ބޮޑުބާޒާރާއި ކާނިވަލުގެ ދަޢުވަތާއެކު ކުޅުދުއްފުށީ މޭޔަރު ފޯކައިދުއަށް!

އިޝްތިހާރު

ކުޅުދުއްފުށި ސިޓީގައި ބޭއްވުމަށް ހަމަޖެހިފައިވާ ”ބޮޑުތިލަދުންމަތީ ބޮޑުބާޒާރު“ އަދި ”އައިލެންޑް ކާނިވަލް“ ގައި ބައިވެރިވުމުގެ ރަސްމީ ދަޢުވަތު އެރުވުމަށްޓަކައި، ކުޅުދުއްފުށި ސިޓީ ކައުންސިލްގެ މޭޔަރ މުޙައްމަދު ޢާޠިފް އާއި ކައުންސިލްގެ ޚާއްޞަ ވަފުދެއް ށ. ފޯކައިދުއަށް ރަސްމީ ޒިޔާރަތެއް ކުރައްވައިފިއެވެ.

މި ޒިޔާރަތުގެ މައިގަނޑު ބޭނުމަކީ ކުރިއަށް އޮތް ބޮޑުބާޒާރާއި ކާނިވަލުގެ އެކި ޙަރަކާތްތަކުގައި ބައިވެރިވުމުގެ ފުރުޞަތު ފޯކައިދޫގެ ރައްޔިތުންނަށް ފަހިކޮށްދިނުމާއި، އެ ރަށުގެ ލޮބުވެތި ރައްޔިތުންނަށް ކުޅުދުއްފުށި ސިޓީ ކައުންސިލްގެ ފަރާތުން ރަސްމީކޮށް މަރުޙަބާ ދެންނެވުމެވެ.

އިޝްތިހާރު

މޭޔަރާއި ކައުންސިލް ވަފުދުގެ މި ޒިޔާރަތުގެ ތެރެއިން ފޯކައިދޫގެ ރައްޔިތުންނަށް ވަނީ މި ޙަރަކާތްތަކުގައި ބައިވެރިވުމުގެ ދަޢުވަތު ރަސްމީކޮށް އަރުވާފައެވެ. މިގޮތުން، މި ބާޒާރާއި ކާނިވަލުގައި މުޅި ބޮޑުތިލަދުންމައްޗާއި ރާއްޖޭގެ އުތުރުގެ ގިނަ ރައްޔިތުން ބައިވެރިވުމަކީ މޭޔަރ މުޙައްމަދު ޢާޠިފްގެ ވަރަށް ބޮޑު އެދުމެކެވެ.

އައިލެންޑް ކާނިވަލްގެ ފޯރިގަދަ ގޭމްތަކާއި، މުނިފޫހިފިލުވުމުގެ ތަފާތު އަދި ކުލަގަދަ ޙަރަކާތްތަކާއެކު ކުރިއަށްދާ މި ބޮޑުބާޒާރު ބޭއްވުމަށް ހަމަޖެހިފައިވަނީ 30 ސެޕްޓެމްބަރ 2026 އިން ފެށިގެން 04 އޮކްޓޯބަރ 2026 ގެ ނިޔަލަށެވެ. މި ޙަރަކާތްތައް ކުރިއަށްދާނީ ކުޅުދުއްފުށީގެ ވެލިގަނޑު ސްޓޭޖް އަދި ބީޗް ހޭންޑްބޯލް އެރީނާ ސަރަޙައްދުގައެވެ.

މި ބާޒާރުގެ ޙަރަކާތްތައް ކޮންމެ ދުވަހެއްގެވެސް ހަވީރު 16:00 އިން 18:00 އަށް، އަދި ރޭގަނޑު 20:00 އިން 23:00 އަށް ކުރިއަށްދާނެއެވެ.

ކުޅުދުއްފުށި ސިޓީ ކައުންސިލުން މަޢުލޫމާތުދޭ ގޮތުގައި، މިފަދަ ޙަރަކާތްތަކުގެ ސަބަބުން ބޮޑުތިލަދުންމަތީގެ ރަށްތަކުގެ މެދުގައި އޮންނަ އިޖުތިމާޢީ އަދި އިޤްތިޞާދީ ގުޅުންތައް އިތުރަށް ބަދަހިވެ، ގިނަ އަދަދެއްގެ ރައްޔިތުންނަށް މީގެ ފައިދާ ކުރާނެއެވެ. އަދި އެ ކައުންސިލުގެ އުންމީދަކީ ވީހާވެސް ގިނަ ރައްޔިތުން މި ބާޒާރަށާއި ކާނިވަލަށް ޒިޔާރަތްކޮށް، މި ޙަރަކާތްތަކުގެ ބައިވެރިންނަށް ވުމެވެ.

އިޝްތިހާރު