ބީޓެކް ހޮސްޕިޓާލިޓީ ދާއިރާގެ އަމަލީ ތަޖުރިބާ ހޯދުމަށް މަގޫދޫ ސްކޫލުގެ ދަރިވަރުން އަނގްސާނާ ވެލާވަރަށް!

އިޝްތިހާރު

ފ. މަގޫދޫ ސްކޫލުގައި ސާނަވީ ތަޢުލީމު ހާޞިލުކުރަމުންދާ ގްރޭޑް 10 އެއްގެ ދަރިވަރުން، ފަތުރުވެރިކަމާއި ވިޔަފާރީގެ ދާއިރާއިން ޢަމަލީ ތަޖުރިބާ ހޯދުމުގެ ގޮތުން ދެކުނު ނިލަންދެއަތޮޅުގައި ހިންގާ މަޝްހޫރު ”އަނގްސާނާ ވެލާވަރު“ ރިސޯޓަށް ތަޢުލީމީ ދަތުރެއް ކޮށްފިއެވެ.

މި ދަތުރަކީ ދަރިވަރުން ކުލާސްރޫމުގައި ހާޞިލުކުރާ ނަޒަރީ (Theoretical) ޢިލްމު، އަމަލީ މައިދާނާ ގުޅުވައިދިނުމުގެ މަޤްޞަދުގައި ކުރިއަށްގެންދިޔަ ދަތުރެކެވެ. މިގޮތުން، ބީޓެކް ހޮސްޕިޓާލިޓީ (BTEC Hospitality) އަދި ބިޒްނަސް ސްޓަޑީޒް މާއްދާތައް ކިޔަވާ ދަރިވަރުންނަށް، ފެންވަރުމަތީ ރިސޯޓެއްގެ އެތެރޭގެ ހިންގުންތައް (Internal Operations) ރޭވިފައިވާ ނިޒާމުތައް ވަރަށް ކައިރިން ބަލައިލުމުގެ ފުރުޞަތު ވަނީ ލިބިފައެވެ.

އިޝްތިހާރު

ދަތުރުގެ ތެރެއިން ދަރިވަރުން ވަނީ ރިސޯޓުގެ މައިގަނޑު އެކި ޑިޕާޓްމަންޓުތަކަށް ޒިޔާރަތްކޮށް، ދުނިޔޭގެ ފެންވަރުގެ މެހެމާންދާރީއެއް ފޯރުކޮށްދިނުމުގައި ގެންގުޅޭ އުޞޫލުތަކާއި، ކަސްޓަމާ ސަރވިސްގެ ހަމަތަކާއި، އަދި ރިސޯޓެއްގެ ދެމެހެއްޓެނިވި ވިޔަފާރީގެ މޮޑެލް ބައްޓަންކުރާ ގޮތްތަކާ ބެހޭގޮތުން ދާއިރާގެ ތަޖުރިބާކާރުންގެ ފަރާތުން މުހިންމު މަޢުލޫމާތުތަކެއް ހޯދާފައެވެ.

މި ދަތުރުގައި ރިސޯޓުގެ ފަރާތުން ދަރިވަރުންނާއި މުދައްރިސުންނަށް ވަނީ ވަރަށް ހޫނު މަރުޙަބާއެއް ކިޔާފައެވެ. އަދި ރިސޯޓުގައި ހޭދަކުރި ވަގުތުތަކުގައި އެތަނުގެ މެނޭޖްމަންޓާއި މުވައްޒަފުންގެ ފަރާތުން ފެނިގެންދިޔަ ގާތްކަމާއި، ބެހެއްޓެވި މާލިމީކަމުގެ ސަބަބުން ދަރިވަރުންނަށް ސުވާލުތައް ކުރުމަށާއި އޮޅުންފިލުވަން ބޭނުންވި ކަންކަން ދެނެގަތުމަށް ވަރަށް ފަހި މާޙައުލެއް ލިބިގެންދިޔައެވެ.

ދުނިޔޭގެ ފެންވަރުގެ މެހެމާންދާރީގެ އަމަލީ ނަމޫނާއެއް ރިސޯޓުގެ މުވައްޒަފުންގެ ފަރާތުން ފެނިގެންދިޔުމަކީ ދަރިވަރުންގެ ތަޖުރިބާ އިތުރަށް ފުރިހަމަވެގެންދިޔަ ކަމެއްގެ ގޮތުގައި މަގޫދޫ ސްކޫލުން ފާހަގަކުރެއެވެ.

މިފަދަ ޢަމަލީ ތަޢުލީމީ ދަތުރުތަކަކީ، ކިޔަވައިދިނުން އިތުރަށް މުއްސަނދިކޮށް، މުސްތަޤުބަލުގައި ދަރިވަރުން މަސައްކަތުގެ މައިދާނަށް ނުކުންނައިރު ބޭނުންވާނެ މުހިންމު ހުނަރުތަކާއި ވިސްނުންތައް ތަރައްޤީކުރުމަށް އެޅޭ ބާރެކެވެ. ޚާއްޞަކޮށް ރާއްޖޭގެ އިޤްތިޞާދުގެ މައިނާރު ކަމަށްވާ ފަތުރުވެރިކަމުގެ ދާއިރާއަށް ދަރިވަރުންގެ ލޯ ހުޅުވައިދިނުމަށް މިއީ ލިބުނު ވަރަށް ރަނގަޅު ފުރުޞަތެކެވެ.

ދަރިވަރުންގެ ތަޢުލީމީ ކުރިއެރުމަށް އިސްކަންދީ، މިފަދަ އަގުހުރި އަދި މަޢުލޫމާތުން ފުރިގެންވީ ފުރުޞަތެއް ފަހިކޮށްދެއްވި ކަމަށްޓަކައި، މަގޫދޫ ސްކޫލާއި، ނިލަންދެއަތޮޅު އުތުރުބުރީ މަގޫދޫ ކައުންސިލްގެ އިދާރާއިން ވަނީ އަނގްސާނާ ވެލާވަރު ރިސޯޓުގެ މެނޭޖްމަންޓަށް ޚާއްޞަ ޝުކުރެއް އަދާކޮށްފައެވެ.

އިޝްތިހާރު