ޚާއްސަ ނޯޓް: މި ރިޕޯޓަކީ ދަރަނބޫދޫ ސްކޫލުގެ ދަރިވަރުންގެ ޤުލްޝަނުގެ އިންޓަހައުސް މުބާރާތްތަކުގެ މެއިން ސްޕޮންސަރ ކުރުމުގެ އެއްބަސްވުމުގައިވާ ގޮތުގެ މަތީން، ދަރަނބޫދޫ ސްކޫލުގައި ތަޢުލީމް ޙާސިލްކުރަމުންދާ ދަރިވަރު، ބައްޝާރު ޢަބްދުއް ޞަމަދު ލިޔެފައިވާ ރިޕޯޓެކެވެ.

އެހެން އަހަރުތަކެކޭވެސް އެއްގޮތަށް މި ހިނގާ އެކަޑެމިކް އަހަރުގެ ދަރަނބޫދޫ ސުކޫލުގެ އިންޓަރހައުސް ފުޓުބޯޅަ މުބާރާތް ވަރަށް ކާމިޔާބު ކަމާއެކު ކުރިއަށް ގޮސް ނިންމާލައިފިއެވެ. މި އަހަރުގެ މުބާރާތުގައި ޖޫނިއަރ ބައިގައި ކުޅެވުނީ ބަޔަކަށް އަށް ކުޅުންތެރިން އަރުވައިގެންނެވެ. މި އުމުރު ފުރައިގައި ހިމެނެނީ ގުރޭޑް ހަޔަކުން ދަށުގެ ދަރިވަރުންނެވެ. މީގެ އިތުރުން ސީނިއަރ ބައިގައި މި އަހަރުގައި ކުޅެވުނީ ފުޓްސަލްމުބާރާތެކެވެ. މި ދެ މުބާރާތް މިހާ ކާމިޔާބު ކަމާއެކު ނިންމާލެވުނީ އެތައް ބައެއްގެ ސްޕޮންސަރާ ދީލަތި އެހީތަކުގެ ސަބަބުންނެވެ. މި މުބާރާތްތަކުގެ މެއިން ސްޕޮންސަރަކީ ދަނިއުސް އެވެ. ކޯ ސްޕޮންސަރަކީ ހުޅުމާލެ ޔޫތު އެން ސްޕޯރޓްސް ކުލަބުގެ ސްޕޯރޓްސް އެކަޑަމީ އެވެ. އަދި އިތުރު ސްޕޮންސަރުންގެ ތެރޭގައި ދަރަނބޫދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީ، އެޑް ޖަމިއްޔާ،މަލްޓިކަލާރ އަދި ވިލާ އެޑަމް ހިމެނެއެވެ.

މިއަހަރުގެ މުބާރާތް ފެށުނީ 23 ޖަނަވަރީ 2023 ވީ ހޯމަ ދުވަހުއެވެ. އެދުވަހުގައި ވަނީ ދެމެޗެއް ކުޅެވިފައެވެ.

މި މުބާރާތުގެ ފުރަތަމަ މެޗެއްގެ ގޮތުގައި ކުޅެވުނީ ޖޫނިއަރ ގުރޫޕުގެ ހަލަވެލި ހައުސް އާއި ކުރެދި ހައުސް އެވެ. މި މެޗު ނިމިގެން ދިޔައީ އެކެއް އެކަކުން ދެޓީމު އެއްވަރުވެގެންނެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވުނީ ކުރެދިހައުސްގެ ތުލްސަމް އަހުމަދު ޒަމީރެވެ.

ދެވަނަ މެޗެއްގެ ގޮތުގައި އޮތީ ސީނިއަރ ގުރޫޕުގެ މެޗެކެވެ. މި މެޗު ނިމިގެން ދިޔައީ އަށެއް އަށަކުން ދެ ޓީމު އެއްވަރު ވެގެންނެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވުނީ މަދޮށި ހައުސްގެ މުޒްދާން ހަސަނެވެ.

މި މުބާރާތުގެ ދެވަނަ ދުވަހުގެ ޖޫނިއަރ ބައިގައި ބައްދަލު ކުރީ ކުރެދި ހައުސް އާއި މަދޮށި ހައުސް އެވެ. މި މެޗު ނިމިގެން ދިޔައީ އެކެއް ސުމަކުން ކުރެދި ކުރި ހޯދައިގެންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ކުރެދި ހައުސްގެ އަތޫފް އާދަމެވެ.

