ހިތުގެ ދުވަސް ފާހަގަކުރުމަށް މަގޫދޫގައި ކަސްރަތު ޙަރަކާތެއް!

އިޝްތިހާރު

ދުނިޔޭގެ ހިތުގެ ދުވަސް ފާހަގަކުރުމުގެ ގޮތުން، އާންމުންގެ މެދުގައި ދުޅަހެޔޮ ދިރިއުޅުމަކަށް ބާރުއެޅުމަށާއި ހޭލުންތެރިކަން އިތުރުކުރުމަށް ފ. މަގޫދޫގައި ޚާއްޞަ ކަސްރަތު ޙަރަކާތެއް ކުރިއަށް ގެންގޮސްފިއެވެ.

މި ޙަރަކާތަކީ ފ. މަގޫދޫ ސިއްޙީ މަރުކަޒު (F.Magoodhoo Health Centre – FMHC) އިސްނަގައިގެން، ރަށުގެ މުއައްސަސާތަކާއި ރައްޔިތުންނަށް އަމާޒުކޮށްގެން ބޭއްވި ޙަރަކާތެކެވެ. ރަށުގެ ދުޅަހެޔޮކަމާއި ދިފާޢީ ބާރު ވަރުގަދަކުރުމުގެ މަޤުޞަދުގައި ކުރިއަށްދިޔަ މި ކަސްރަތު ޕްރޮގްރާމްގައި ފ. މަގޫދޫ ޕޮލިސް ސްޓޭޝަނުން ވަނީ ޢަމަލީގޮތުން ބައިވެރިވެ، ޙަރަކާތް ފުރިހަމަކުރުމަށް ބޭނުންވާ ފުރިހަމަ އެހީތެރިކަމާއި އެއްބާރުލުން ފޯރުކޮށްދީފައެވެ.

އިޝްތިހާރު

ކުޑަކުދިންނާއި ބޮޑެތި މީހުން ހިމެނޭހެން، ރަށުގެ އެކި ފަންތީގެ ޖުމްލަ 29 ފަރާތަކުން މި ޙަރަކާތުގައި ޖޯޝާއި ފޯރިއާއެކު ބައިވެރިވެފައިވެއެވެ.

ފ. މަގޫދޫ ސިއްޙީ މަރުކަޒުން މަޢުލޫމާތު ދެއްވި ގޮތުގައި، މިފަދަ ޙަރަކާތްތަކުގެ މައިގަނޑު ބޭނުމަކީ ހިތުގެ ބަލިތަކުން ރައްކާތެރިވުމަށްޓަކައި ކަސްރަތު ކުރުމުގެ މުހިންމުކަން އަންގައިދީ، ދުޅަހެޔޮ މުޖުތަމައެއް ބިނާކުރުމެވެ.

އަދި ޙަރަކާތް ކާމިޔާބުކަމާއެކު ކުރިއަށް ގެންދިއުމުގައި މަގޫދޫ ޕޮލިސް ސްޓޭޝަނާއި ރަށުގެ ރައްޔިތުންގެ ފަރާތުން ލިބުނު އެއްބާރުލުމަށް އެ މަރުކަޒުން ވަނީ ޝުކުރު އަދާކޮށްފައެވެ.

އިޝްތިހާރު