ރަން ވިންދަކަށް ރައްކާތެރިކަން: ފޯކައިދޫގައި ހިތުގެ ދުވަސް ކުލަގަދަކޮށް ފާހަގަކޮށްފި!
ފާޠިމަތު ޢަރޫޝާ
ދުނިޔޭގެ ހިތުގެ ދުވަހުގެ މުނާޞަބަތާ ގުޅިގެން، އިންސާނާގެ ހަށިގަނޑުގެ އެންމެ މުހިންމު އެއް ގުނަވަން ކަމަށްވާ ހިތުގެ ”ރަން ވިންދު“ ދުޅަހެޔޮކަންމަތީ ދެމެހެއްޓުމަށް އާންމުން ހޭލުންތެރިކުރުވުމުގެ ގޮތުން ށ. ފޯކައިދޫ ސިއްޙީ މަރުކަޒުން އިސްނަގައިގެން އެ ރަށުގައި ކުލަގަދަ ޚާއްޞަ ޙަރަކާތެއް ކުރިއަށް ގެންގޮސްފިއެވެ.
”ވޯލްޑް ހާޓް ޑޭ އީވެންޓް 2026“ ގެ ނަމުގައި އެ ރަށު ފުޓްބޯޅަ ދަނޑުގައި ކުރިއަށްގެންދިޔަ މި ޙަރަކާތަކީ މިނިސްޓްރީ އޮފް ހެލްތާއި، ހެލްތު ޕްރޮޓެކްޝަން އެޖެންސީ (އެޗްޕީއޭ) އަދި ރައީސުލްޖުމްހޫރިއްޔާގެ އޮފީހުގެ ފުރިހަމަ އެއްބާރުލުމާއި އެހީތެރިކަމާއެކު ބޭއްވުނު ޤައުމީ ފެންވަރުގެ ޙަރަކާތެކެވެ.
މި ޙަރަކާތުގައި ފޯކައިދޫގެ އެކި އުމުރުފުރާތަކުގެ ގިނަ އަދަދެއްގެ ރައްޔިތުންނާއި، މަދަރުސާގެ ދަރިވަރުންގެ އިތުރުން ރަށުގެ މުއައްސަސާތަކުގެ މުވައްޒަފުންނާއި ސިއްޙީ ޚިދުމަތްތެރިން ވަނީ އެކަތިގަނޑެއްގެ ގޮތުގައި ބައިވެރިވެފައެވެ. ޙަރަކާތުގެ ތެރެއިން، ހިތުގެ ދުޅަހެޔޮކަމާއި ދިރުން ރަމްޒުކޮށްދޭ ރަތްކުލައިގެ ހިތުގެ ބޯޑުތަކެއް ހިފައިގެން ބައިވެރިން ފުޓްބޯޅަ ދަނޑުމަތީގައި ޚާއްޞަ ސަފުތަކަކަށް އެތުރިލައި، ހޭލުންތެރިކަމުގެ މެސެޖުތައް ވަނީ އާންމުންނަށް ފޯރުކޮށްދީފައެވެ.
ފޯކައިދޫ ސިއްޙީ މަރުކަޒުން ވިދާޅުވީ، ހިތުގެ ރަން ވިންދު ސަލާމަތުން ބެހެއްޓުމަށްޓަކައި ކޮންމެ މީހެއްގެވެސް އާންމު ދިރިއުޅުމުގެ އާދަކާދަތަކަށް ހެޔޮ ބަދަލުތަކެއް ގެންނަންޖެހޭ ކަމަށެވެ. އެގޮތުން ހިތުގެ ބަލިތަކުން ދުރުހެލިވުމަށްޓަކައި ސަމާލުކަން ދޭންޖެހޭ މުހިންމު ހަތަރު ދާއިރާއެއް އެ މަރުކަޒުން ވަނީ ފާހަގަކޮށްފައެވެ. އެއީ:
* ހީވާގިވުމާއި ކަސްރަތު: ކޮންމެ ދުވަހަކުވެސް ހަށިގަނޑު ހަރަކާތްތެރިކޮށް ބެހެއްޓުމާއި، އާންމުކޮށް ކަސްރަތު ކުރުމުގެ އާދަ އަށަގަންނުވުން.
* ޞިއްޙީ ދުޅަހެޔޮ ކާނާ: ކެއުމުގައި މޭވާއާއި ތަރުކާރީގެ ބާވަތްތައް އިތުރުކޮށް، ހަށިގަނޑަށް ފައިދާހުރި ތަކެތި ޚިޔާރުކުރުން.