މިދުވަހުގެ ސީނިއަރ ބައިގައި ބައްދަލު ކުރީ ކުރެދިހައުސް އާއި ހަލަވެލި ހައުސް އެވެ. މި މެޗު ނިމިގެންދިޔައީ އެކެއް އެކަކުން ދެޓީމު އެއްވަރު ވެގެންނެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވުނީ ކުރެދި ހައުސްގެ މުޙައްމަދު ދާއިންއެވެ.

މުބާރާތުގެ ތިންވަނަ ދުވަހުގެ ޖޫނިއަރ ބައިގައި ބައްދަލުކުރީ ހަލަވެލި ހައުސް އާއި މަދޮށި ހައުސް އެވެ. މި މެޗު ނިމިގެން ދިޔައީ ހަތަރެއް ސުމަކުން ހަލަވެލި ހައުސް ކުރި ހޯދައިގެންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ހަލަވެލި ހައުސްގެ ކީޕަރު މާޒިން މުޙައްމަދެވެ.

މި ދުވަހުގެ ސީނިއަރ ބައިގައި ބައްދަލުކުރީ ކުރެދި ހައުސް އާއި މަދޮށި ހައުސްއެވެ. މި މެޗު ހަތެއް ތިނަކުން ކާމިޔާބު ކުރީ މަދޮށި ހައުސްއެވެ. މި މެޗުގެ މޮޅު ކުޅުންތެރިޔަކަށް ހޮވުނީ މަދޮށި ހައުސްގެ މުޒްދާނެވެ.

މިއާއެކު މުބާރާތުގެ ފައިނަލަށް ޖޫނިއަރ ބައިން ދަތުރުކުރީ ހަލަވެލި ހައުސް އާއި ކުރެދި ހައުސް އެވެ. އަދި ސީނިއާރ ބައިގެ ފައިނަލަށް ދަތުރު ކުރީ މަދޮށި ހައުސް އާއި ހަލަވެލި ހައުސްއެވެ.

މި މުބާރާތުގެ ޖޫނިއަރ ބައިގެ ފައިނަލް އޮތީ 26 ޖަނަވަރީ 2023 ވީ ބުރާސްފަތި ދުވަހުގެ ހަވީރު އެވެ. އަދި ސީނިއާރ ބައިގެ ފައިނަލް އޮތީ އެދުވަހުގެ ރޭގަނޑުގައެވެ.

ޖޫނިއަރ ބައިގެ ފައިނަލް މެޗު.

މި މުބާރާތުގެ ފައިނަލުގައި ބައްދަލުކުރީ ހަލަވެލި ހައުސް އާއި ކުރެދި ހައުސްއެވެ.

މި މެޗު ފެށިގެން ދިޔައިރު ދެޓީމުގެ ފަރާތުންވެސް ފެނިގެން ދިޔައީ ވަރަށް ވާދަވެރި

ކުޅުމެކެވެ. މެޗުގެ ފުރަތަމަ ހާފުގެ 10 ވަރަކަށް މިނެޓު ކުޅެވިފައިވަނިކޮށް ހަލަވެލި ހައުސްގެ ޖާރޒީ ނަންބަރު 97 އަލްވިން އަސްލަމް ހަލަވެލި ހައުސްއަށް ގޯލެއްޖަހައިދިނެވެ. މި ނަތީޖާގައި ވަނިކޮށް މެޗުގެ ފުރަތަމަ ހާފު ނިމިގެން ދިޔައެވެ.

ދެވަނަ ހާފު ފެށިގެން ކުޅެވެމުންދިޔައިރު ކުރެދި ހައުސްގެ ކުޅުންތެރިން ވަނީ ގޯލެއް ޖެހުމަށް ވަރަށް މަސައްކަތް ކޮށްފައެވެ. ނަމަވެސް، ހަލަވެލި ހައުސްގެ ޑިފެންސް ލައިނުގެ ހުށިޔާރުކަމާއެކު ކުރެދިހައުސް ވަނީ ގޯލެއްޖެހޭ ގޮތް ނުވެފައެވެ. ކުރެދި ހައުސް އިން ވަނީ އެންމެ ފަހުވަގުތާ ހަމަޔަށް ވެސް ހިތްވަރު އެލުވައިނުލައި މަސައްކަތް ކޮށްފައެވެ.

