އާބާދީގައި ގާތްގަނޑަކަށް 2380 އަށްވުރެ ގިނަ ރައްޔިތުން ދިރިއުޅޭ ފ. އަތޮޅުގެ ވެރިކަންކުރާ ނިލަންދޫގެ ނަރުދަމާގެ މައްސަލައިގެ ކަންބޮޑުވުންތަކުގެ ވާހަކަ ދެއްކުން ގިނަވެއްޖެއެވެ. ނިލަންދޫ ރައްޔިތުންގެ ޒަމާންވީ އެއް ކަންބޮޑުވުމެއްގެ ގޮތުގައި އޮންނަ މި މައްސަލައަކީ މިހާރު ނިލަންދޫ ރައްޔިތުންނެކޭ އެއްފަދައިން އަތޮޅުގެ އެހެން ރަށްރަށުގެ ރައްޔިތުންވެސް ކޮންމެ ދުވަހަކު ދައްކާ ވާހަކައަކަށް މިވަނީ ވެފައެވެ.

އަތޮޅު ތެރޭގައި މިވާހަކަ ދެއްކުން ގިނަވެފައިވާ މައިގަނޑު ސަބަބަކީ ނިލަންދޫއަކީ އަތޮޅުގެ ވެރިކަންކުރާ ރަށަށްވެފައި، އަތޮޅުގެ ރައްޔިތުން ކޮންމެ ދުވަހަކުވެސް އެރަށަށް ޚިދުމަތްތަކެއް ހޯދަން ދަތުރުކޮށްފައި ދާންޖެހޭތީކަމުގައި ބެލެވެއެވެ. ރަނގަޅު ފެންވަރުގެ މަގުތައް ހެދިފައިނުވުމާއި، ޚިދުމަތްތައް ހޯދުމަށް ތަންތަނަށް ރައްޔިތުން ދާއިރު، މަގުތަކަށް ނަޖިސްތައް ބޭރުވެ، ރަށުތެރެއިން ނަޖިހުގެ ވަސް ދުވާތީ އެކަމާ ކަންބޮޑުވަނީއެވެ.

އަތޮޅު ތެރެއިން ނިލަންދޫއަށް އެކިއެކި ބޭނުންތަކަށް ދުރުވާ ފަރާތްތަކުން މިވާހަކަތައް ދައްކާއިރު، އަދި ނިލަންދޫގައި ދިރިއުޅޭ ރައްޔިތުންނަށް މިކަމުން ލިބޭ ގެއްލުންތަކާއި، ކޮންމެ ދުވަހަކުހެން އެރައްޔިތުންނަށް ކުރިމަތިވާ އުނދަގޫތަކަކީ ބުނެދޭން ފަސޭހަ ކަންކަމަކަށް ނުވާނެކަން ޔަގީނެވެ. ނަރުދަމާގެ މައްސަލައަށް ވަގުތީ އަދި ދާއިމީ ހައްލެއް ހޯއްދަވައި ދެއްވުން އެދި އެރަށު ރައްޔިތުންނާއި ކައުންސިލްތަކުން އާދޭސް ނުދަންނަވާ ރައީސަކު، މެމްބަރަކު އަދި ކަމާއިބެހޭ އިދާރާއެއް ނެތެވެ. އަބަދާއި އަބަދު މިވާހަކަތައް ދައްކައިގެން އެރަށު ރައްޔިތުންނަށް ލިބުނު ހިތްހަމަޖެހުމެއް ނެތްކަން މީސްމީޑިއާ ބަލާލުމުން ފުދެއެވެ.

ނިލަންދޫގައި ނަރުދަމާގެ ނިޒާމް ޤާއިމްކުރުމުގެ މަސައްކަތް އެމްޑަބްލިއުއެސްސީ އާ މިސަރުކާރުން ޙަވާލުކޮށްފައިވަނީ މިދިޔަ އަހަރުގެ ނޮވެމްބަރު 16 ވަނަ ދުވަހުގައެވެ. ނަރުދަމާގެ ކަންބޮޑުވުންތައް ހުއްޓުމެއްނެތި ނިލަންދޫ ރައްޔިތުން މީސްމީޑިއާގައި ދައުރުކުރަމުންދާއިރު، އެ ކުންފުނީގެ އެމްޑީ ވަނީ އަންނަ މެއި މަހު މަސައްކަތް ފެށޭނެކަމަށް ދަންނަވާފައެވެ. އެހެންނަމަވެސް ނިލަންދޫ ރައްޔިތުން ފާޅުކުރަމުންދާ ޚިޔާލުތަކަށް ބަލާއިރު، ކަމާއިބެހޭ ފަރާތްތަކުން މި މައްސަލައަށް ސީރިއަސްކަމެއް ދޭތަނެއް ނުފެނެއެވެ.

ނަރުދަމާގެ ސާވޭކޮށް ޑިޒައިންގެ މަސައްކަތް ކުރުމަކީ އެމަސައްކަތް ފެށުންކަމަށް ވާނަމަ 2017 ވަނަ އަހަރު ނިލަންދޫގެ އެއަރޕޯޓް މަސައްކަތްވެސް ވަނީ ފެށިފައިތާއެވެ. އަދި ނިލަންދޫގެ މަގުހެދުމުގެ މަސައްކަތްވެސް ވަނީ ފަށައިފައިތާއެވެ. އެކަހަލަ ކިތަންމެ ސާވޭއެއް ކޮށްފައިވެއެވެ. ނިލަންދޫ ކައުންސިލްގެ ކުރީގެ ރައީސް މުޙައްމަދު ޖަލީލު.

މިއީ ނިލަންދޫ ރައްޔިތުންގެ ކޮންމެ ދުވަހެއްގެވެސް ޝަކުވާއެވެ. 18 އަހަރަށްވުރެ ގިނަ ދުވަސްވެފައިވާ އެރަށުގެ ނަރުދަމާ ނިޒާމުގެ މައްސަލަތަކަކީ އެރަށު ރައްޔިތުންނާއި އެރަށަށް އެކިއެކި ބޭނުންތަކަށް ޒިޔާރަތްކުރާ ދިވެހިންނާއި ބޭރުމީހުންނަށް މިހާރު އެއީ އާންމު އުދަގުލެކެވެ.