ރާއްޖޭގައި އެންމެ ފަހުން އުފެއްދި ސިޔާސީ ޕާޓީ “ދަ ޑިމޮކްރެޓްސް” ގެ ހަރުގެއެއް ދަރަނބޫދޫގައި މިއަދު ހުޅުވައިފިއެވެ.
ރަސްމީކޮށް މި ހަރުގެ ހުޅުއްވައި ދެއްވީ ދަ ޑިމޮކްރެޓްސް އުފެއްދުމުގައި އިސްކޮށް ޙަރަކާތްތެރިވި، ހެންވޭރު ހުޅަނގު ދާއިރާގެ މަޖިލިސް މެމްބަރު ޙަސަން ލަތީފެވެ.
މި ހަރުގެ ހުޅުވުމަށްފަހު އެތަނުގައި މިއަދުވަނީ ޖަލްސާއެއް ކުރިއަށް ގެންގޮސްފައެވެ. މި ޖަލްސާގައި ދަ ޑިމޮކްރެޓްސް އަށް އަލަށް ގުޅުނު މެމްބަރުންނާއި ދަރަނބޫދޫ ޕީޕީއެމް ޖަޒީރާ ގޮފީގެ މެމްބަރުންވަނީ ބައިވެރިވެފައެވެ. ޑިމޮކްރެޓްސް އަށް އަލަށް ގުޅުނު ފަރާތްތަކުގެ ތެރޭގައި އެމްޑީޕީ އުފެދުނީއްސުރެ އެޕާޓީގައި މަސައްކަތްކުރައްވަމުން ގެންދެވި މެމްބަރުންނާއި، އެމްޑީޕީ އަނެއް ދަރަނބޫދޫ ގޮފީގެ މެމްބަރު ހިމެނެއެވެ. ޑިމޮކްރެޓުންގެ ހަރުގެއަކީ މީގެ ކުރިން އެމްޑީޕީގެ ހަރުގެ ގޮތުގައި ބޭނުންކުރި ތަނެވެ.
ދަރަނބޫދޫގެ ސިޔާސީ މާޙައުލަށް ބަލާއިރު އެންމެ ފަހުން ބޭއްވުނު ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބާއި ދިމާކޮށް ދަރަނބޫދޫގެ އެމްޑީޕީ އަދި ޕީޕީއެމް މެމްބަރުން މަސައްކަތް ކުރަމުން އަންނަނީ ކޯލިޝަނެއް ހަދައިގެން އެކުގައެވެ. ނަމަވެސް އޭރު އެމްޑީޕީގައި ތިއްބެވި ބޭފުޅުން އެޕާޓީ ދޫކުރައްވާ ޑިމޮކްރެޓްސްއާއި ގުޅިފައިވާތީ ދެން ޕީޕީއެމުން މަސައްކަތްކުރައްވާނީ ޑިމޮކްރެޓްސް އާއެކު ކޯލިޝަނުގެ ތެރޭގައިކަމަށް މަޢުލޫމާތު ލިބެއެވެ.
ހަރުގެ ހުޅުވުމަށްފަހު ހެންވޭރު ހުޅަނގު ދާއިރާގެ މެމްބަރު ހަސަން ލަތީފުވަނީ ބައިވެރިންނާއި މުޚާތަބު ކުރައްވާ ވާހަކަފުޅު ދައްކަވާފައެވެ. ޕީޕީއެމްގެ އާންމުންނާއެކު ބޭއްވުނު މި ބައްދަލުވުމުގައި ރައީސް އިބްރާހީމް މުޙައްމަދު ސޯލިހަށް ފާޑުވިދާޅުވެ އެތައް ފައިސާއެއްގެ ޚިޔާނާތްވެފައިވާ އެތައްބަޔަކު ތިބިއިރު ހަމައެކަނި ރައީސް ޔާމިން ޖަލުގައި ބަންދުކޮށްގެން ގެންގުޅުމަކީ އިންސާފެއް ނޫންކަމަށް ވިދާޅުވިއެވެ. ހަސަންގެ ވާހަކަފުޅުގައި އިތުރަށް ވިދާޅުވީ ކުރިއަށް އޮތް ރިޔާސީ އިންތިޚާބުގައި ރައީސް ސޯލިހު ބަލިކުރުމަށް ޑިމޮކްރެޓުން ތިބީ ތައްޔާރަށް ކަމަށާއި އެކަން ކުރުމަށް ގުޅެންޖެހުނު ކޮންމެ ބަޔަކާއި ގުޅެންވެސް ތައްޔާރަށް ތިބިކަމަށެވެ.
ހަސަން ލަތީފް އެހެން ވިދާޅުވިނަމަވެސް، އެބޭފުޅާވަނީ މީގެ ކުރިން އެތައްފަހަރަކު ރައީސް ޔާމިނަށް ވަރަށް ގިނަ ކަންކަމުގައި ފާޅުކަން ބޮޑުގޮތެއްގައި ދެކޮޅު ހަދާކަން ހާމަކުރައްވާފައެވެ. އެގޮތުން ޕީޕީއެމުން އިސްވެ ގިނަ ދުވަސްތަކެއް ވަންދެން ކުރިއަށް ގެންދިޔަ “އިންޑިއާ އައުޓް” ހަރަކާތާއި ގުޅިގެން ދިވެހި ރާއްޖޭގެ ޤައުމީ ސަލާމަތަށް ނުރައްކާވާކަމަށްބުނެ ރައީސް ޔާމިން ހައްޔަރުކުރުމަށް އޭނާވަނީ ތަކުރާރުކޮށް ގޮވާލައްވާފައެވެ. އަދި އޭގެ ކުރިން ރައީސް ޔާމިނަކީ ލާމަރުކަޒީ ނިޒާމް ޤަބޫލު ނުކުރައްވާ ބޭފުޅެއްކަމަށާއި ރަށުކައުންސިލްތަކަށާއި އަންހެނުންގެ ކޮމެޓީތަކުގައި “ޕީޕީއެމް ކެންޑިޑޭޓުންނަށް ވޯޓު ދިނުމުގެ ބޭނުމެއް ނެތްކަމަށް” އެބޭފުޅާ ވިދާޅުވެފައިވެއެވެ.
ދަ ޑިމޮކްރެޓްސްގެ ހަރުގެ ހުޅުވުމާއި އެޕާޓީއަށް މެމްބަރުން އިތުރުކުރުމުގެ ހަރަކާތެއް ކުރިއަށް ގެންދިއުމަށް ހަސަން ލަތީފުގެ އަރިހުގައި ޑިމޮކްރެޓްސްގެ އިސް އެކްޓިވިސްޓުން ވަޑައިގެންނެވިއެވެ. ދަރަނބޫދޫގައި ކުރިއަށްދިޔަ ހަރަކާތަށްފަހު އެބޭފުޅުން މިހާރުވަނީ ފ.އަތޮޅުގެ އެހެން ރަށްތަކަށް ފުރާވަޑައިގެންފައެވެ.
One Response
Dha dimocoratic eh noon thee, MDP Bai Bai koh uffehdhi dhandi dimocoratics . Dhandi v ma bindhaigen dhaaleh varah faseyha vaane. Anekkaa thithaanga ginaee huss fee dhandi.