިމަހުގެ 21 ވަނަ ދުވަހު، ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު ރަށަށް ވަޑައިގެން މި ސެންޓަރުގައި ބިންގާ އަޅުއްވާ ދެއްވާނެއެވެ.
ދަރަނބޫދޫގައި ވޭސްޓް މެނޭޖްމަންޓް ސެންޓަރު ޤާއިމްކުރުމަށް ނިންމާފައިވަނީ މިހާރުވެސް ކުނި ޖަމާކުރާ ސަރަޙައްދުގައެވެ. މި ސެންޓަރު ޤާއިމްކުރުމުގެ މަސައްކަތް ކުރުމަށް ވެމްކޯގެ ޓީމު ރަށުގައި ހަރަކާތްތެރިވާން ފެށުމާއެކު ކައުންސިލުން މިއަދުވަނީ މި ސަރަޙައްދުގައިހުރި އަމިއްލަ ފަރާތްތަކުގެ ރުއްތަކުގެ މަޢުލޫމާތު ސާފުކުރުމުގެ މަސައްކަތް ފަށާފައެވެ.
އަމިއްލަ ފަރާތްތަކުގެ ރުއްތަކުގެ ބަދަލު ދިނުމުގެ ކަންކަން ކުރިއަށްދާއިރު، ކައުންސިލުން ބުނެފައިވާ ގޮތުގައި އެކަމަށް އެދި ދޫކުރާ ފޯމު މިމަހުގެ 23 ވަނަ ދުވަހުގެ ނިޔަލަށް ކައުންސިލަށް ހުށަހަޅަންޖެހޭނެއެވެ. އަދި މި މުއްދަތާއިހަމައަށް ހުށަހާޅާފައިނުވާ ރުއްތައް ބަދަލު ދިނުމެއްނެތި ނައްތާލާނެކަމަށް ކައުންސިލްގެ އިއުލާނުގައި ފާހަގަކޮށްފައިވެއެވެ.
