ދަނިއުސް ފެންޓަސީ ލީގު 2023/24 ގެ ޑިސެމްބަރ މަހުގެ އެންމެ ގިނަ ޕޮއިންޓް ހޯދި މެނޭޖަރަކަށް އިބްރާހީމް ފަރީދު (ބަނަފްސާ އެފްސީ) ހޮވިއްޖެއެވެ.
ފެންޓަސީ ލީގުގެ މިސީޒަންގެ ކުޅުން ފެށުނު ފަހުން މިހާތަނަށް އެންމެ ގިނަ މެޗު ކުޅުނީ ޑިސެމްބަރު މަހުގައެވެ. އެގޮތުން އެމަހުގައި ޖުމުލަ 7 މެޗު ކުޅެފައިވެއެވެ. އިބްރާހީމް ފަރީދު ވަނީ މި ހަތްމެޗުން ޖުމުލަ 414 ޕޮއިންޓް ހޯދާފައެވެ. ފަރީދުއާ އެންމެ ގާތުން ޕޮއިންޓް ހޯދި މުޙައްމަދު ސުލައިމާނަށް 409 ޕޮއިންޓް ލިބިފައިވާއިރު 3 ވަނަ އަށް އެންމެ ގިނަ ޕޮއިންޓް ހޯދި މެނޭޖަރަކީ މަޙްމޫދު މުޙައްމަދު (އޯސީ) އެވެ.
މިދިޔަ އަހަރުގެ އޯގަސްޓް މަހުގައި ފެށުނު ފެންޓަސީ ލީގުގެ މިސީޒަންގެ އެންމެ ފަހު މެޗު ކުޅެވޭނީ މިއަހަރުގެ މެއި މަހުގެ 19 ވަނަ ދުވަހުގައެވެ. ދަނިއުސް ފެންޓަސީ ލީގުގެ މިހާތަނަށް ކުޅެފައިވާ ހުރިހާ މެޗެއްގެ ނަތީޖާތަކަށް ބަލާއިރު އެއްވަނައިގައި 1147 ޕޮއިންޓާއެކު އޮތީ މަޙްމޫދު މުޙައްމަދު (އޯސީ)ގެ “ޓެކްލް” ޓީމެވެ. ދެވަނައިގައި އިބްރާހީމް ފަރީދުގެ “ބަނަފްސާ އެފްސީ” އަށް ލިބިފައިވަނީ ޖުމުލަ 1122 ޕޮއިންޓެވެ.

ޑިސެމްބަރު މަހުގެ މެޗުތަކަށްފަހު އިންޓަނޭޝަނަލް މެޗުތަކެއް ކުޅުމަށް ޕްރިމިއަރ ލީގު މެދުކަނޑާލާފައިވާއިރު ދެން އެންމެ އަވަހަކަށް ލީގު މެޗެއް ކުޅުމަށް ތާވަލު ކުރެވިފައިވަނީ މިމަހުގެ 13 ވަނަ ދުވަހުގެ ހަވީރުގައެވެ. މި ހިނގާ ޖަނަވަރީމަހު ދެން އިތުރު މެޗެއް ކުޅެވޭނީ 30 ވަނަ ދުވަހުގައެވެ.
ފެންޓަސީ ޕްރިމިއަރ ލީގުގެ ދަރަނބޫދޫ ފޭނުންނަށް ބައިވެރިވެވޭ ގޮތަށް ކުރިއަށް ގެންދާ މި މުބާރާތުގެ ކޮންމެ މަހެއްގެ 1 ވަނަ ލިބޭ މެނޭޖަރަކަށް ދަނިއުސްއިން ވަނީ 500ރ ގެ ފައިސާގެ އިނާމު ދިނުމަށް ކަނޑައަޅާފައެވެ. އެހެން އަހަރުތަކާއި ތަފާތުކޮށް މިއަހަރު ދަނިއުސް ލީގުގައި ހޮވަނީ ހަމައެކަނި ކޮންމެ މަހެއްގެ އެއްވަނަ މެނޭޖަރެވެ.
މި ސީޒަންގައި ދަނިއުސް ފެންޓަސީ ލީގު ކުރިއަށް ގެންދެވެނީ ޚައިރު ފައުންޑޭޝަނާއި، އުމަސް ސްޕޯޓްސް ކުލަބުގެ އިތުރުން އަ ނޮޓް އިން ޓައިމްއާއި ކްރޮޕް ސްމާޓް ގެ ސްޕޮންސަރގެ އެހީގައެވެ.