ޤާނޫނަށް ބޯލެނބުމަށާއި ސާފުތާހިރުކަމަށް މަތިވެރީ ކައުންސިލްގެ އިލްތިމާސެއް!
ފާޠިމަތު ޢަރޫޝާ
އއ. މަތިވެރީގައި ފަތުރުވެރިކަމުގެ ވިޔަފާރި ފުޅާދާއިރާއެއްގައި ހިންގަމުންދާ ޗައިނާގެ ވިޔަފާރިވެރިންނާއި އެޖެންޓުންނަށް، ދިވެހިރާއްޖޭގެ ޤާނޫނުތަކާއި ޤަވާޢިދުތަކަށް ފުރިހަމައަށް ބޯލަނބައި، ބަރާބަރަށް ޢަމަލުކުރުމަށް އެ ރަށު ކައުންސިލުން އިލްތިމާސްކޮށްފިއެވެ.
ކައުންސިލުން މިކަމަށް އިލްތިމާސްކުރީ، ރަށުގެ ފަތުރުވެރިކަމުގެ ދާއިރާގައި ޙަރަކާތްތެރިވާ ޗައިނާގެ އިސް ވިޔަފާރިވެރިންނާއި އެޖެންޓުންނާއެކު ބޭއްވި ޚާއްޞަ މަޝްވަރާ ބައްދަލުވުމެއްގައެވެ.
މަތިވެރީ ކައުންސިލް އިދާރާގައި ބޭއްވުނު މި ބައްދަލުވުމުގައި، ރާއްޖޭގައި ހެދިފައިވާ ބިދޭސީ ވިޔަފާރިތަކާ ބެހޭ ޤާނޫނުތަކާއި ފަތުރުވެރިކަމުގެ ޤަވާޢިދުތަކުގެ އިމުގެ ތެރެއިން ވިޔަފާރީގެ މުޢާމަލާތްތައް ކުރިއަށް ގެންދިއުމުގެ މުހިންމުކަމުގެ މައްޗަށް ބަލައިލައި، އެ ކަންކަން ހަނދާންކޮށްދީފައިވެއެވެ.
މީގެ އިތުރުން، އެ ރަށަށް ޒިޔާރަތްކުރާ ބައެއް ޗައިނާ ފަތުރުވެރިންގެ ފަރާތުން، ރަށުގެ އިޖުތިމާޢީ މިންގަނޑުތަކާ ޚިލާފަށް ފެންނަމުންދާ ނޭދެވޭ ބައެއް ޢަމަލުތަކަށް އަލިއަޅުވާލައި، އެފަދަ ކަންކަން އިޞްލާޙުކުރުމަށް އެޖެންޓުންގެ ޙިއްޞާ ބޮޑުކަން ކައުންސިލުން ވަނީ ފާހަގަކޮށްފައެވެ.
މި ބައްދަލުވުމުގެ ތެރެއިން އެންމެ ބޮޑު އިސްކަމެއް ދެވުނު އެއް ކަމަކީ، ތިމާވެށީގެ ނަމޫނާ ރަށެއްގެ ގޮތުގައި ފާހަގަކުރެވޭ މަތިވެރީގެ ޤުދުރަތީ ވެއްޓާއި ސާފުތާހިރުކަން ދެމެހެއްޓެނިވި ގޮތެއްގައި ހިފެހެއްޓުމެވެ.
މިގޮތުން، ރަށުގެ ތިމާވެށި ޙިމާޔަތްކުރުމަށާއި ކުނީގެ މައްސަލައަށް ދާއިމީ ޙައްލެއް ހޯދުމަށްޓަކައި، ކައުންސިލާއި ޗައިނާގެ ވިޔަފާރިވެރިން ގުޅިގެން ކުރެވިދާނެ ޢަމަލީ މަސައްކަތްތަކާ ބެހޭގޮތުން ދެފަރާތުގެ މެދުގައި ފުޅާ ދާއިރާއެއްގައި ޚިޔާލު ބަދަލުކުރެވުނެވެ.
މި ބައްދަލުވުން ނިމިގެންދިޔައީ، ރަށުގެ އިޤްތިޞާދީ ދިރުމާ ގުޅިފައިވާ ފަތުރުވެރިކަމުގެ ސިނާޢަތް ކުރިއެރުވުމުގައި، ޤާނޫނީ ހަމަތަކުގެ މަތިން ކައުންސިލަށް ފުރިހަމަ އެއްބާރުލުން ދޭނެކަމުގެ ޔަޤީންކަން ޗައިނާގެ ވިޔަފާރިވެރިންގެ ފަރާތުން އަރުވަމުންނެވެ.
ގުޅުންހުރި
ޚިޔާލުތައް (0)