ޅައިމަގު ސިއްޙީ މަރުކަޒުގައި ލެބޯޓަރީގެ ޚިދުމަތް ފަށައިފި!

އިޝްތިހާރު

ށ. ޅައިމަގު ޞިއްޙީ މަރުކަޒުގައި ލެބޯޓަރީގެ ޚިދުމަތް ރަސްމީކޮށް ފަށައިފިއެވެ.

އެރަށުގައި މިއަދު ބޭއްވި ޚާއްޞަ ރަސްމިއްޔާތެއްގައި މި ޚިދުމަތް އިފްތިތާޙުކޮށްދެއްވީ ޞިއްޙަތާއި ޢާއިލާއާއި އިޖްތިމާޢީ އެހީތެރިކަމާ ބެހޭ ވަޒީރު ޤީލާ ޢަލީއެވެ. މި ރަސްމިއްޔާތުގައި ޞިއްޙީ ވުޒާރާގެ އިސްވެރިންގެ އިތުރުން ޅައިމަގު ކައުންސިލާއި ޞިއްޙީ މަރުކަޒުގެ އިސް މުވައްޒަފުން ބައިވެރިވެވަޑައިގަތެވެ.

އިޝްތިހާރު

ޅައިމަގުގައި މިއަދު ހުޅުވިގެން މިދިޔައީ މި ސަރުކާރުން އަތޮޅުތަކުގެ ރަށްރަށުގައި ޤާއިމުކުރި 20 ވަނަ ލެބޯޓަރީއެވެ. ރާއްޖޭގެ މީހުން ދިރިއުޅޭ ހުރިހާ ރަށެއްގައި ލެބޯޓަރީގެ ޚިދުމަތް ކަށަވަރުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ރިޔާސީ ވަޢުދުފުޅެކެވެ. އެގޮތުން، މިހާތަނަށް މި ޚިދުމަތް ލިބެން ނެތް 76 ރަށެއްގައި ލެބޯޓަރީ ޤާއިމުކުރުމުގެ މަސައްކަތް ސަރުކާރުން މިހާރު ދަނީ ހަލުވި މިނެއްގައި ކުރިއަށް ގެންދަމުންނެވެ.

ޅައިމަގަށް ލެބޯޓަރީގެ ޚިދުމަތް ލިބުމަކީ އެރަށުގެ ޞިއްޙީ ނިޒާމު ހަރުދަނާކުރުމަށް ރައީސް ޑރ. މުޙައްމަދު މުޢިއްޒު ގެންގުޅުއްވާ ތަޞައްވުރުގެ ބައެކެވެ. މިދިޔަ އަހަރު އެރަށަށް ކުރެއްވި ޒިޔާރަތުގައި ރައީސް ވަނީ، ޞިއްޙީ މަރުކަޒުގެ އާ ޢިމާރާތާއެކު ޚިދުމަތް 16 ގަޑިއިރަށް ބަދަލުކުރައްވާނެ ކަމަށާއި، އާ ޢިމާރާތް ތަރައްޤީ ކުރާނީ 4 އެނދާއި ލެބޯޓަރީ ހިމޭނޭހެން ޒަމާނީ ވަޞީލަތްތަކާއެކު ކަމުގެ ޔަޤީންކަން ރައްޔިތުންނަށް ދެއްވާފައެވެ.

މި ޚިދުމަތް ފެށުމާއެކު، ޢާންމު ޓެސްޓުތައް ހެދުމަށްޓަކައި އެހެން ރަށްރަށަށް ދަތުރުކުރަން ޖެހުމުގެ ސަބަބުން ރައްޔިތުން އުފުލަމުންދިޔަ ބޮޑު ތަކުލީފަށް ވަނީ ދާއިމީ ޙައްލެއް ލިބިފައެވެ.

މީގެކުރިން ލޭގެ ޓެސްޓެއް ހަދާލުމަށްވެސް ކަނޑުދަތުރު ކުރަންޖެހުނު ނަމަވެސް، މިއަދުން ފެށިގެން އަމިއްލަ ރަށުގައި ތިބެގެން އަސާސީ ޓެސްޓުތައް ހެދުމުގެ މަގު މިވަނީ ތަނަވަސްވެފައެވެ.

ދަތުރުފަތުރަށް ހިނގާ ޚަރަދާއި ވަގުތު ސަލާމަތްވެ، ރައްޔިތުންގެ ޖީބަށް ބޮޑު ލުޔެއް ލިބިގެންދާނެއެވެ. ޚާއްޞަކޮށް ޢުމުރުން ދުވަސްވީ މީހުންނާއި ކުޑަކުދިން ގޮވައިގެން ރަށުން ބޭރަށް ދާންނުޖެހި، ފަސޭހަކަމާއެކު ރަށުން ފަރުވާ ލިބޭނެ ގޮތް ހަމަޖެހުމަކީ ޅައިމަގު ރައްޔިތުންނަށް ލިބުނު ވަރަށް ބޮޑު ހިތްހަމަޖެހުމެއް ކަމަށް އެރަށުން ވާހަކަދެއްކި ރައްޔިތުން

ފާހަގަކުރެއެވެ.

އިޝްތިހާރު