ނަމަވެސް، މެޗު ނިމިގެން ދިޔައީ އެކެއް ސުމަކުން ހަލަވެލި ހައުސް މެޗު ކާމިޔާބު ކޮށްގެންނެވެ.

މި މެޗުގެ މޮޅު ކުޅުންތެރިޔަކަށް ހޮވުނީ ހަލަވެލި ހައުސްގެ ގޯލްކީޕަރު މާޒިން މުޙައްމަދެވެ.

ސީނިއާރ ބައިގެ ފައިނަލް މެޗު.

މި މެޗުގައި ބައްދަލުކުރީ ހަލަވެލި ހައުސްއާއި މަދޮށި ހައުސް އެވެ.

މި މެޗު ފެށިގެން ކުޅެވެމުންދިޔައިރު ދެޓީމުގެ ފަރާތުންވެސް ފެނުނީ ގާގްގަނޑަކަށް ހަމަހަމަ ކުޅުމެކެވެ.ފުރަތަމަ ހާފުގެ ދެބައިކުޅަ އެއްބައި ކުޅެވިފައިވަނިކޮށް ލިބުނު ފުރުސަތެއްގައި ހަލަވެލި ހައުސްގެ ކެޕްޓަން ޖާރޒީ ނަންބަރު 30 އާލިފް އަލީ ވަނީ ގޯލެއް ކާމިޔާބުކޮށްފައެވެ. މި އާއެކު، ސަޕޯޓަރުންގެ އަޑު ގަދަ ވާން ފެށިއެވެ. ނަމަވެސް، މަދޮށި ހައުސްއިން ވަނީ ހިތްވަރު އެލުވައި ނުލައި ކުޅެފައެވެ. ފުރަތަމަ ހާފު ނިމެން އުޅެނިކޮށް މަދޮށި ހައުސްގެ ކެޕްޓަން ޖާރޒީ ނަންބަރު 7 މުޒްދާން މަދޮށި ހައުސް އަށް ގޯލެއް ޖަހައިދީ މެޗުގެ ނަތީޖާ އެއްވަރު ކޮށްދިނެވެ. މި ނަތީޖާ އާއެކު ފުރަތަމަ ހާފު ނިމިގެން ދިޔައެވެ.

ދެވަނަ ހާފު ފެށިގެން ދެޓީމުން ވެސް ކުޅެވެމުންދިޔައީ މެޗުގަ އިތުރު ގޯލެއް ޖަހައި މެޗު އަނބުރައިލުމުގެ ނިޔަތުގައެވެ. މި ހާފުގައި 10 ވަރަކަށް މިނެޓުފަހުން ލިބުނު ރަނގަޅު ފުރުސަތެއްގައި މުޒްދާން ވަނީ އިތުރު ގޯލެއް ޖަހައިދީ މެޗުގައި ފުރަތަމަ ފަހަރަށް މަދޮށްޓަށް ލީޑު ނަގައިދީފައެވެ. މި ނަތީޖާގައި ކުޅެވެމުން ދަނިކޮށް ހާފު ނިމެން ކައިރިވެފައިވަނިކޮށް ހަލަވެލިން އަނެއްކާވެސް ގޯލެއް ކާމިޔާބު ކުރިއެވެ. މި ގޯލު ވެސް ހަލަވެލި ހައުސް އަށް ކާމިޔާބު ކޮށްދިނީ އެ ޓީމުގެ ކުރީގެ ގޯލުވެސް ޖަހައިދިން އާލިފް އެވެ. މި ނަތީޖާ އާއެކު ދެވަނަ ހާފު ނިމިގެން ދިޔައެވެ.

މެޗު އެއްވަރު ވުމާއެކު ދެން އޮތީ ޕެނަލްޓީ ޖެހުމެވެ.

