ފ. ނިލަންދޫ ކައުންސިލުން އިންތިޒާމްކޮށްގެން ކޮންމެ އަހަރަކުވެސް ރަމަޟާންމަހު އެރަށުގައި ކުރިއަށް ގެންދާ “ނިލަންދޫ ތަރި ޤުރުއާން މުބާރާތް” 1446 ގައި 23 ފަރާތަކުން ބައިވެރިވުމަށްއެދި ފޯމު ހުށަހަޅާފައިވާ ކަމުގައި ނިލަންދޫ ކައުންސިލުން ހާމަކުރައްވައިފިއެވެ. މިއަހަރުގެ މުބާރާތުގައި ތޭވީސް ފަރާތަކުން ބައިވެރިވުމަށްއެދި ހުށަހެޅި ނަމަވެސް އޭގެތެރެއިން އެއް ބައިވެރިއަކު ޝަރުތުހަމަނުވާތީ މުބާރާތް ކުރިއަށް ގެންދާނީ ބާވީސް ބައިވެރިންނާއެކުގައެވެ.
ނިލަންދޫތަރި ޤުރުއާން މުބާރާތް ކުރިއަށް ގެންދިއުމަށް ހަމަޖެހިފައިވަނީ ދެ އޮޑިޝަނަކަށް ބަހާލައިގެންނެވެ. ފުރަތަމަ އޮޑިޝަން ތިލާވާ ކުރުމުގެ ބަޔަށް ޚާއްސަކުރެވިފައިވާއިރު މި އޮޑިޝަން ފެއްޓުމަށް ހަމަޖެހިފައިވަނީ މިމަހުގެ 8 ވަނަ ދުވަހުގައެވެ. ދެވަނަ އޮޑިޝަނަކީ ތިލާވާގެ އިތުރުން ޙިފްޒު ކުރުމުގެ ބަޔާއި ތަޖުވީދުގެ ޢިލްމުގެ ޢާންމު ބައިތަކެވެ. މި އޮޑިޝަންވެސް މިމަހުގެ 15 ވަނަ ދުވަހު ކުރިއަށް ގެންދިއުމަށް އެކައުންސިލުންވަނީ ނިންމާފައެވެ.
ނިލަންދޫ ކައުންސިލުންވަނީ މުބާރާތުގައި ބައިވެރިވި ހުރިހާ ފަރާތްތަކަށްވެސް އެއްހަމަ އުޞޫލުން ޓްރެއިނިންގ ކުރިއަށް ގެންދާނެ އިންތިޒާމްވެސް ހަމަޖައްސަވާފައެވެ. މުބާރާތަށް ބައިވެރިން ތަމްރީން ކުރުމުގެ މަސައްކަތް ކުރިއަށް ގެންދާނީ ޤުރުއާނުގެ ޢިލްމަށް ޚާއްސަ ބޭފުޅުންގެ އެހީތެރިކަމާއެކުގައިކަން އެކައުންސިލުން ފާހަގަކުރެއްވިއެވެ.
އެކައުންސިލުން އިތުރަށް މަޢުލޫމާތު ދެއްވާފައިވާ ގޮތުގައި ފާއިތުވީ އަހަރުތަކުގެ ތަޖުރިބާގެ އަލީގައި މިއަހަރުގެ މުބާރާތް ކުރިއަށްގެންދާ ހޯލްގެ ސެޓަޕަށްވަނީ ރަނގަޅު ބަދަލުތަކެއް ގެނެވިފައެވެ. މީގެ އިތުރުން މުބާރާތާއި ގުޅިގެން އިދާރީގޮތުން އެކައުންސިލުން ކުރަންޖެހޭ މަސައްކަތްތައް މިހާރު ކުރެވިފައިވާކަމަށާއި، މުބާރާތަށް ރަށުތެރެ ޒީނަތްތެރިކުރުމުގެ މަސައްކަތްތައް ކުރިއަށްދާކަމަށް މަޢުލޫމާތު ލިބިފައިވެއެވެ. އަދި މުބާރާތުގެ ފަނޑިޔާރުންނާއި ޓްރެއިނަރުންގެ އިންތިޒާމްތައް މިހާރުވަނީ ނިމުމަކާއި ހަމައަށް ގެންދެވިފައިކަމަށް އެކައުންސިލުން ހާމަކުރެއެވެ.
ނިލަންދޫ ތަރި ޤުރުއާން މުބާރާތަކީ ނިލަންދޫގެ ދަރީންގެ ހިތްތަކުގައި ތަޖުވީދުގެ ހަމަތަކާއި އެއްގޮތަށް ކީރިތި ޤުރުއާން ކިޔެވުމަށް ލޯބިޖެއްސުމާއި، ޤުރުއާން ހިތުދަސްކުރުމަށް ހިތްވަރުދީ، އިސްލާމީ ވަޙްދަތު ޤާއިމްކޮށް ދީނީ ހޭލުންތެރިކަން އިތުރުކުރުމުގެ މަޤްޞަދުގައި ނިލަންދޫ ކައުންސިލުން އިންތިޒާމްކޮށްގެން ބާއްވާ މުބާރާތެކެވެ.
