ށ. ފޯކައިދޫ އިސްލާމިކް ސެންޓަރުގެ ފައުންޑޭޝަން ބީމްގެ މަސައްކަތް ބާރުމިނުގައި ކުރިއަށް!

އިޝްތިހާރު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅުތަކުގެ ދަށުން، ރާއްޖޭގެ އެކި ކަންކޮޅުތަކުގައި ދީނީ ހޭލުންތެރިކަން އިތުރުކުރުމަށާއި އަޅުކަން ކުރާނެ ފުރިހަމަ ބިނާތައް ބިނާކުރުމަށް ގެންގުޅުއްވާ ސިޔާސަތުގެ ދަށުން ށ. ފޯކައިދޫގައި ބިނާކުރާ އިސްލާމިކް ސެންޓަރުގެ ޢަމަލީ މަސައްކަތްތައް ހަލުވި ބާރުމިނެއްގައި ކުރިއަށްދާ ކަމަށް ރިޕޯޓުތައް ބުނެފިއެވެ.

އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ބިންގާ އަޅުއްވައިދެއްވި މި ބޮޑު މަޝްރޫޢުގެ ދަށުން، މިހާރު ކުރިއަށްދަނީ ޢިމާރާތުގެ އެންމެ މުހިންމު އެއް މަރުޙަލާ ކަމުގައިވާ ފައުންޑޭޝަން ބީމް ޝަޓަރިންގ އާއި ރީއިންފޯސްމަންޓްގެ މަސައްކަތްތަކެވެ.

އިޝްތިހާރު

މި މަޝްރޫޢުގެ ކޮންޓްރެކްޓާގެ ފަރާތުން މަޢުލޫމާތުދޭ ގޮތުގައި، ޢިމާރާތުގެ ބިންގާ ވަރުގަދަކުރުމުގެ ގޮތުން ސައިޓުގައި މިހާރު ކުރިއަށްދާ ފައުންޑޭޝަން ބީމްގެ ދަގަނޑު އެޅުމާއި (Reinforcement) އަދި ކޮންކްރީޓް ކުރުމަށްޓަކައި ބޯޑުތައް ހަރުކުރުމުގެ (Shuttering) މަސައްކަތްތައް ކުރިއަށްދަނީ އެންމެ ފަރުވާތެރިކަމާއެކުގައެވެ.

ބިމުގެ އަޑީގެ ކޮންކްރީޓްގެ ބޮޑު ބައި މިހާރު ނިމުމަކާ ގާތްވެފައިވާއިރު، ކުރިއަށް އޮތް ދުވަސްތަކުގައި ފައުންޑޭޝަން ބީމްގެ ކޮންކްރީޓް އެޅުމުގެ ޢަމަލީ މަސައްކަތް ފެށިގެންދާނެ ކަމަށްވެސް ކޮންޓްރެކްޓަރުން ބުނެއެވެ.

ފޯކައިދޫގައި ޤާއިމުކުރާ މި އިސްލާމިކް ސެންޓަކީ ހަމައެކަނި ނަމާދުކުރާ މިސްކިތެއްގެ އިތުރުން ދީނީ އަދި އިޖުތިމާޢީ ގޮތުން ގިނަ ޚިދުމަތްތަކެއް ލިބޭނެހެން ފަރުމާކުރެވިފައިވާ ބިނާއެކެވެ.

އެގޮތުން މި ސެންޓަރުގައި ގިނަ އަދަދެއްގެ މީހުންނަށް އެއްފަހަރާ އަޅުކަން ކުރެވޭނެ ޖާގަ ތަނަވަސް ނަމާދުކުރާ ހޯލަކާއި، ދީނީ ހޭލުންތެރިކަމުގެ ޕްރޮގްރާމްތަކާއި ސެމިނާތަކުގެ އިތުރުން ރަށު ފެންވަރުގައި ބާއްވާ އެކި ބައްދަލުވުންތަކަށް ޚާއްޞަ މަލްޓި-ޕާޕަސް ހޯލެއް ހިމެނެއެވެ.

މީގެ އިތުރުން ދީނީ ޢިލްމު އުނގަންނައިދިނުމާއި، ޤުރުއާން ކްލާސްތަކާއި، ކުޑަކުދިންނާއި ބޮޑެތި މީހުންނަށް ދީނީ ތަޢުލީމު ފޯރުކޮށްދޭނެ ލައިބްރަރީއަކާއި ކްލާސްރޫމްތަކުގެ އިތުރުން ސެންޓަރު ހިންގުމާއި ބެލެހެއްޓުމަށް ބޭނުންވާ ޒަމާނީ އިދާރީ އޮފީސް ޖާގަވެސް މި ޢިމާރާތުގައި ޤާއިމުކުރެވޭނެއެވެ.

މި އިސްލާމިކް ސެންޓަރުގެ މަސައްކަތްތައް މުޅިން ނިމި ބޭނުންކުރަން ފެށުމުން، ށ. ފޯކައިދޫގެ އިތުރުން އެ ސަރަޙައްދުގެ އެހެން ރަށްތަކުގެ ރައްޔިތުންނަށްވެސް ދީނީ ގޮތުންނާއި އިޖުތިމާޢީ ގޮތުން ބޮޑެތި ފައިދާތަކެއް ލިބިގެންދާނެ ކަމަށް ބެލެވެއެވެ.

ސަރުކާރާއި ކަމާބެހޭ ވުޒާރާތަކުން ދަނީ މި މަޝްރޫޢު ކަނޑައެޅިފައިވާ މުއްދަތަށް ނިންމުމަށްޓަކައި، މަސައްކަތްތައް ކުރިއަށްދާ ގޮތް ވަރަށް ގާތުން މޮނިޓަރ ކުރަމުންނެވެ.

އިޝްތިހާރު