ދުނިޔޭގެ ފެންވަރުގެ މާހިރު ޕްރޮފެސަރ މެކްގޮރީ ކުޅުދުއްފުށީ ހޮސްޕިޓަލަށް!

އިޝްތިހާރު

ދުނިޔޭގެ ނަފްސާނީ ސިއްޚަތުގެ ދާއިރާގައި ފާހަގަކޮށްލެވޭ މަޝްހޫރު ބޭފުޅެއް ކަމަށްވާ ޕްރޮފެސަރ ޕެޓްރިކް މެކްގޮރީ ކުޅުދުއްފުށި ސިޓީއަށް ކުރެއްވި ޒިޔާރަތެއްގައި، ކުޅުދުއްފުށީ ރީޖަނަލް ހޮސްޕިޓަލް (ކޭއާރުއެޗް) އަށް ވަޑައިގެންފިއެވެ.

ކޭއާރުއެޗް އިން ބުނި ގޮތުގައި، ދުނިޔޭގެ ފެންވަރުގެ މާހިރަކު އެ ހޮސްޕިޓަލަށް ޒިޔާރަތް ކުރެއްވުމަކީ ނަފްސާނީ ސިއްޚަތުގެ ޚިދުމަތްތައް ތަރައްޤީކުރުމަށް ލިބުނު ވަރަށް ބޮޑު ޝަރަފެއް އަދި ހިތްވަރެކެވެ.

އިޝްތިހާރު

މި ޒިޔާރަތުގައި ޕްރޮފެސަރ މެކްގޮރީ ވަނީ ކުޅުދުއްފުށީ ރީޖަނަލް ހޮސްޕިޓަލުގައި ޤާއިމްކޮށްފައިވާ ނަފްސާނީ ދުޅަހެޔޮކަމާ ބެހޭ މަރުކަޒަށް ވަޑައިގެން، އެތަނުގެ މަސައްކަތްތައް ހިނގާގޮތް ބައްލަވާލައްވާފައެވެ.

މީގެ އިތުރުން، ހޮސްޕިޓަލުގެ މެނޭޖްމަންޓާއި، ނަފްސާނީ ސިއްޚަތުގެ ޓީމުގެ ބޭފުޅުންނާއި، އަދި ކުޅުދުއްފުށި ސިޓީ ކައުންސިލާ އެކު އެމަނިކުފާނު ވަނީ ޚާއްޞަ މަޝްވަރާ ބައްދަލުވުންތަކެއް ބާއްވަވާފައެވެ.

މި ބައްދަލުވުންތަކުގައި މައިގަނޑު ގޮތެއްގައި މަޝްވަރާކޮށްފައިވަނީ:

* މުޖުތަމައުގެ ބޭނުންތައް: ކުޅުދުއްފުށި ސިޓީއާއި ސަރަޙައްދީ ފެންވަރުގައި މުޖުތަމަޢަށް ބޭނުންވާ ނަފްސާނީ ސިއްޚަތުގެ ޚިދުމަތްތައް ދެނެގަތުން.

* ޚިދުމަތުގެ ގޮންޖެހުންތައް: ނަފްސާނީ ބަލިތަކަށް ފަރުވާދިނުމުގައާއި ޚިދުމަތް ފޯރުކޮށްދިނުމުގައި ކުރިމަތިވާ މައިގަނޑު ހުރަސްތަކާ ބެހޭގޮތުން ވާހަކަދެއްކުން.

* މުވައްޒަފުން ތަމްރީނުކުރުން: މި ދާއިރާއިން ކުރިއަށްދާން ހުރި ފުރުޞަތުތަކާއި، މުވައްޒަފުންގެ ފަންނީ ޤާބިލުކަން އިތުރުކުރުމަށް އެންމެ އިސްކަންދޭންޖެހޭ ދާއިރާތައް ކަނޑައެޅުން.

ކުޅުދުއްފުށީ ރީޖަނަލް ހޮސްޕިޓަލުން ވަނީ، ރާއްޖޭގެ އަތޮޅުތެރޭގެ ނަފްސާނީ ސިއްޚަތުގެ ޚިދުމަތްތައް އިތުރަށް ހަރުދަނާކޮށް ކުރިއެރުވުމަށްޓަކައި ޕްރޮފެސަރ މެކްގޮރީ ދެއްވި އަގުހުރި އިރުޝާދުތަކަށާއި، މި ދާއިރާއަށް ބެހެއްޓެވި ޚާއްޞަ އަހަންމިއްޔަތުކަމަށްޓަކައި އެމަނިކުފާނަށް އިޚްލާޞްތެރި ޝުކުރެއް އަދާކުރައްވާފައެވެ.

އިޝްތިހާރު