ފީއަލީ ކައުންސިލާއި ފެނަކަ ގުޅިގެން ރަށުގެ މަގުބައްތިތައް މަރާމާތުކޮށްފި
ފާޠިމަތު ޢަރޫޝާ
ފ. ފީއަލީގެ މަގުތަކަކީ އަމާން އަދި އަލި މަގުތަކަކަށް ހެދުމަށްޓަކައި، އެ ރަށު ކައުންސިލާއި ފެނަކަ ކޯޕަރޭޝަނުގެ ފީއަލީ ބްރާންޗު ގުޅިގެން ޚާއްޞަ މަސައްކަތްތަކެއް ކުރިއަށް ގެންގޮސްފިއެވެ.
ދެ މުއައްސަސާގެ އިސްނެގުމުގެ މަތިން ކުރިއަށް ގެންދިޔަ މި ހަރަކާތުގައި، ރަށުގެ އެކި ސަރަޙައްދުތަކުގައި ހުރި ނުދިއްލޭ މަގުބައްތިތައް ދެނެގަނެ، އެ ބައްތިތައް ވަނީ މަރާމާތުކޮށްފައެވެ. އަދި ބައެއް ބައްތިތަކުގެ ބަލްބު ބަދަލުކުރުމާއި، ކޭބަލްތަކަށް ދިމާވެފައި ހުރި ޓެކްނިކަލް މައްސަލަތައް ހައްލުކުރުމުގެ މަސައްކަތް ވެސް މި ހަރަކާތުގެ ތެރެއިން ވަނީ ކާމިޔާބުކަމާއެކު ނިންމާލާފައެވެ.
ފީއަލީ ކައުންސިލުން މަޢުލޫމާތު ދޭ ގޮތުގައި، މި މަސައްކަތުގެ މައިގަނޑު ބޭނުމަކީ ރޭގަނޑު ވަގުތުތަކުގައި މަގުތައް އަނދިރިވުމުގެ ސަބަބުން ރައްޔިތުންނަށް ދިމާވާ ދަތިތަކަށް ހައްލެއް ހޯދައިދިނުމެވެ. އަދި މަގުތައް އަލިކުރެވުމުން، ހިނގާބިނގާވެ އުޅޭ މީހުންނަށާއި ދުއްވާ އެއްޗެހި ބޭނުންކުރާ ފަރާތްތަކަށް ބޮޑު ލުޔެއް ލިބި، ރަށުގެ އަމާންކަން އިތުރަށް ކަށަވަރުވެގެންދާނެ ކަމަށް ކައުންސިލުން ފާހަގަކުރެއެވެ.
މި މަސައްކަތުގައި ފެނަކަ ފީއަލީ ބްރާންޗުގެ މުވައްޒަފުންގެ ފަރާތުން ލިބުނު ފަންނީ އެހީތެރިކަމާއި އެއްބާރުލުން ފާހަގަކޮށް، ރަށުގެ ތަރައްޤީއަށާއި ރައްޔިތުންގެ ލާބައަށް ކުރެވޭ މިފަދަ ކަންކަމުގައި ދެ މުއައްސަސާ ގުޅިގެން މަސައްކަތް ކުރުމަކީ ލިބޭ ވަރަށް ބޮޑު ހިތްހަމަޖެހުމެއް ކަމަށް ކައުންސިލުން ވަނީ ބުނެފައެވެ.
ރަށުގެ މަންޒަރު ރީތިކޮށް، ރައްޔިތުންނަށް ބޭނުންވާ އަސާސީ ޚިދުމަތްތައް ފުރިހަމައަށް ފޯރުކޮށްދިނުމަށް ފީއަލީ ކައުންސިލާއި ފެނަކަ ގުޅިގެން ދަނީ ގިނަ މަސައްކަތްތަކެއް ކުރަމުންނެވެ.
ގުޅުންހުރި
ޚިޔާލުތައް (0)