ޓީމުތަކުގެ ތަރުޙީބު ކުޑަވުމުން ދަރަނބޫދޫ ޑަބްލިއުޑީސީގެ ހޭންޑްބޯޅަ މުބާރާތް ފަސްކޮށްފި!

ދަރަނބޫދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީ (ޑަބްލިއުޑީސީ) އާއި ދަރަނބޫދޫ ކައުންސިލް އިދާރާ ގުޅިގެން، ރަށުގެ ކަނބަލުންނަށް ޚާއްޞަކޮށްގެން ކުލަގަދަގޮތެއްގައި ބޭއްވުމަށް އިޢުލާނުކުރި ”ދަރަނބޫދޫ ޑަބްލިއުޑީސީ ކަނބަލުންގެ ހޭންޑްބޯލް މުބާރާތް 2026“ ގައި ބައިވެރިވުމުގެ ފުރުޞަތު، 5 އޮކްޓޯބަރު 2026 ވީ ހޯމަ ދުވަހުގެ މެންދުރުފަހު 13:00 އަށް ހަމަވިއިރު، މުބާރާތް ކުރިއަށް ގެންދިއުމަށް ބޭނުންވާ އެކަށީގެންވާ އަދަދަށް ޓީމުތަކުން ކުރިމަތިލާފައި ނުވާތީ، މި ދަނޑިވަޅުގައި މުބާރާތް ކުރިއަށް ގެންދެވެން ނެތް ކަމަށް އެ ކޮމެޓީން ހާމަކޮށްފިއެވެ.

މި މުބާރާތާ ގުޅޭގޮތުން ދަރަނބޫދޫ ޑަބްލިއުޑީސީގެ ރައީސާ ލީލާ ވިދާޅުވީ، މި ހިނގާ އޮކްޓޯބަރު މަހުގެ 15 އިން 20 އަށް ފޯރިއާއެކު ބޭއްވުމަށް ކުރިން ތާވަލުކުރެވުނު މި މުބާރާތް، އެކަށީގެންވާ މިންވަރަށް ޓީމުތައް ބައިވެރިވެފައި ނުވުމުގެ ސަބަބުން މިވަގުތަށް ފަސްކުރަން ޖެހުމަކީ އެ ކޮމެޓީންނާއި ކައުންސިލުން ނުހަނު ހިތާމަކުރާ ކަމެއް ކަމަށެވެ.

ރައީސާ ލީލާ އިތުރަށް ބަޔާންކުރެއްވި ގޮތުގައި، މިއީ ރަށުގެ ކަނބަލުންގެ މެދުގައި އެކުވެރިކަމާއި އެއްބައިވަންތަކަން ޢާލާކޮށް، އަތޮޅު ފެންވަރާއި ޤައުމީ ފެންވަރުގައި ވިދާލާނެ ޒުވާން ހުނަރުވެރި ކުޅުންތެރިންތަކެއް އުފެއްދުމުގެ މުހިންމު މަޤްޞަދުގައި ރޭވުނު މުބާރާތެކެވެ.

އަދި މިފަދަ ކުޅިވަރު ޙަރަކާތްތަކުގެ ޒަރީޢާއިން ޞިއްޙީގޮތުން ދުޅަހެޔޮ، ހީވާގި މުޖުތަމަޢެއް ބިނާކުރުމަށް އަމާޒު ހިފާފައިވާ މި މުބާރާތް މުޅިން ކެންސަލްކޮށްލުމުގެ ބަދަލުގައި، މުބާރާތް  ބޭއްވުމަށް މިހާރު ނިންމާފައިވަނީ ފެށޭ އަހަރުގެ ކުރީކޮޅުގެ ތާރީޚެއްގައެވެ.

އަދި މުބާރާތް ބާއްވާނެ ވަކި ދުވަސްތަކެއް ދެން ކަނޑައަޅާނީ ދިރާސީ އަހަރުގެ ސްކޫލް ކަލަންޑަރަށް ވަރަށް ބޮޑަށް ރިޢާޔަތްކުރުމަށްފަހު ކަމަށްވެސް ރައީސާ ވިދާޅުވިއެވެ.

އެއީ ސްކޫލްގެ ތަޢުލީމީ ޚިދުމަތްތަކަށާއި، ދަރިވަރުންނަށް ޚާއްޞަކޮށްގެން ސްކޫލްގައި ހިންގުމަށް ރޭވިފައިވާ އެކިއެކި އިތުރު ޙަރަކާތްތަކަށް އެއްވެސްފަދަ ބުރޫއެއް ނާރާނެހެން، އަދި ކިޔެވުމަށް އުނދަގޫނުވާނެ ފަދަ އިންތިޒާމެއްގެ ދަށުން މި މުބާރާތް ފުރިހަމަކަމާއެކު ކުރިއަށް ގެންދިއުމުގެ މަޤްޞަދުގައެވެ.

ކޮމެޓީގެ ރައީސާ ލީލާގެ އުންމީދަކީ ކުރިއަށް އޮތް ތަނުގައި މި މުބާރާތަށް އެކަށީގެންވާ ފުރިހަމަ ތަރުޙީބެއް ލިބި، ގިނަ ޓީމުތަކެއްގެ ބައިވެރިވުމާއެކު ކާމިޔާބު މުބާރާތެއް ބޭއްވިގެންދިއުމެވެ.

މުބާރާތް ދެން ބާއްވާނެ ވަކި ތާރީޚެއް ފަހުން ރަސްމީކޮށް އިޢުލާނު ކުރާނެ ކަމަށްވެސް އަންހެނުންގެ ތަރައްޤީއަށް މަސައްކަތްކުރާ ކޮމެޓީ (ޑަބްލިއުޑީސީ)އިން ވަނީ ވިދާޅުވެފައެވެ