މާލޭގައި މިހާރު ކުރިއަށްދާ ގޯލްޑަން ފުޓްސަލް ޗެލެންޖުގައި ދަރަނބޫދޫ ތަމްސީލް ކުރަމުންދާ ފުއްޓަރު ސްޕޯޓްސް ކުލަބަށް ސްޕޮންސާރ އެއްގެ ގޮތުގައި ދަރަނބޫދޫ ކައުންސިލުން 23340 ރުފިޔާ ދީފިއެވެ.
ފުއްޓަރަށް ފައިސާގެ އެހީތެރިކަން ދިނުމާއިމެދު ގޮތެއް ނިންމުމަށް ކައުންސިލްގެ ޖަލްސާއަކަށް ހުށަހެޅި އެކަމާއި ބެހޭގޮތުން މަޝްވަރާ ކުރެވިފައިވަނީ ހުސްވި ޑިސެމްބަރު މަހުގެ 26 ވަނަ ދުވަހުގެ ރޭގައެވެ. އެ ޖަލްސާއާއި ބެހޭގޮތުން މަޢުލޫމާތު ސާފުކުރުމަށް ދަނިއުސްއިން ދަރަނބޫދޫ ކައުންސިލަށް ހުށަހެޅި ފޯމަށް ދެއްވި ޖަވާބާއެކު އެ ޖަލްސާގެ ޔައުމިއްޔާ ވަނީ ދަނިއުސްއާ ހިއްސާކޮށްފައެވެ.
ކައުންސިލުން ފާސްކުރި ޔައުމިއްޔާގައިވާ ގޮތުން ޓީމު ސްޕޮންސަރ ކުރުމަށް ދައްކަންޖެހޭ އެންމެ ކުޑައަގަކީ 23340 ރުފިޔާއެވެ. އެހެން ކަމުން ކައުންސިލުން ފާސްކޮށް ނިންމާފައިވަނީ ކައުންސިލުން ފުއްޓަރަށް ދީފައިވާ 4 ފުޓްސަލް ބޯޅައިގެ އަގު އުނިކުރުމަށްފަހު ބާކީވާ 18500 ރުފިޔާ އެކުލަބަށް ދިނުމަށެވެ.
ކައުންސިލް މެމްބަރު އަރުޔަޝް ހުށަހެޅުއްވި މި ހުށަހެޅުމަށް ތާއީދުކޮށް ކައުންސިލް މެމްބަރު ޝާއިރާ އިސްމާއިލްގެ އިތުރުން މެމްބަރު ލުޤުމާނު އަލީ ވަނީ ވޯޓު ދެއްވާފައެވެ. ރައީސް އަބްދުލް ޙަމީދު އާދަމް ރިޔާސަތު ބެލެހެއްޓެވި މި ޖަލްސާގައި ކައުންސިލްގެ ނައިބްރައީސް ޖުވައިރިޔާ މުޙައްމަދު ބައިވެރިވެ ނުލައްވައެވެ.
ކުލަބު ޖަމްޢިއްޔާތަކާއި ޖަމާޢަތްތަކަށް ކައުންސިލްގެ ފަރާތުން އެހީތެރިކަން ދިނުމާއި ބެހޭގޮތުން ޢަމަލުކުރާނެ އުސޫލެއް 2024 ވަނައަހަރުވަނީ އެކުލަވާލާފައެވެ. މި އުޞޫލުގެ ދަށުން ފައިސާގެ އެހީތެރިކަން ދެވޭނެ ކަންކަމާއި ދެވޭނެ ފައިސާގެ އެހީގެ ޢަދަދު ވަރަށް ސާފުކޮށް ލިޔެފައިވީނަމަވެސް، މިއީ ގެޒެޓް ކޮށްފައިނުވާ އުސޫލެއްކަން ކައުންސިލުން ދެއްވި ޖަވާބުގައި ފާހަގަކޮށްފައި ވެއެވެ.
ޖަމިއްޔާތަކަށް އެހީދިނުމަށް އުސޫލެއް ހަދައި އަދަދުތަކެއް ހިމަނާފައިވާތީ، އޭގައިވާ މިންވަރަށްވުރެ ބޮޑު ޚަރަދެއް ކައުންސިލުން ފުއްޓަރު ޖަމިއްޔާއަށް ކޮށްފައިވާތީ އެކަމާއި ގުޅިގެން ދަނިއުސް އިން ސުވާލު ކުރުމުން ދަރަނބޫދޫ ކައުންސިލްގެ ރައީސް ޢަބްދުލް ޙަމީދު އާދަމް ވިދާޅުވެފައިވަނީ ފުއްޓަރު ސްޕޯޓްސް ކުލަބަށް ދިނުމަށް ކައުންސިލުން ނިންމީ “ސްޕޮންސާރ” އެއް ކަމަށާއި އެއީ އެހީދިނުމަށް ހަދާފައިވާ އުޞޫލާއި ގުޅުމެއް ހުރި ކަމެއް ނޫންކަމުގައެވެ.
ވަކި އުސޫލެއް ހަމައެއް ނެތި ކައުންސިލުން ޖަމިއްޔާ ޖަމާޢަތްތަކަށް ފައިސާގެ އެހީތެރިކަން ދެމުން ގެންދާތީ އެކަމާއި ބެހޭގޮތުން ރަށުތެރޭގައި ކަންބޮޑުވުން އޮތްކަން ފާހަގަކުރެވެއެވެ.
