ކުޅުދުއްފުށީ ވެލިގަނޑު ސަރަޙައްދުގައި ”ބޮޑުތިލަދުންމަތި ބާޒާރު“ ކުލަގަދަކޮށް ފަށައިފި!
ފާޠިމަތު ޢަރޫޝާ
ކުޅުދުއްފުށި ސިޓީ ކައުންސިލްގެ އިސްނެގުމާއެކު އިންތިޒާމުކޮށްގެން ބާއްވާ ”ބޮޑުތިލަދުންމަތި ބޮޑު ބާޒާރު“ ރަސްމީކޮށް ހުޅުވައިފިއެވެ.
މި ބާޒާރު ހުޅުވުމަށްޓަކައި ބޭއްވުނު ޚާއްޞަ ރަސްމިއްޔާތު ޝަރަފުވެރިކޮށްދެއްވައި، އިފްތިތާޙު ކޮށްދެއްވީ ކުޅުދުއްފުށި ސިޓީގެ މޭޔަރު މުޙައްމަދު އާތިފެވެ.
ސެޕްޓެމްބަރު 30 އިން ފެށިގެން އޮކްޓޫބަރު މަހުގެ 4 ވަނަ ދުވަހުގެ ނިޔަލަށް ކުޅުދުއްފުށީގެ ”ވެލިގަނޑު“ ސަރަޙައްދުގައި ކުރިއަށްދާ މި ބާޒާރަކީ، ތިލަދުންމަތީގެ އިޤްތިޞާދީ އަދި އިޖުތިމާޢީ ދިރުން އިތުރުކުރުމަށް ރޭވިފައިވާ މުހިންމު ޙަރަކާތެކެވެ.
ކުދި ވިޔަފާރިތަކަށް ފަހި ފުރުޞަތެއް:
މި ބޮޑު ބާޒާރުގެ މައިގަނޑު މަޤްޞަދަކީ ހއ. ހދ. އަދި ށ. އަތޮޅަށް ނިސްބަތްވާ ކުދި އަދި މެދު ފަންތީގެ ވިޔަފާރިތަކަށް އެ ފަރާތްތަކުގެ އުފެއްދުންތަކާއި ޚިދުމަތްތައް މާކެޓްކޮށް، އިޝްތިހާރު ކުރުމުގެ ފުރުޞަތު ފަހިކޮށްދިނުމެވެ. މިގޮތުން، މި އަހަރުގެ ބާޒާރުގައި އެކި ދާއިރާތަކުން ޖުމްލަ 22 ވިޔަފާރިއަކުން ބައިވެރިވެ، އެ ފަރާތްތަކުގެ އުފެއްދުންތައް ބާޒާރުގައި ދައްކާލަމުންދެއެވެ. މިއީ އަތޮޅުތެރޭގެ އިޤްތިޞާދީ ކުރިއެރުމަށާއި، އަމިއްލަ މަސައްކަތްތެރިން ކުރިއެރުވުމަށް އެޅުނު މުހިންމު ފިޔަވަޅެކެވެ.
ޢާއިލީ ހަވީރާއި މުނިފޫހިފިލުވުމުގެ ތަފާތު ޙަރަކާތްތައް:
ވިޔަފާރިތަކުގެ އިތުރުން، މި ބާޒާރަކީ ޢާއިލާތަކަށާއި ކުޑަކުދިންނަށް ބޭނުންވާނެ އެތައް މުނިފޫހިފިލުވުމެއް އެއްތަނަކުން ލިބޭނެހެން ފަރުމާކުރެވިފައިވާ ކާނިވަލެކެވެ. އެގޮތުން ބާޒާރުގެ ތެރޭގައި ކުރިއަށްދާ ”އައިލެންޑް ކާނިވަލް“ ގައި ކުޑަކުދިންނާއި ބޮޑެތިމީހުންނަށްވެސް ބައިވެރިވެވޭނެ ތަފާތު 12 ގޭމެއް ހިމެނެއެވެ.
މީގެ އިތުރުން، ބާޒާރަށް ޒިޔާރަތްކުރާ ފަރާތްތަކަށް ހިތްހަމަޖެހުން ހޯދައިދިނުމުގެ ގޮތުން ސަޤާފީ ބޮޑުބެރުގެ ހުށަހެޅުންތަކާއި، މިއުޒިކް ބޭންޑްތަކުގެ ލައިވް ހުށަހެޅުންތައް ކޮންމެ ރެއަކުވެސް ފެނިގެންދާނެއެވެ. އަދި މި އަހަރުގެ ބާޒާރުގައި އެންމެ ޚާއްޞަ އެއް ޙަރަކާތެއްގެ ގޮތުގައި ”ބިރުވެރި ހޮހޮޅަ“ ތަޖުރިބާކޮށްލުމުގެ ފުރުޞަތުވެސް ވަނީ ހުޅުވާލެވިފައެވެ.
ކުޅުދުއްފުށި ސިޓީ ކައުންސިލުން މަޢުލޫމާތުދޭ ގޮތުގައި، މި ބާޒާރުގެ ސަބަބުން ބޮޑުތިލަދުންމަތީގެ ރަށްތަކުގެ މެދުގައި އޮންނަ އިޖުތިމާޢީ ގުޅުން ބަދަހިވެ، އާއިލީ އުފާވެރި މާޙައުލެއް ޤާއިމުވެގެންދާނެއެވެ. ފަސް ދުވަހުގެ މުއްދަތަށް ކުރިއަށްދާ މި ބާޒާރަށް ގިނަ އަދަދެއްގެ ބަޔަކު ޒިޔާރަތްކުރާނެ ކަމަށް ބެލެވެއެވެ.
ގުޅުންހުރި
ޚިޔާލުތައް (0)