ތިމާވެށި ރައްކާތެރިކުރުމަށް ކުރިމަގު ޖަމުޢިއްޔާއިން މަކުނުދޫއަށް ބިއްލޫރި ފުޅި ހަދިޔާކޮށްފި!

އިޝްތިހާރު

އެއްފަހަރު ބޭނުންކޮށްފައި އުކާލާ ޕްލާސްޓިކް މަދުކުރުމަށާއި ތިމާވެށި ރައްކާތެރިކުރުމަށް ބާރުއެޅުމުގެ ގޮތުން ހއ. ދިއްދޫ ”ކުރިމަގު ޖަމުޢިއްޔާ“ އިން ކުރިއަށްގެންދާ ޚާއްޞަ ޕްރޮގްރާމްގެ ދަށުން، ހދ. މަކުނުދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީ (WDC) އަށް ބިއްލޫރި ފުޅި ހަދިޔާކޮށްފިއެވެ.

ދިއްދޫ ކުރިމަގު ޖަމުޢިްްޔާއިން ކުރިއަށްގެންދާ ބިއްލޫރި ފުޅި ހަދިޔާކުރުމުގެ މި ޕްރޮގްރާމްގެ ދަށުން، މަކުނުދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީއަށް ޖުމްލަ 119 ބިއްލޫރި ފުޅި ވަނީ ރަސްމީކޮށް ހަވާލުކޮށްފައެވެ. މި ހަދިޔާއަކީ މަކުނުދޫގައި ޕްލާސްޓިކް ބޭނުންކުރާ މިންވަރު މަދުކޮށް، ދެމެހެއްޓެނިވި ގޮތެއްގައި ތިމާވެށި ޙިމާޔަތްކުރުމަށް ކުރެވޭ މަސައްކަތްތަކަށް ލިބުނު ބޮޑު ކުރިއެރުމެކެވެ.

އިޝްތިހާރު

މި ފުރިހަމަ އަދި ނަމޫނާ އެހީތެރިކަމާ ގުޅިގެން، ހދ. މަކުނުދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ ނަމުގައި ދިއްދޫ ކުރިމަގު ޖަމުޢިއްޔާއަށް ވަނީ ވަރަށް އިޚުލާސްތެރިކަމާއެކު ޝުކުރު އަދާކޮށްފައެވެ.

މަކުނުދޫ WDC އިން ބުނިގޮތުގައި ރަށްރަށުގެ ޖަމުޢިއްޔާތަކުން މިފަދަ އިސްނެގުންތައް އިސްނަގައި، ރަށްރަށުގެ ތަރައްޤީއަށާއި ތިމާވެއްޓަށް މަސައްކަތްކުރުމަކީ މުޖުތަމަޢުގެ އެއްބައިވަންތަކަން އިތުރުވެ، ހެޔޮ ބަދަލުތަކެއް އަންނާނެ ކަމެކެވެ.

ދިއްދޫ ކުރިމަގު ޖަމުޢިއްޔާއަކީ ރަށު ފެންވަރުގައާއި އަތޮޅު ފެންވަރުގައިވެސް އިޖުތިމާޢީ އަދި ތިމާވެށީގެ އެކި ޙަރަކާތްތައް ހިންގުމުގައި ފާހަގަކޮށްލެވޭ ހީވާގި ޖަމުޢިއްޔާއެކެވެ.

އިޝްތިހާރު