ޚަބަރު

ނައިފަރުން 17 އަހަރުގެ ކުއްޖަކު ގެއްލިގެން ހޯދަނީ!

9 ގަޑިއިރު ކުރިން

ޅ. ނައިފަރުން 17 އަހަރުގެ ފިރިހެން ކުއްޖަކު ވީނުވީއެއް ނޭނގި ގެއްލިގެން، އެ ކުއްޖާ ހޯދުމުގެ މަސައްކަތް ދިވެހި ފުލުހުންގެ ޚިދުމަތުން ފަށައިފިއެވެ.

ފުލުހުން ވިދާޅުވި ގޮތުގައި ގެއްލިގެން ހޯދަމުން އަންނަނީ ޅ. ނައިފަރު / ނޫކަނޑު، މުޙައްމަދު އަޙްޔާން ޙުސައިން (17އ) އެވެ. އޭނާ ވީނުވީއެއް ނޭނގި ގެއްލިފައިވާތީ އާއިލާގެ ފަރާތުން ފުލުހުންނަށް ރިޕޯޓްކޮށްފައިވަނީ އިއްޔެ ހަވީރު 5:30 އެހާކަންހާއިރުއެވެ.

އަޙްޔާން އެންމެ ފަހުން ފެނިފައިވަނީ މި ހިނގާ ސެޕްޓެމްބަރު މަހުގެ 27 ވަނަ ދުވަހު ކަމަށް އާއިލާއިން ފުލުހުންނަށް މަޢުލޫމާތު ދީފައިވެއެވެ. އޭގެ ފަހުން އޭނާގެ އެއްވެސް ޚަބަރެއް ނުވެގެން ފޯނަށް ގުޅުމުންވެސް ޖަވާބު ނުދޭތީ، އާއިލާގެ ފަރާތުން އޭނާ ހޯދުމަށް ކުރި މަސައްކަތުން މިހާތަނަށް އެއްވެސް ކުރިއެރުމެއް ލިބިފައެއް ނުވެއެވެ.

އަޙްޔާން ޙުސައިންއާ ބެހޭ އެއްވެސް މަޢުލޫމާތެއް ލިބިފައިވާ ފަރާތެއް ވާނަމަ، ޅ. ނައިފަރު ޕޮލިސް ސްޓޭޝަނުގެ ނަންބަރު 9792187 އަށް ނުވަތަ ފުލުހުންގެ ހޮޓްލައިން ނަންބަރު 3322111 އަށް ގުޅުއްވައި އެ މަޢުލޫމާތެއް ޙިއްސާކުރެއްވުމަށް ފުލުހުން ވަނީ އާންމުންގެ އެހީތެރިކަމަށް އެދިފައެވެ.