ގޯލްޑެން ފުޓްސަލް ޗެލެންޖުގެ ފ.އަތޮޅުގެ އެންމެ ފަހުގެ ޗެމްޕިއަން ބިލެއްދޫ ބަލިކޮށް ދަރަނބޫދޫއިން ފައިނަލްގެ ފުރަތަމަ ޖާގަ ކަށަވަރުކޮށްފިއެވެ. ދަރަނބޫދޫ ފައިނަލަށް ދަތުރު ކޮށްފައި މިވަނީ ރޭ ބިލެއްދޫއާއި ވާދަކުރި މެޗު 2-1 އިން ކާމިޔާބުކޮށްގެންނެވެ.

ރޭގެ މެޗުގެ ކުރިން މި މުބާރާތުގައި މި ދެޓީމު މިދިޔަ އަހަރު ބައްދަލުކުރި ދެމެޗުވެސް ކާމިޔާބު ކޮށްފައިވަނީ ބިލެއްދޫއިންނެވެ. މިދިޔަ އަހަރުގެ ފައިނަލުގައި މި ދެޓީމު ބައްދަލުކުރި މެޗު ބިލެއްދޫން ކާމިޔާބުކުރީ 5-4 ގެ ނަތީޖާއިންނެވެ. އެއާއެކު ރޭގެ މެޗު ބެލެވިފައިއޮތީ މިއަހަރުވެސް ފ.އަތޮޅު ބުރުގެ “ޑެތު ގޭމް” ގެ ގޮތުގައެވެ.

ރޭގެ މެޗުގައި ގޯލެއް ޖަހައި ފުރަތަމަ ލީޑު ނެގީ ބިލެއްދޫއިންނެވެ. ފުރަތަމަ ހާފް ނިމެން ހައެއްކަ މިނެޓަށް ވެފައި ވަނިކޮށް މި ލަނޑު ބިލެއްދޫއަށް ކާމިޔާބުކޮށްދިނީ ހިލޭ ޖެހުމަކުން ބިލެއްދޫގެ ކެޕްޓަން ނަދީފްއެވެ.  މެޗުގެ ނަތީޖާ ހަމަހަމަކުރި ގޯލު ދެވަނަ ހާފްގައި ޖަހައިދިނީ ދަރަނބޫދޫ ކެޕްޓަން މުޒްދާނެވެ. އޭގެ އިރުކޮޅެއް ފަހުން ދަރަނބޫދޫގެ ރަޔާންވަނީ ބިލެއްދޫ ކީޕަރު ކައިރިން ނައްޓާލާފައި ރީތިގޯލެއް ޖަހައިފައެވެ.

މި ނަތީޖާއާއެކު މެޗު ނިމިގެން ދިޔައިރު ފާހަގަކޮށްލަންޖެހޭ އެންމެ މުހިންމު އެއްކަމަކީ ޓީމުގެ ޒުވާން ކުޅުންތެރިންނަށް އޮތް އިތުބާރެވެ. ފީއަލި އަދި ދަރަނބޫދޫ މެޗަށްފަހު އަނިޔާގައި ހުރި ދަރަނބޫދޫ ޓީމުގެ މަހުފޫޒު ނުލައި ކުޅުނު މިމެޗުގައި ކޯޗު ޒުއްބަވަނީ ތަފާތު ގޭމް ޕްލޭނެއް މެޗަށް ގެނެސްފައެވެ. އެގޮތުން މަހުފޫޒުނެތް އިރު ޓީމުގެ އިތުބާރު ކުޅުންތެރިޔާ ސާޖިދަށްވެސް ފުރުސަތު ދީފައިވަނީ ދެވަނަ ހާފްގައެވެ. މެޗުގެ ގިނަވަގުތު ޑިފެންސިވް ޕްލެޔާރގެ ރޯލް މުޙައްމަދު ސުލައިމާނު އަދާކުރިއިރު ގޭމްޕްލޭންގެ ބޮޑުބައި އަދާކުރީ 20 އަހަރުން ދަށުގެ ކުޅުންތެރިންނެވެ.

މެޗުން ފެނިގެން ދިޔައީ ޒުވާން ކުޅުންތެރިންނަށް ކޯޗު ޒުއްބަ ދެއްކި އިތުބާރެވެ. މިރޭގެ ނަތީޖާއާއެކު ދަރަނބޫދޫ ކައިރިން ބިލެއްދޫ މޮޅުވުމުގެ ސިލްސިލާއަށް ނިމުން އައިސްފައިވާއިރު، ފޯރިގަދަ މިމެޗުގެ މޮޅު ކުޅުންތެރިއަކަށް ހޮވިފައިވަނީ ދަރަނބޫދޫގެ ކެޕްޓަން މުޒްދާން ޙަސަނެވެ.

މިމުބާރާތުގައި ފ.އަތޮޅު ބުރުގެ ތާވަލަށް ބަލާއިރު މިރޭ ލިބުނު މޮޅާއެކު ދަރަނބޫދޫވަނީ 9 ޕޮއިންޓާއެކު އެއްވަނައަށް އަރާފައެވެ. މަގޫދޫ 7 ޕޮއިންޓާއެކު ދެވަނައިގައި އޮތްއިރު ބިލެއްދޫ ތިންވަނައިގައި އޮތީ 4 ޕޮއިންޓާއެކުގައެވެ. މިއާއެކު މި 3 ޓީމަށްވެސް ބާކީ 1 މެޗު އޮތްއިރު ފައިނަލްގެ ޖާގަ އަދި ޔަގީންވީ ދަރަނބޫދޫއަށެވެ. މިމަހުގެ 25 ވަނަ ދުވަހުގެ ރޭ ދަރަނބޫދޫ މަގޫދޫ ބައްދަލުކުރާ މެޗު އެއްވަރުވެ، ނުވަތަ މަގޫދޫ މޮޅުވެއްޖެނަމަ ފައިނަލްގައި ބައްދަލުކުރާނީ މަގޫދޫ އަދި ދަރަނބޫދޫއެވެ. އެ މެޗުން މަގޫދޫ ބަލިވެ، އަދި އެރޭ ބިލެއްދޫއާއި ފީއަލީ މެޗުން ރަނގަޅު ލީޑެއްގައި ބިލެއްދޫ މޮޅުވެއްޖެނަމަ އަދިވެސް ފައިނަލްގައި ދަރަނބޫދޫއާއި ދެކޮޅަށް ކުޅުމުގެ ފުރުސަތު ބިލެއްދޫއަށް ލިބޭނެއެވެ. އެހެންކަމުން އަންނަ ހޮނިހިރު ދުވަހުގެ ރޭގައި އޮންނަ ފ.އަތޮޅުގެ މެޗުތައް ފޯރިގަދަވާނެ ކަމަށް ބެލެވެއެވެ.