މިލަންދޫ ސްކޫލުގެ ގްރޭޑް 7 ގެ ދަރިވަރުންނަށް ’ސެލްފް އަވެއާނަސް‘ ސެޝަނެއް!

އިޝްތިހާރު

މިލަންދޫ ސްކޫލުގެ ގްރޭޑް 7 ގެ ދަރިވަރުންނަށް ”އަމިއްލަ ނަފްސު ދެނެގަތުން“ މި މައުޟޫއަށް ހޭލުންތެރިކުރުމުގެ ސެޝަނެއް ބާއްވައިފިއެވެ.

މިނިސްޓްރީ އޮފް އެޑިޔުކޭޝަން، ހަޔަރ އެޑިޔުކޭޝަން އެންޑް ސްކިލްސް ޑިވެލޮޕްމަންޓްގެ އިރުޝާދުގެ ދަށުން ކުރިއަށްގެންދާ ”ކެރިއަރ ގައިޑެންސް ޕްރޮގްރާމް 2026“ ގެ ދަށުން، މިލަންދޫ ސްކޫލްގެ ގްރޭޑް 7 ގެ ދަރިވަރުންނަށް އަމާޒުކޮށްގެން ޚާއްޞަ ތަމްރީނު ސެޝަނެއް ބާއްވައިފިއެވެ.
”އަމިއްލަ ނަފްސު ދެނެގަތުން“ (Self-Awareness) މި މައުޟޫއަށް ކުރިއަށް ގެންދިޔަ މި ސެޝަނަކީ ދަރިވަރުންގެ މުސްތަޤުބަލު ބިނާކުރުމަށް މަގުދެއްކުމުގެ ގޮތުން އެ ސްކޫލްގެ ކައުންސިލަރު ފެސިލިޓޭޓްކޮށްދެއްވި ސެޝަނެކެވެ.

އިޝްތިހާރު

މި ސެޝަންގެ މައިގަނޑު ބޭނުމަކީ ދަރިވަރުންނަށް އަމިއްލަ ނަފްސާ މެދު އޮންނަ ވިސްނުން ފުންކޮށް، އެކުދިންގެ ކިބައިގައި ހުރި ހުނަރުތަކާއި، މޮޅު ސިފަތަކުގެ އިތުރުން އިސްލާޙުކުރަންޖެހޭ ކަންކަން ދެނެގަތުމަށް އެހީތެރިވެދިނުމެވެ.
މި ސެޝަންގައި މައިގަނޑު ގޮތެއްގައި ފޯކަސްކޮށްފައިވަނީ ތިން ބަޔަކަށެވެ:

ވަރުގަދަ ސިފަތަކާއި ހުނަރުތައް ދެނެގަތުން:

ދަރިވަރުންގެ ކިބައިގައި ހުރި ތަބީއީ ހުނަރުތަކާއި، ތަޢުލީމީ އަދި ޒާތީ ވަރުގަދަ ސިފަތައް (Strengths & Abilities) ދެނެގަންނާނެ ގޮތްތައް ކިޔައިދިނުން.

ޝައުގުވެރިކަން ހުރި ދާއިރާތައް ހޯދުން:

ދަރިވަރުން އެންމެ ގަޔާވާ ދާއިރާތަކާއި، ހޮބީތަކާއި އަދި މުސްތަޤުބަލުގައި ކުރިއަށްދާން ބޭނުންވާ ރޮނގުތައް (Interests) ހޯދުން.

ރަނގަޅުކުރަންޖެހޭ ބައިތައް ފާހަގަކުރުން:

އަމިއްލަ ކިބައިގައި ހުރި ބަލިކަށިކަމާއި ރަނގަޅުކުރަންޖެހޭ ކަންކަން (Areas for Improvement) ދެނެގަނެ، އެކަންކަން އިސްލާޙުކޮށް ކުރިއެރުވުމަށް ވިސްނުން ބެހެއްޓުން.

މީގެއިތުރުން، ދަރިވަރުންގެ އަމިއްލަ ސިފަތަކަށް ރިޢާޔަތްކޮށް، މުސްތަޤުބަލުގެ ލަނޑުދަނޑިތައް ހާޞިލުކުރުމުގައި އަމިއްލަ ނަފްސު ދެނެގަތުމުގެ މުހިންމުކަމާ ބެހޭގޮތުން މި ސެޝަންގައި ފުޅާދާއިރާއެއްގައި މަޝްވަރާ ކުރެވުނެވެ. އަދި އަމިއްލަ ނަފްސު ރަނގަޅަށް އެނގުމަކީ، މުސްތަޤުބަލުގެ ތަޢުލީމީ ޙަޔާތުގައްޔާއި ވަޒީފާގެ މައިދާނުގައި (Career Pathways) ވިސްނުންތެރި އަދި މާނަވީ ނިންމުންތައް ނިންމުމަށް އެހީތެރިވެދޭނެ ކަމެއްކަން ދަރިވަރުންނަށް ވިސްނައިދެވުނެވެ.
މިލަންދޫ ސްކޫލުން މަޢުލޫމާތުދޭ ގޮތުގައި، މި ސެޝަނަކީ ގްރޭޑް 7 ގެ ދަރިވަރުންގެ އުމުރާ ގުޅޭގޮތުން، އެކުދިންގެ ވިސްނުން މުސްތަޤުބަލަށް އަމާޒުކުރުމަށް ބޭއްވުނު ވަރަށް ކާމިޔާބު ސެޝަނެކެވެ. މި ސެޝަނުގެ ސަބަބުން ދަރިވަރުންގެ އަމިއްލަ ނަފްސަށް އޮންނަ އިތުބާރު ބޮޑުވެ، މުސްތަޤުބަލުގެ ކެރިއަރ ރޭވުމަށް ބޭނުންވާ އަސާސީ މަޢުލޫމާތާއި ހުނަރުތައް ދަރިވަރުންނަށް ލިބިގެންގޮސްފައިވެއެވެ.

އިޝްތިހާރު