* ނަފްސާނީ ހަމަޖެހުން: ދިރިއުޅުމުގެ ބުރަދަނުގެ ސަބަބުން ކުރިމަތިވާ ހާސްކަމާއި ސްޓްރެސް މެނޭޖުކޮށް، ނަފްސާނީ ދުޅަހެޔޮކަމަށް އަހަންމިއްޔަތުކަން ދިނުން.
* ޤަވާޢިދުން މުޢާޔަނާކުރުން: ލޭގެ ޕްރެޝަރާއި ހަކުރުގެ މިންވަރު ޤަވާޢިދުން ބަލައި ޗެކްކުރުމާއެކު، ސިއްޙީ ޤަވާޢިދުން ހަދަންޖެހޭ ޓެސްޓުތައް ހަދައި ޙާލަތު ދެނެގަތުން.
ފޯކައިދޫ ސިއްޙީ މަރުކަޒުން ވަނީ، މިއަދު އަމިއްލަ ހިތުގެ ސިއްޙަތަށްޓަކައި ނިންމާ ކޮންމެ ހެޔޮ ނިންމުމަކީ، މާދަމާގެ އުޖާލާ މުސްތަޤުބަލަށާއި ދުޅަހެޔޮ ދިގު ޢުމުރަކަށް ކޮށައިދެވޭ އަގުހުރި މަގެއް ކަމަށް ބުނެ، ރަށުގެ ހުރިހާ ރައްޔިތުންވެސް ސިއްޙަތަށް އިސްކަންދިނުމަށް ގޮވާލައްވާފައެވެ.
ފޯކައިދޫ ސިއްޙީ މަރުކަޒުގެ މި މުހިންމު އިލްތިމާސަކީ، ދުޅަހެޔޮ މުޖުތަމަޢެއް ބިނާކުރުމަށްޓަކައި އަމިއްލަ ފަރުދީ ޒިންމާގެ މައްޗަށް ބާރުއަޅާ، ސައިންސްގެ ހޯދުންތަކުގެ މައްޗަށް ބިނާވެފައިވާ ވަރަށް އަގުހުރި ނަޞޭޙަތެކެވެ.
ޒުވާން ޢުމުރުގައާއި މިހާރު ހަށިގަނޑަށް ދެވޭ ސަމާލުކަމަކީ، ޢުމުރުން ދުވަސްވާ ދުވަހު އޭގެ ފޮނި މޭވާ ލިބޭނެ ކަމެކެވެ. މިއަދު ހިތަށް ރައްކާތެރިވުމުން، މާދަމާ ހިތުގެސްޓްރޯކް ނުވަތަ ހާާޓް އެޓޭކް ފަދަ ނުރައްކާތެރި ބަލިތަކުން ސަލާމަތްވެ، އެހެން މީހަކަށް ބަރޯސާނުވެ އުފާވެރި ދިރިއުޅުމެއް އުޅުމުގެ ފުރުޞަތު ބޮޑުވެގެންދެއެވެ.
ފޯކައިދޫ ސިއްޙީ މަރުކަޒުގެ މި އިލްތިމާސަކީ ވަކި ޢުމުރެއްގެ ނުވަތަ ވަކި ބަޔަކަށް އެކަނި އޮތް ކަމެއް ނޫނެވެ. ކުޑަކުދިންނާއި، ޒުވާނުންނާއި، ދުވަސްވީ މީހުންވެސް ސިއްޙަތަށް އިސްކަންދޭންޖެހެއެވެ. މުޅި ރަށުގެ ރައްޔިތުން އެކުގައި މިކަމަށް ހޭލުންތެރިވެ، ދުޅަހެޔޮ އާދަތަކަށް އަހުލުވެރިވެއްޖެނަމަ، އެއީ މުޅި ފޯކައިދޫއަށް ލިބޭނެ ދުޅަހެޔޮކަމާއި އުފާވެރިކަމެކެވެ.
ފޯކައިދޫ ސިއްޙީ މަރުކަޒުގެ މެސެޖަކީ ”ރައްކާތެރިވުން ފަރުވާއަށްވުރެ ބޮޑަށް އިސްކުރުމުގެ“ ރީތި ނަމޫނާއެކެވެ. މިއަދު ތިމާގެ ހަށިގަނޑަށްޓަކައި ނިންމާ ކޮންމެ ހެޔޮ ނިންމުމަކީ މުސްތަޤުބަލުގައި އަމިއްލަ ނަފްސަށާއި ޢާއިލާއަށްދެވޭ އެންމެ އަގުބޮޑު ހަދިޔާއެވެ.
ގުޅުންހުރި
ޚިޔާލުތައް (0)