ދަރަނބޫދޫގެ ބިނާވެށި ޕްލޭން ފާސްކުރުމަށް ބޭއްވުނު ޖަލްސާގައި ފުޓްސަލް ދަނޑު އެޅުމަށް ރައްޔިތުން ފާސްކުރި ބިމުގައިވެސް ފުޓްސަލް ދަނޑު އެޅެން ނެތްކަމަށް ދަރަނބޫދޫ ކައުންސިލުން މަޢުލޫމާތު ދެއްވައިފިއެވެ.
ނިމިދިޔަ ޑިސެމްބަރު މަހުގެ 13 ވަނަ ދުވަހުގެ ރޭ ވޯލްޑްކަޕް ހަރުގޭގައި ދަރަނބޫދޫ ކައުންސިލުން އާންމުކޮށް ހުޅުވާލައިގެން ބޭއްވި ޖަލްސާގައި ވާހަކަފުޅު ދައްކަވަމުން ދަރަނބޫދޫ ކައުންސިލްގެ ރައީސް ވިދާޅުވީ، އާ ފުޓްސަލް ދަނޑެއް ހަދަން ޔޫތު މިނިސްޓްރީން ހުއްދަ ދެއްވާފައިވާތީ، ރަށުގެ ޒުވާނުންގެ ފަރާތުން ހޮޅުއަށި ސަރަހައްދުގައި ފުޓްސަލް ދަނޑު ހެދުމަށް ޕެޓިޝަނެއްގައި ސޮއިކޮށް ކައުންސިލަށް ހުށަހަޅާފައިވާކަމަށެވެ.
އެހެން ނަމަވެސް، އެބިމުގެ ދިރާސާ ހެދިއިރު ފުޓްސަލް ދަނޑެއް ހެދުމަށް ބޭނުންވާ ޖާގަ އެތަނުގައި ނެތްކަމަށް ކައުންސިލްގެ ރައީސް ފާހަގަކުރެއްވިއެވެ. އެއާއެކު ފުޓްސަލް ދަނޑު ހެދުމަށް ދެބިމެއް ފާހަގަކޮށް ރައްޔިތުންގެ ޚިޔާލު ހޯދުމަށްފަހު ނެގުނު ވޯޓުން ފާސްވީ މިހާރުވެސް ފުޓްސަލް ދަނޑު އޮތް ތަނުގެ އިރުދެކުނުން އައު ފުޓްސަލް ދަނޑު އެޅުމަށެވެ. މިޖަލްސާގައި މަޝްވަރާކޮށްފައިވާ އަނެއް ބިމަކީ ފެނަކައިގެ އުތުރުން އޮންނަ ހުސްބިމެވެ.
ދަނިއުސްއާއި ވާހަކަ ދައްކަވަމުން ދަރަނބޫދޫ ކައުންސިލްގައި ހިމެނިވަޑައިގަންނަވާ 5 މެމްބަރުންގެ ތެރެއިން 3 މެމްބަރުން ވިދާޅުވީ ފުޓްސަލް ދަނޑު އެޅުމަށް ރައްޔިތުންގެ ފެންނަ ނުފެންނަ ވޯޓަކަށް އެހުމަށް ކައުންސިލުން ކުރިންވެސް ފާސްކުރީ ފެނަކަ އިމާރާތް ކައިރީގައިވާ ބިން ކަމަށާއި، ރައްޔިތުންގެ ޖަލްސާއެއްގައި ކުއްލިއަކަށް އިތުރު ބިމެއްގެ ނަން އައިސްފައިވާތީ ކަންބޮޑުވާކަމަށެވެ.
މިކަމާއި ގުޅިގެން ދަރަނބޫދޫ ކައުންސިލް މެމްބަރު އަރްޔަޝް މުޙައްމަދާއި އާދަމް ޙަލީމް ވިދާޅުވީ ކައުންސިލުން އަބަދުވެސް މަސައްކަތް ކުރަމުން އައިސްފައިވަނީ ރަސްމީ ފުޓްބޯޅަ ދަނޑު ތަރައްޤީވަމުން އަންނައިރު ދަނޑުގެ ވަށައިގެން ދުވާ ޓްރެކެއް ޤާއިމްކުރުމަށް ކަމަށާއި، އެކަން ކުރުމަށް ފުޓްބޯޅަ ދަނޑުގެ ދެކުނުން އޮތް އާންމުންގެ ދަނޑުވެރިކަމުގެ ބިންތަކުން ބައެއް ނަގައިގެން ފުޓްބޯޅަ ދަނޑު ބޮޑުކޮށް ދުވާ ޓްރެކް ހެދުމަށް މާކުރިންވެސް ނިންމާފައިވާކަމުގައެވެ. އެހެން ކަމުން އެތަނުގައި ފުޓްސަލް ދަނޑު ހަދާނަމަ، ދުވާ ޓްރެކް ހެދުމަށް ބޭނުންވާ މިންތައް ނުލިބޭނެކަން މާކުރިންވެސް ކައުންސިލަށް އެނގިފައި އޮންނާނެކަމަށެވެ. އަދި ރައްޔިތުންގެ ޖަލްސާއެއްގައި، މިކަމުގެ މަޢުލޫމާތު ދިނުމެއްނެތި، ފުޓްސަލް ދަނޑަށް ވޯޓަށް އަހައި ފާސްކޮށްފައިވާ ނިޔަތާއި މެދު ސުވާލު އުފެދޭކަމަށް އެބޭފުޅުން ހާމަކުރެއްވިއެވެ.
މި މައްސަލައާއި ގުޅިގެން ދަރަނބޫދޫ ކައުންސިލްގެ ރައީސް ވިދާޅުވީ ރައްޔިތުން ފާސްކުރި ބިމުގައި ފުޓްސަލް ދަނޑު ހަދާނަމަ، ރަސްމީ ފުޓްބޯޅަ ދަނޑުގައި ދުވާ ޓްރެކް ހަދާނެ ޖާގަ ނުލިބޭކަން އެނގިފައިވަނީ ލޭންޑް ޔޫސް ޕްލޭން ފާސްކުރުމަށް މިނިސްޓްރީއަށް ހުށަހެޅި ފަހުން ކަމަށެވެ. އެހެން ކަމުން ރައްޔިތުންގެ ބައްދަލުވުމެއް އަލުން ބާއްވައިގެން މިކަމަށް ޙައްލެއް ހޯއްދަވާނެކަމަށް ވިދާޅުވިއެވެ. ނަމަވެސް މި ޖަލްސާ ބާއްވާނެ ވަކި ދުވަހެއް އަދި ނޭނގޭކަމަށް ވިދާޅުވިއެވެ.