ފުރަތަމަ ޕެނަލްޓީ ޖަހަން ޖެހުނީ ހަލަވެލި ހައުސްއިންނެވެ. މި ޕެނަލްޓީ ޖަހައިދިނީ އާލިފްއެވެ. މަދޮށީގެ ފުރަތަމަ ޕެނަލްޓީ ޖަހައިދިނީ ރަޔާން އެވެ. ހަލަވެލި ހައުސްގެ ދެވަނަ ޕެނަލްޓީ އެޓީމަށް ކާމިޔާބު ކޮށްދިނީ މައީޝް އެވެ. މަދޮށި ހައުސްގެ ދެވަނަ ޕެނަލްޓީ ޖެހީ އެޓީމުގެ އާބިދުއެވެ. އާބިދު ޖެހި ޕެނަލްޓީ ހަލަވެލި ހައުސްގެ ކީޕަރު ވަނީ ހުށިޔާރުކަމާއެކު ދިފާޢުކޮށްފައެވެ. މީގެ އިތުރުން، ހަލަވެލީގެ ތިންވަނަ ޕެނަލްޓީ ކާމިޔާބު ކޮށްދިނީ އެޓީމުގެ ޝާއިން އެވެ. މި އާއެކު،މަދޮށީގެ ތިންވަނަ ޕެނަލްޓީ ކާމިޔާބު ކޮށްދިނީ އަނޫފް އެވެ. ހަލަވެލި ހައުސްގެ ހަތަރުވަނަ ޕެނަލްޓީ ޖެހީ އެޓީމުގެ ކީޕަރު ނާއިފް އެވެ. މި ޕެނަލްޓީ މަދޮށި ހައުސްގެ ކީޕަރު ވަނީ ދިފާޢުކޮށްފައެވެ. މަދޮށި ހައުސްގެ ހަތަރުވަނަ ޕެނަލްޓީ ޖެހީ އެޓީމުގެ ޒައިދާން އެވެ. މި ޕެނަލްޓީ ދިޔައީ އަރިމަތީ ދަނޑި ކައިރިން ބޭރަށެވެ. މީގެ އިތުރުން،މި މެޗު ހަލަވެލި ހައުސް އަށް ކާމިޔާބު ކޮށްދިން ޕެނަލްޓީ އެޓީމަށް ޖަހއިދިނީ އެ ޓީމުގެ އަލީ އިފްޙާމެވެ. މި ޕެނަލްޓީ އާއެކު މެޗު ނިމިގެން ދިޔައެވެ.

މި މެޗު ނިމުނީ ހަޔެއް ހަތަރަކުން ހަލަވެލި ކުރީގަ އޮވެގެންނެވެ.

މި މެޗުގެ މޮޅު ކުޅުންތެރިޔަކަށް ހޮވުނީ ހަލަވެލި ހައުސްގެ އާލިފް އަލީއެވެ.

ޖޫނިއަރ މުބާރާތުގެ ވަނަތައް

• އެންމެ މޮޅު ފަސްކުޅުންތެރިން
• ހަލަވެލި ހައުސްގެ މާޒިން މުޙައްމަދު ނަސީމް
• ހަލަވެލި ހައުސްގެ އަލްވިން އަސްލަމް
• ހަލަވެލި ހައުސްގެ ރާހިލް ހުސެއިން ސިޔާމް
• ކުރެދި ހައުސްގެ ތުލްސަމް އަހުމަދު ޒަމީރު
• މަދޮށި ހައުސްގެ ޒަލޫފް ހަސަން ޒާހިރު
• އެންމެ މޮޅު ކުޅުންތެރިޔާ
• ހަލަވެލި ހައުސްގެ މާޒިން މުޙައްމަދު ނަސީމް
• އެންމެ ގިނަ ގޯލު ޖެހި ކުޅުންތެރިޔާ
• ހަލަވެލި ހައުސްގެ މާޒިން މުޙައްމަދު ނަސީމް
• އެންމެ އުންމީދީ ކުޅުންތެރިޔާ
• ހަލަވެލި ހައުސްގެ މަޢާލް މޫސާ
• ސީނިއަރ މުބާރާތުގެ ވަނަތައް
• އެންމެ މޮޅު ފަސްކުޅުންތެރިން
• މަދޮށި ހައުސްގެ މުޒްދާން ހަސަން
• މަދޮށި ހައުސްގެ ރަޔާން ރިޔާޙް
• ހަލަވެލި ހައުސްގެ އާލިފް އަލީ
• ހަލަވެލި ހައުސްގެ ނާއިފް އިބްރާޙިމް ޒަކީ
• ކުރެދި ހައުސްގެ މުޙައްމަދު ދާއިން
• އެންމެ މޮޅު ކުޅުންތެރިޔާ
• މަދޮށި ހައުސްގެ މުޒްދާން ހަސަން
• އެންމެ ގިނަ ގޯލު ޖެހި ކުޅުންތެރިޔާ
• މަދޮށި ހައުސްގެ މުޒްދާން ހަސަން
• އެންމެ އުންމީދީ ކުޅުންތެރިޔާ
• ހަލަވެލި ހައުސްގެ ޝާއިން އަލީ