ގޯލްޑަން ފުޓްސަލް ޗެލެންޖް 2025 ގައި ދަރަނބޫދޫން ކުޅުނު ދެވަނަ މެޗުގައި ފީއަލީ ބަލިކޮށް ފ.އަތޮޅު ތާވަލުގެ ދެވަނައަށް ދަރަނބޫދޫ ޖެހިލައިފިއެވެ.
މިއަދު ހަވީރު 17:00 ގައި ހުޅުމާލޭ ރެހެންދި ދަނޑުގައި ކުޅުނު މި މެޗު ދަރަނބޫދޫން ކާމިޔާބުކުރީ 2-1 ގެ ނަތީޖާއިންނެވެ. މި މެޗުގައި ފުރަތަމަ ލަނޑު ޖަހާފައިވަނީވެސް ދަރަނބޫދޫއިންނެވެ. މެޗު ފަށައިގެން 9 ވަނަ މިނެޓުގައި ދަރަނބޫދޫ ޓީމުގެ ޒުވާން ކުޅުންތެރިޔާ ރަޔާން ރިޔާޙް (17 އަހަރު) އެވެ.
ފުރަތަމަ ހާފް ނިމުމުގެ ކުރިން ފީއަލިންވަނީ މެޗުގެ ނަތީޖާ ހަމަހަމަ ކޮށްފައެވެ. އެގޮތުން ފީއަލީ ޓީމުގެ މާކިންވަނީ މެޗުގެ ފުރަތަމަ ހާފް ނިމެން ގާތްވެފައިވަނިކޮށް ފީއަލިން ފޮނުވާލި ފްރީކިކެއް ދަރަނބޫދޫ ޓީމުގެ ޑިފެންސުން ކުލިއަރކޮށްފަ ބައުންސް ވެގެން ނިކުތް ގަޑީގަ ގޯލުގެ މަތީކަނަށް ފޮނުވާލައިގެން ކާމިޔާބު ކޮށްފައެވެ.
ދެވަނަ ހާފް ފެށިގެން ދެޓީމުގެ ފަރާތުންވެސް ބަލާލަން ރީތި މޮޅުކުޅުމެއް ފެނިގެން ދިޔައެވެ. މިމެޗުގައި ދަރަނބޫދޫ މޮޅުވި ލަނޑު ޖަހައި ދިނީ ޓީމުގެ ޒުވާން ކުޅުންތެރިޔާ އާލިފް އަލީ (18 އަހަރު) އެވެ. އާލިފް އަށް މިލަނޑު ޖެހުމަށް އެސިސްޓް ފޯރުކޮށްދިން މުޙައްމަދު ސުލައިމާނުވަނީ މިމެޗުގައި ޓީމުގެ ޑިފެންސް ބެލެހެއްޓުމުގައި މުހިންމު ދައުރެއް އަދާކޮށްފައެވެ. ޓީމުގެ އެންމެ މުހިންމު ކުޅުންތެރިޔާ ސާޖިދު އަޙުމަދު ނުލައި ކުޅުނު މި މެޗުގައި މުޙައްމަދު، މަޙްފޫޒް އަދި މުޒްދާންވެސް ޑިފެންސް ކުރުމުގައި މުހިންމު ދައުރެއް އަދާކުރިތަން ފެނިގެން ދިޔައެވެ.
މި މެޗުގެ މޮޅު ކުޅުންތެރިއަކަށް ހޮވުނީ ދަރަނބޫދޫ ޓީމުގެ އާލިފް ޢަލީއެވެ
މި މެޗުގެ ނަތީޖާއާއެކު މި މުބާރާތުގެ ފ.އަތޮޅު ބުރުގައި ޕޮއިންޓް ތާވަލުގެ އެއްވަނައިގައި 7 ޕޮއިންޓާއެކު އޮތީ މަގޫދޫއެވެ. ދެމެޗު ކުޅެ މޮޅުވެގެން ލިބުނު 6 ޕޮއިންޓާއެކު ދަރަނބޫދޫ ދެވަނައިގައި އޮތްއިރު، ދެމެޗުން ލިބުނު 4 ޕޮއިންޓާއެކު އޮތީ މިމުބާރާތުގެ ފ.އަތޮޅުގެ އެންމެ ފަހުގެ ޗެމްޕިއަން ބިލެއްދޫއެވެ. ކުޅުނު ދެމެޗުންވެސް ޕޮއިންޓެއް ނުލިބި ތާވަލުގެ ހަތަރުވަނައިގައި ފީއަލީ އޮތްއިރު، ތިންމެޗު ކުޅެގެން ޕޮއިންޓެއް ނުލިބި ނިލަންދޫ އޮތީ ތާވަލުގެ ފުލުގައެވެ.
ގޯލްޑަން ފުޓްސަލް ޗެލެންޖުގައި ދަރަނބޫދޫ ޓީމުގެ ތިންވަނަ މެޗު އޮންނާނީ މިމަހުގެ 20 ވަނަ ދުވަހުގެ ރޭގަނޑު 23:00 ގައެވެ. މި މެޗުގައި ދަރަނބޫދޫ ނިކުންނާނީ އެންމެ ފަހުގެ ޗެމްޕިއަން ބިލެއްދޫއާ ދެކޮޅަށެވެ. މިދިޔަ އަހަރުގެ ފައިނަލްގައި މި ދެޓީމު ބައްދަލު ކުރި މެޗު ބިލެއްދޫން ކާމިޔާބުކުރީ 5-4 ގެ ނަތީޖާއިންނެވެ.
