މިހާރު މަގޫދޫގައި ކުރިއަށްދާ ފާފު ވޮލީ މުބާރާތުގައި އިއްޔަކުޅެވުނު 2 މެޗްވެސް ފީއަލީ ޓީމްތަކުން ކާމިޔާބުކޮށްފިއެވެ.
މިއަދު ހަވީރު ދަރަނބޫދޫއާއި ފީއަލީ ކުޅުނު ފިރިހެން ޑިވިޒަންގެ މެޗް ފީއަލިން ކާމިޔާބުކުރީ 3 ސެޓް 1 ސެޓުންނެވެ. ފުރަތަމަސެޓްގައި ކާމިޔާބުކުރީ ދަރަނބޫދޫއިންނެވެ. މިއީ މި މުބާރާތުގެ ތާރީޚުގައި ކުޅެވުނު މެޗުތަކުން ދަރަނބޫދޫއިން ސެޓެއް ހޯދި ފުރަތަމަ ފަހަރެވެ. 25 – 20 އިން ދަރަނބޫދޫ މިސެޓް ކާމިޔާބު ކުރިއިރު ފީއަލީން އެޓީމުގެ އަސްލު ފެންވަރުގައި ކުޅުމުގެ ތެރެއަށް އައުމުގައި އުނދަގޫވެގެން އުޅުނުކަން ފާހަގަ ކުރެވުނެވެ.
މެޗުގެ 2 ވަނަ ސެޓް ފަށައިގެން ފީއަލީން ރަނގަޅަށް ކުޅުމުގެތެރެއަށް އައިސް ވަރަށް ރަނގަޅަށް ކުޅެން ފެށިތަން ފެނުނެވެ. އެއާއިއެކު ދެން ކުޅެވުނު 3 ސެޓް 25 – 17، 25 – 19 އަދި 25 – 18 އިން ކާމިޔާބުކުރީ ފީއަލިންނެވެ. މިމެޗްގެ މޮޅުކުންތެރިއަކަށް ހޮވުނީ ފީއަލީ ކުޅުނު ފުރަތަމަ މެޗްގައިވެސް މޮޅުކުޅުންތެރިއަކަށް ހޮވުނު އެޓީމުގެ ޖާރޒީ ނަންބަރު 18 އާޒިމް މުޙައްމަދެވެ.
ފީއަލީއިން ވަނީ މުބާރާތުގައި މިހާތަނަށްކުޅުނު 2 މެޗްވެސް 3 ސެޓް 1 ސެޓުން ކާމިޔާބުކޮށްފައެވެ. ދަރަނބޫދޫ ކުޅުނު ފުރަތަމަމެޗްއިން ބަލިވެފައިވަނީ މަގޫދޫއާއިވާދަކޮށް ސީދާ 3 ސެޓުންނެވެ.
މިރޭ ކުޅެވުނު މި ދެޓީމުގެ އަންހެން ޑިވިޒަންގެ މެޗް ފީއަލިން ކާމިޔާބުކުރީ 3 ސެޓް 2 ސެޓުންނެވެ. ވާދަވެރި ފޯރިގަދަ ކުޅުމެއް ފެނިގެންދިޔަ ފުރަތަމަސެޓް ފީއަލިން ކާމިޔާބުކުރީ 25 – 22 އިންނެވެ. ދެވަނަ ސެޓް ވެސް ފީއަލީން ފެށީ ވަރަށް ރަނގަޅަށެވެ. އެހެންނަމަވެސް ސެޓް ފެށުނުތަނާ ފީއަލީ ޓީމް ލީޑް ކުރުމާއިއެކު ވަރަށް މޮޅުކުޅުމެއް ކުޅެމުންދިޔަ އެޓީމްގެ ކެޕްޓަން ރިފްދާއަށް އަނިޔާވެ ކުޅުމާއި ދުރަށް ދާންޖެހުނެވެ. ކެޕްޓަން ސީރިއަސް އަނިޔާއެއްވެ ކުއްލިގޮތަކަށް ކުޅުމުން ދުރަށް ދާންޖެހުމާއި، ފަރުވާއަށް މަގޫދޫ ސިއްޙީމަރުކަޒަށް ގެންދަން ޖެހުމާއިއެކު، ފީއަލީ ޓީމްގެ ޒުވާން ކުޅުންތެރިންނަށް އަލުން ގޭމްގެ ތެރެއަށް ވަދެ ކުޅުމަށް ސަމާލުކަން ދިނުމަށް ވަރަށްބޮޑަށް އުނދަގޫވެގެން އުޅުކަން ފާހަގަކުރެވުނެވެ. އެޔާއެކު ދަރަނބޫދޫއިން މެޗްގެ 2ވަނަ ސެޓާއި 3 ވަނަސެޓް ކާމިޔާބުކުރީ 25 – 10 އަދި 25 – 12 އިންނެވެ.
4 ވަނަސެޓްގައި ފީއަލީ ޓީމްގެ ސަޕޯޓަރުންދިން ހިތްވަރާއި ޓީމްގެ ތަޖުރިބާކާރު އޮފިޝަލުންގެ މަސައްކަތާއެކު އަލުން ގޭމްގެތެރެއަށް އައިތަން ފެނިގެންދިޔައެވެ. ހިތްވަރާއެކު ރަނގަޅު ކުޅުމެއް ދައްކައި 25 – 22 އިން ފީއަލީއިން 3 ވަނަ ސެޓް ކާމިޔާބުކޮށް 5 ވަނަ ސެޓަކަށް މެޗް ގެންދިޔައެވެ. އަދި ބޯކޮށް ވާރޭވެހުމުގެ ސަބަބުން 2 ފަހަރަކަށް ހުއްޓާލަންޖެހުނު 5 ވަނަސެޓްވެސް ކާމިޔާބުކޮށް ފީއަލީން މެޗްކާމިޔާބުކުރިއެވެ. 5 ވަނަސެޓް ނިމުނީ 15 – 11 އިންނެވެ. މެޗްގެ އެންމެ މޮޅުކުޅުންތެރިއަކަށް ހޮވިފައިވަނީ ފީއަލީ ޓީމްގެ ޖަރޒީ ނަންބަރު 19 ލީމް އެވެ.
ފިއަލީން ވަނީ މުބާރާތުގައި އެޓީމްކުޅުނު 2 މެޗްވެސް ކާމިޔާބުކޮށްފައެވެ. ފުރަތަމަ މެޗް އެޓީމުން ކާމިޔާބުކުރީ ބިލެއްދޫއާއި ވާދަ ކޮށް ސީދާ 3 ސެޓުންނެވެ. މިމެޗުން ބަލިވި ދަރަނބޫދޫއިން ވަނީ އެޓީމްކުޅުނު ފުރަތަމަމެޗް މަގޫދޫއާއިވާގަކޮށް 3 ސެޓް 1 ސެޓުން ކާމިޔާބުކޮށްފައެވެ.
ފާފް ވޮލީ މުބާރާތުގެ މާދަމާގެ މެޗްތަކުގައި ވާދަކުރާނީ ނިލަންދޫ އާއި މަގޫދޫއެވެ.
