ނިލަންދޫގެ މަސްބާނާ ޖެޓީ މަރާމާތުކޮށް، ރައްޔިތުންގެ ބޮޑު ކަންބޮޑުވުމަކަށް އަވަސް ޙައްލެއް!
ފާޠިމަތު ޢަރޫޝާ
ފ. ނިލަންދޫ އިރުމަތީ ފަރާތުގައި އަލަށް ތަރައްޤީކުރަމުންދާ ޒަމާނީ ބަނދަރުގެ ބޭރުތޮށީގައި ހަދާފައިވާ މަސްބާނާ ޖެޓީ މަރާމާތުކުރުމުގެ މުހިންމު އަދި ބުރަ މަސައްކަތްތަކެއް ކާމިޔާބުކަމާއެކު ނިންމާލައިފިއެވެ.
މި ސެޕްޓެމްބަރު މަހުގެ 29 އިން 30 އަށް ކުރިއަށްދިޔަ މި މަޝްރޫޢަކީ ނިލަންދޫ ކައުންސިލާއި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) އަދި ފެނަކަ ކޯޕަރޭޝަން ގުޅިގެން ކުރިއަށްގެންދިޔަ ޚާއްޞަ އިސްނެގުމެކެވެ.
މި މަސައްކަތުގެ މައިގަނޑު އަމާޒަކީ ޖެޓީގެ އިރުމަތީ ފަރާތުން އަރިވެ، ދަށަށް ފައިބަމުންދިޔަ ބައިތައް މައްޗަށް އުފުލައި، ރައްކާތެރިކަމާއެކު ބޭނުންކުރެވޭނެ ފަދަ އެއްވަރަކަށް ލެވެލްކުރުމެވެ. މިކަމުގެ ސަބަބުން ޖެޓީގެ ސްޓްރަކްޗާއަށް ލިބެމުންދިޔަ ގެއްލުންތައް ހުއްޓުވައި، ދިގު މުއްދަތަކަށް އެ ވަސީލަތް ދެމެހެއްޓުމުގެ މަގު ވަނީ ތަނަވަސްވެފައެވެ.
އިޖުތިމާޢީ ރޫޙެއްގައި ކުރިއަށްދިޔަ މި މަސައްކަތުގައި ނިލަންދޫ ކައުންސިލް އިދާރާގެ މުވައްޒަފުންގެ އިތުރުން، އެ ރަށުގައި ހަރަކާތްތެރިވާ އެމް.ޓީ.ސީ.ސީގެ ޓީމާއި ފެނަކަ ކޯޕަރޭޝަންގެ ނިލަންދޫ ބްރާންޗުގެ މުވައްޒަފުން ވަނީ ޢަމަލީގޮތުން ބައިވެރިވެ، ބޮޑު އެހީތެރިކަމެއް ފޯރުކޮށްދީފައެވެ.
އެކި މުއައްސަސާތައް ގުޅިގެން ކުރު މުއްދަތެއްގެ ތެރޭގައި މި މަސައްކަތް ނިންމާލުމަކީ، ރަށުގެ ތަރައްޤީއަށާއި އާންމު ލާބައަށްޓަކައި މުއައްސަސާތަކުގެ މެދުގައި އޮތް ބަދަހި އެއްބާރުލުމާއި ގުޅުން ހާމަކޮށްދިން ރީތި މިސާލެކެވެ.
މި މަސައްކަތް ނިންމާލުމަށްފަހު، ނިލަންދެއަތޮޅު އުތުރުބުރީ ނިލަންދޫ ކައުންސިލްގެ ރައީސް ވަނީ އެމް.ޓީ.ސީ.ސީ އާއި ފެނަކައިގެ ޓީމުން ދެއްވި އިޚްލާޞްތެރި އެހީތެރިކަމަށް ޚާއްޞަ ޝުކުރެއް އަދާކުރައްވާފައެވެ.
އަދި ރަށުގެ އާންމު ވަޞީލަތްތައް ހެޔޮގޮތުގައި ބަލަހައްޓައި، ރައްޔިތުންނަށް ބޭނުންވާ ލުއިފަސޭހަތަކާއި ރައްކާތެރިކަން ހޯދައިދިނުމުގައި ކައުންސިލުން އަބަދުވެސް ދެމިއޮންނާނެކަމުގެ ޔަޤީންކަން ރައީސް ދެއްވިއެވެ.
ގުޅުންހުރި
ޚިޔާލުތައް (0)