ޚަބަރު

އެސްބީއައިގެ 150 މިލިއަން ޑޮލަރުގެ ޓީ-ބިލް އެއްކޮށް ދައްކައި ޚަލާޞްކޮށްފި؛ ބޭރުގެ ދަރަނި ދެއްކުމުގައި ޑިފޯލްޓެއް ނުވޭ!

22 ގަޑިއިރު ކުރިން

ކުރީގެ ސަރުކާރުން 2019 ވަނަ އަހަރު ބަޖެޓް ސަޕޯޓްގެ ގޮތުގައި ސްޓޭޓް ބޭންކް އޮފް އިންޑިއާ (އެސް.ބީ.އައި) މެދުވެރިކޮށް ނަގާފައިވާ 150 މިލިއަން ޔޫ.އެސް ޑޮލަރުގެ ބޮޑު ޓީ-ބިލް ދިވެހި ސަރުކާރުން މިއަދު އެއްކޮށް ދައްކައި ނިންމައިފިއެވެ.

🔗 ތަފްޞީލް ކިޔުމަށް: [ލިންކް]

މިއީ 2019 ވަނަ އަހަރުގެ ޑިސެމްބަރު މަހު ރާއްޖޭގެ ބަޖެޓަށް ބޭނުންވާ ފައިސާ ހޯދުމުގެ ގޮތުން އެސް.ބީ.އައި އަށް ވިއްކި ޓީ-ބިލްތަކެކެވެ. މީގެ ކުރިން ދެ ފަހަރެއްގެ މަތިން މި ދަރަނީގެ މުއްދަތު ވަނީ އިތުރުކޮށްދީފައެވެ.

އެއީ 2024 ޖޫން މަހު ދައްކަންޖެހުނު 50 މިލިއަން ޑޮލަރާއި، މިއަހަރުގެ ޖެނުއަރީ މަހު މުއްދަތު ހަމަވި 100 މިލިއަން ޑޮލަރެވެ. މިއަދަށް މުއްދަތު ހަމަވި ފަހުން 50 މިލިއަން ޑޮލަރު ސަރުކާރުން ދެއްކުމާއެކު، މި 150 މިލިއަން ޑޮލަރުގެ ޓީ-ބިލް މިހާރު ވަނީ އެއްކޮށް ޚަލާޞްވެފައެވެ.

މި ސަރުކާރުން ވެރިކަމާ ހަވާލުވިފަހުން މިއަދާ ހަމައަށް ބޭރުގެ ދަރަނީގެ ގޮތުގައި ޖުމްލަ 644 މިލިއަން ޔޫ.އެސް ޑޮލަރު (ގާތްގަނޑަކަށް 9.9 ބިލިއަން ރުފިޔާ) އަނބުރާ ދައްކާފައިވެއެވެ. އޭގެ ތަފްޞީލަކީ:

ދަރަނީގެ އަސްލު ފައިސާ: 481 މިލިއަން ޑޮލަރު
އިންޓްރެސްޓާއި އެހެނިހެން ފީ: 163 މިލިއަން ޑޮލަރު

މިނިސްޓްރީ އޮފް ފައިނޭންސުން ފާހަގަކުރެއްވި ގޮތުގައި، ދިވެހި ސަރުކާރުން ބޭރުގެ ދަރަނިތައް ދެއްކުމުގައި އެއްވެސް ޑިފޯލްޓެއް ނުވެ (ލަސްވުމެއް ނެތި)، ޤަވާޢިދުން ފައިސާ ދައްކަމުންދެއެވެ. މިއީ ރާއްޖޭގެ މާލީ ހީނަރުކަމުން އަރައިގަތުމަށް އަޅަމުންދާ ހަރުދަނާ ފިޔަވަޅުތަކުގެ ސާފު ހެތްކެއް ކަމަށް އެ މިނިސްޓްރީން ވިދާޅުވިއެވެ.

”މީގެ ސަބަބުން ބޭރުގެ މާލީ އިދާރާތަކުން ރާއްޖެއަށް ކުރާ އިތުބާރު ބޮޑުވެ، އިޤްތިޞާދީ ދެމެހެއްޓެނިވިކަން ކަށަވަރުވަމުންދޭ،“ ފައިނޭންސް މިނިސްޓްރީގެ ނޫސް ބަޔާނުގައިވެއެވެ.

ދައުލަތުގެ ޚަރަދުތައް ކުޑަކުރުމަށާއި، އާމްދަނީ އިތުރުކުރުމަށް ސަރުކާރުން ފަށާފައިވާ ފިސްކަލް ރިފޯމްތަކާއެކު، ކުރިއަށް އޮތް ތަނުގައި ރާއްޖޭގެ އިޤްތިޞާދީ ދުވެލި އިތުރަށް ހަލުވިވެގެންދާނެ ކަމުގެ ފުރިހަމަ ޔަޤީންކަން ފައިނޭންސް މިނިސްޓްރީން ދެއެވެ. އަދި ބޭރުގެ މާލީ އިދާރާތަކާ އެކު އޮންނަ ގުޅުންތައް ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި، ދައުލަތުގެ މާލީ ޙާލަތު ހަރުދަނާކުރުމުގެ މަސައްކަތް މެދުކެނޑުމެއްނެތި ކުރިއަށްދާނެ ކަމަށްވެސް އެ މިނިސްޓްރީން ވަނީ ވިދާޅުވެފައެވެ.