ނޫމަރާ ރައްޔިތުންގެ ހަދިޔާއެއް: ”ޒިޔާރަތު ބީޗު“ ކައުންސިލާ ހަވާލުކޮށްފި!

ށ. ނޫމަރާގެ ޢާއްމު ފަރާތްތަކެއް އިސްނަގައިގެން، އެންމެހާ ރައްޔިތުންގެ އެހީތެރިކަމާއެކު އެރަށުގެ އިރުމަތީ ފަރާތުގައި ތަރައްޤީ ކުރަމުންދިޔަ ”ޒިޔާރަތު ބީޗު“ ގެ މަސައްކަތް 2026 އޮކްޓޫބަރު 5 ވަނަ ދުވަހު އެއްކޮށް ނިންމާ، ނޫމަރާ ކައުންސިލާ ރަސްމީކޮށް ޙަވާލުކޮށްފިއެވެ.

މިއީ ނޫމަރާ ރައްޔިތުންނަށާއި އެރަށަށް ޒިޔާރަތްކުރާ ފަރާތްތަކަށް ހިތްފަސޭހަ މާޙައުލެއް ޤާއިމުކުރުމުގެ މަޤްޞަދުގައި، ރަށުގެ ޚިދުމަތްތެރި ޢާއްމު ރައްޔިތުންތަކެއް ގުޅިގެން ކުރިއަށްގެންދިޔަ ނަމޫނާ މަސައްކަތެކެވެ.

ރަށުގެ އިރުމަތީ ފަރާތް ވަރަށް ހިތްގައިމު އަދި ފުރިހަމަ ގޮތަކަށް ބަދަލުކޮށްލި މި މަޝްރޫޢަކީ ރަށުގެ ތަރައްޤީއަށް ރައްޔިތުން ކުރާ މަސައްކަތުގެ ވަރަށް ރީތި މިސާލެކެވެ.

މި މަސައްކަތް މިހާ ފުރިހަމަކަމާއެކު ނިންމާލެވުމާ ގުޅިގެން، ނޫމަރާ ކައުންސިލާއި މުޅި ރަށުގެ ރައްޔިތުންގެ ނަމުގައި، މަސައްކަތް ރޭވުމާއި ޢަމަލީގޮތުން ޙަރަކާތްތެރިވި ހުރިހާ ބޭފުޅުންނަށް ވަނީ ވަރަށް ޚާއްސަ ޝުކުރެއް ދަންނަވާފައެވެ.

އަދި މީގެ އިތުރުން، ފައިސާގެ ގޮތުންނާއި، ތަކެތީގެ ގޮތުންނާއި އަދި އެކި ގޮތްގޮތުން މި މަޝްރޫޢު ކާމިޔާބުކުރުމަށް އެހީތެރިކަން ފޯރުކޮށްދެއްވި އެންމެހާ ދީލަތި ފަރާތްތަކަށް ވެސް ކައުންސިލުން ޝުކުރު ކަނޑައަޅުއްވާފައިވެއެވެ.

ނޫމަރާ ކައުންސިލުން ފާހަގަކުރެއްވި ގޮތުގައި، މިފަދަ އިޖުތިމާޢީ ކަންކަމުގައި ރައްޔިތުން ދައްކަވާ އެއްބައިވަންތަކަމާއި ޝައުޤުވެރިކަމަކީ ރަށުގެ ކުރިއެރުމަށް ލިބޭ ވަރަށް ބޮޑު ހިތްވަރެކެވެ. އަދި އަލަށް ހުޅުވުނު ޒިޔާރަތު ބީޗަކީ އެންމެންނަށް ވެސް ބޭނުންތެރި، ރަށުގެ ރީތިކަން އިތުރުކޮށްދޭނެ ތަނަކަށް ވާނެކަމަށް އުއްމީދުކުރެއެވެ.