އިޙްތިޞާސް ހިނގާ ސަރަޙައްދު ބެލެހެއްޓުމަށް މަތިވެރީ ކައުންސިލުން ޑިންގީއެއް ހޯދަނީ!
ފާޠިމަތު ޢަރޫޝާ
އއ. މަތިވެރީ ކައުންސިލްގެ އިޙްތިޞާސް ހިނގާ ސަރަޙައްދު ބެލެހެއްޓުމަށާއި ރަށު ފެންވަރުގައި ކުރެވޭ މުނިސިޕަލް އެކިއެކި މަސައްކަތްތަކަށް ބޭނުންވާ ފައިބަރ ޑިންގީއެއް ހޯދުމަށްޓަކައި ”ދަ ބޯޓްމޭން“ އާއެކު ފަހުމުނާމާ (MoU) އެއްގައި ސޮއިކޮށްފިއެވެ.
މަތިވެރީ ކައުންސިލް އިދާރާގައި ބޭއްވުނު ޚާއްޞަ ރަސްމިއްޔާތެއްގައި މި އެއްބަސްވުމުގައި ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް އިސްމާޢިލް ޢާޠިފެވެ. އަދި ”ދަ ބޯޓްމޭން“ ގެ ފަރާތުން ސޮއިކުރެއްވީ އެ ކުންފުނީގެ އިސްވެރިއާ ޞަފްވާން ޢީޝާއެވެ.
މި އެއްބަސްވުމާ ގުޅޭގޮތުން މަތިވެރީ ކައުންސިލުން މަޢުލޫމާތު ދެއްވި ގޮތުގައި، އަލަށް ހޯދާ ފައިބަރ ޑިންގީގެ ސަބަބުން ރަށުގެ އިދާރީ ބާރު ހިނގާ ކަނޑުގެ ސަރަޙައްދާއި، ކައުންސިލްގެ ދަށުގައިވާ ފަޅުރަށްތަކާއި ފިނޮޅުތައް މޮނިޓަރކޮށް ބެލެހެއްޓުމުގެ މަސައްކަތްތަކަށް ބޮޑު ލުޔެއް ލިބިގެންދާނެއެވެ.
މީގެ އިތުރުން، ރަށުގެ މުނިސިޕަލް އެކިއެކި ޚިދުމަތްތައް ރައްޔިތުންނަށް ފޯރުކޮށްދިނުމާއި، ކައުންސިލްގެ އިދާރީ ހިންގުން ހަރުދަނާކުރުމަށް މި އުޅަނދުގެ ބޭނުން ހިފޭނެއެވެ.
މިއީ މަތިވެރީގެ ތަރައްޤީއަށާއި ރަށުގެ ސަލާމަތާއި ރައްކާތެރިކަން އިތުރުކުރުމަށް ކައުންސިލުން ކުރަމުންދާ މަސައްކަތްތަކުގެ ތެރެއިން އެޅުނު ހަރުދަނާ ފިޔަވަޅެއްގެ ގޮތުގައި ކައުންސިލުން ފާހަގަކުރެއެވެ.
ގުޅުންހުރި
ޚިޔާލުތައް (0)