މަގޫދޫ ތަރައްޤީ ޕްލޭނަށް މުއައްސަސާތަކުގެ ޚިޔާލު ހޯދުމުގެ ބައްދަލުވުމެއް ބާއްވައިފި

ޅ

ފ. މަގޫދޫ ކައުންސިލުން މަޢުލޫމާތު ދޭ ގޮތުގައި، ރަށުގެ ތަރައްޤީ ޕްލޭން އެކުލަވާލުމުގެ މަސައްކަތުގެ ތެރެއިން، ރަށުގައި ހުރި ސަރުކާރުގެ އެކި މުއައްސަސާތަކުގެ މުވައްޒަފުންނާ ބައްދަލުކޮށް ޚިޔާލު ހޯދުމުގެ މުހިންމު ސެޝަންތަކެއް ދާދިފަހުން ވަނީ ބާއްވައިފިއެވެ.

މި މަސައްކަތުގެ ދަށުން ބޭއްވުނު ބައްދަލުވުންތަކުގައި ފ. މަގޫދޫ ފެނަކަ ބްރާންޗްގެ މުވައްޒަފުންނާއި، ފ. މަގޫދޫ ޕޮލިސް ސްޓޭޝަންގެ މުވައްޒަފުންގެ އިތުރުން ފ. މަގޫދޫ މެޖިސްޓްރޭޓް ކޯޓުގެ މުވައްޒަފުން ވަނީ ބައިވެރިވެފައެވެ. ރަށުގެ ކުރިމަގާއި ތަރައްޤީގެ ތަޞައްވުރު ކަނޑައެޅުމުގައި މުއައްސަސާތަކުގެ ޚިޔާލާއި މަޝްވަރާ ހޯދުމަށް ކުރިއަށްގެންދިޔަ މި ސެޝަންތަކުގައި ޖުމްލަ 32 މުވައްޒަފުން ބައިވެރިވެފައިވާ ކަމަށް ކައުންސިލުން ހާމަކުރެއެވެ.

އޭގެ ތެރޭގައި ހިމެނެނީ ފެނަކަ ބްރާންޗްގެ 23 މުވައްޒަފުންނާއި، ފުލުހުންގެ 5 މުވައްޒަފުން އަދި މެޖިސްޓްރޭޓް ކޯޓުގެ 4 މުވައްޒަފުންނެވެ.

މި ބައްދަލުވުންތަކުގެ ތެރެއިން، ރަށުގެ ތަރައްޤީއަށް ބޭނުންވާ މުހިންމު ކަންކަމާއި މުއައްސަސާތަކަށް ދިމާވާ ގޮންޖެހުންތަކާ ގުޅޭގޮތުން ފުޅާ ދާއިރާއެއްގައި މަޝްވަރާ ކުރެވުނެވެ.

އަދި ރަށުގެ ތަރައްޤީ ޕްލޭން ފުރިހަމަ ކުރުމަށްޓަކައި މުވައްޒަފުންގެ ފަރާތުން ދެއްވި އަގުހުރި ޚިޔާލުތަކާއި ދެއްވި އެއްބާރުލުމަށް މަގޫދޫ ކައުންސިލްގެ ފަރާތުން ވަނީ ޚާއްޞަ ޝުކުރެއް އަދާކުރައްވާފައެވެ.