ޤައުމީ ޤުރްއާން މުބާރާތުން ރަންވަނަ ހޯދި ޢަމްރުއަށް ނޭކުރެންދޫއިން ކުލަގަދަ މަރުޙަބާއެއް!

އިޝްތިހާރު

ކީރިތި ޤުރްއާން ކިޔެވުމުގެ 38 ވަނަ ޤައުމީ މުބާރާތުގެ ނުބަލާ ކިޔެވުމުގެ ގޮފިން، 8 އަހަރުން ދަށުގެ އުމުރުފުރާއިން މުޅި ރާއްޖެއިން 1 ވަނަ މަޤާމު ހދ. ނޭކުރެންދޫ، ޢަމްރު ޙަސަން ފާއިޒް ޙާސިލުކޮށްފިއެވެ.

މިނިސްޓްރީ އޮފް އިސްލާމިކް އެފެއާޒް އެންޑް އެންޑޯމެންޓްސް އާއި ކީރިތި ޤުރްއާނާ ބެހޭ ޤައުމީ މަރުކަޒު ގުޅިގެން ބޭއްވި މި މުބާރާތުގެ ނަތީޖާ ފާޅުކުރުމުގެ ކުލަގަދަ ރަސްމިއްޔާތުގައި، ޢަމްރުގެ މި ލާމަސީލު ކާމިޔާބީ ފާހަގަކޮށް ހޫނު މަރުޙަބާއެއް ވަނީ ކިޔާފައެވެ.

އިޝްތިހާރު

ކާމިޔާބީގެ ފަޚުރުވެރި މި ރަސްމިއްޔާތުގައި، މުޅި ރާއްޖެއިން އެއްވަނަ ހޯދި ދަރިވަރު ޢަމްރުއަށް ވަނީ އެއްވަނައިގެ ރަސްމީ ހަނދާނީލިޔުމާއި މުބާރާތުގެ ޚާއްޞަ ރަން ޓްރޮފީ އަރުވާފައެވެ. މީގެއިތުރުން، މި ބައިން މުޅި ރާއްޖެއިން އެއްވަނައަށް ހޮވޭ ދަރިވަރަށް ދިނުމަށް ކަނޑައަޅާފައިވާ 15,000 (ފަނަރަ ހާސް) ރުފިޔާގެ ފައިސާގެ އިނާމުވެސް ޢަމްރު ވަނީ ހާސިލުކޮށްފައެވެ.

މި ރަސްމިއްޔާތުގެ ޝަރަފްވެރި މެހެމާނު، އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދުގެ އަތްޕުޅުން ޢަމްރުއަށް އިނާމުތައް ޙަވާލުކޮށްދެއްވުމަށްފަހު، ޢަމްރު ދެއްކި ލާމަސީލު ހުނަރަށާއި މޮޅު ކިޔެވުމަށް އެ މަނިކުފާނު ވަނީ ވަރަށް ބޮޑަށް ސާބަސް ދެއްވައި ތަޢުރީފު ކުރައްވާފައެވެ.
މިއަހަރުގެ ޤައުމީ ޤުރްއާން މުބާރާތަކީ އޮނިގަނޑަށް ބޮޑެތި ބަދަލުތަކެއް ގެނެސްގެން، ރާއްޖޭގެ 20 ސަރަޙައްދެއްގައި އޮޑިޝަންތައް ބާއްވައިގެން ކުރިއަށްގެންދިޔަ، ތާރީޚީ ގޮތުން ފާހަގަކޮށްލެވޭ މުބާރާތެކެވެ. މި މުބާރާތުގެ އޮޑިޝަންތަކުގައި ޖުމްލަ 2،742 ބައިވެރިން ވާދަކޮށްފައިވާއިރު، 8 އަހަރުން ދަށުގެ ނުބަލާ ކިޔުމުގެ ގިންތިއަކީ އެންމެ ގިނަ އަދަދެއްގެ ކުޑަކުދިން ވާދަކުރި، އަދި އެންމެ ވާދަވެރިކަން ބޮޑުވި އެއް ބައެވެ.

ކާމިޔާބީގެ ރަން ތަށި ހިފައިގެން ޢަމްރު އެނބުރި ރަށަށް ފޭބި ވަގުތަކީ މުޅި ނޭކުރެންދޫއަށް ބޮޑު ޢީދެއް އައިފަދަ އުފާވެރި ވަގުތަކަށް ވެގެންދިޔައިރު، ޢަމްރުގެ މި ޝަރަފްވެރި ޤައުމީ ކާމިޔާބީ ފާހަގަކުރުމަށްޓަކައި ރަށުގެ ބަނދަރު ސަރަޙައްދަށް ގިނަ އަދަދެއްގެ ރައްޔިތުން ވަނީ ޖަމާވެފައެވެ. މިގޮތުން ރަށު ކައުންސިލާއި، ހދ. އަތޮޅު ކައުންސިލް އިދާރާގެ އިތުރުން ފެނަކަ ނޭކުރެންދޫ ބްރާންޗާއި، ނޭކުރެންދޫ ސްކޫލާއި، ނޭކުރެންދޫ ހެލްތު ސެންޓަރު އަދި ރަށުގެ ޕޮލިސް ސްޓޭޝަން މަރުޙަބާގެ ސަފުތަކަކަށް އެތުރި، ޢަމްރުއަށް ވަނީ ޚާއްޞަ ޝަރަފަކާއި މަރުޙަބާގެ ބޯޑުތަކާއެކު ހިތްވަރު ދީފައެވެ.

މިއީ މުޅި ރަށުގެ ލޮބުވެތި ރައްޔިތުންނާއި ރަށުގެ މުއައްސަސާތަކުގެ މެދުގައި އޮތް އެއްބައިވަންތަކަމާއި ލޯބި ބުނެދިން ނަމޫނާ ޙަރަކާތެކެވެ. ޢަމްރުގެ ޚިދުމަތްތެރި ކާމިޔާބީގެ ސަބަބުން މުޅި ރަށަށް ލިބުނު ރީތި ނަމާއި ޝަރަފަށްޓަކައި، ރަށުގެ ރައްޔިތުން ތިބީ އިންތިހާއަށް އުފާވެފައެވެ.

އެހެންކަމުން، މުޅި ރަށުގެ ނަމުގައި ޢަމްރުއަށް ހިތުގެ ފުންމިނުން ފަޚުރުވެރި ޝުކުރެއް ރައްދުކުރުމަށްޓަކައި އެންމެން އަތާއަތްގުޅާލައިގެން ކުރިއަށްގެންދިޔަ މި ޙަރަކާތް ވެގެންދިޔައީ ތާރީޚީ ކާމިޔާބީއަކަށެވެ

އުމުރުން ނުހަނު ހަގު ނަމަވެސް، ތަޖުވީދުގެ ފުރިހަމަ ހަމަތަކާއެކު ޢަމްރު ދެއްކި އޮމާން، މޮޅު ކިޔެވުމާއެކު ޙާސިލުކުރި މި ޤައުމީ ރަންވަނައަކީ، ޢަމްރުގެ ޢާއިލާއަށާއި މުޅި ނޭކުރެންދޫއަށް ލިބުނު ނުހަނު ބޮޑު ޝަރަފަކާއި ފަޚުރެކެވެ.

އިޝްތިހާރު