ދަރަނބޫދޫ ސްކޫލުގެ ދަރިވަރުންގެ ޤުލްޝަނުން އިންތިޒާމްކޮށްގެން ކުރިއަށް ގެންދިއުމަށް ހަމަޖެހިފައިވާ އިންޓަހައުސް ފުޓްސަލް އަދި ނެޓްބޯޅަ މުބާރާތުގެ މެއިން ސްޕޮންސަރަކަށް ދަނިއުސް ހަމަޖެހިއްޖެއެވެ.
ދަރަނބޫދޫ ސްކޫލުގެ ހުރިހާ އުމުރުފުރާއެއްގެ ދަރިވަރުންނަށް އަމާޒުކޮށްގެން ކުރިއަށް ގެންދެވޭ މި މުބާރާތްތަކަކީ ކިޔެވުމުގެ އިތުރުން ދުޅަހެޔޮ ސިއްޙަތެއްގައި ދަރިވަރުން ބެހެއްޓުމާއި ދަރިވަރުންގެ ކިބައިގައި ރަނގަޅު އަޚްލާޤުތައް ހިފެހެއްޓުމާއެކު ދަރިވަރުންގެ މެދުގައި ގުޅުން ވަރުގަދަ ކުރުމުގެ އަޒުމުގައި ކޮންމެ އަހަރަކުވެސް އޮންނަ މުބާރާތެކެވެ.
މި މުބާރާތްތަކުގެ މެއިން ސްޕޮންސަރ ދަނިއުސް އިން ކޮށްފައިވަނީ ދަރިވަރުންގެ ޤުލްޝަނުން ހުށަހަޅާފައިވާ އަގަށެވެ. މީގެ އިތުރުން ސްޕޮންސަރ ކުރުމަށް ބޭނުންވެގެން ދަނިއުސްއިން ހުށަހެޅި ޕްރޮޕޯސަލް ފޯމުގައި މިއަގަށް އެއްހާސް ރުފިޔާ އިތުރުކުރުމުގެ ފުރުސަތެއް ދަނިއުސްގެ ފަރާތުން ދަރިވަރުންގެ ޤުލްޝަނަށްވަނީ ފަހިކޮށްދީފައެވެ.
މިފަދަ އޮފާރއެއް ދަނިއުސްއިން ހުށަހެޅުމުގެ މައިގަނޑު މަޤްސަދަކީ ލިޔުންތެރިކަމަށް ސްކޫލްކުދިން ޝަޢުޤުވެރިކުރުމާއި އުފެއްދުންތެރިކަން އިތުރުކުރުމަށް ސްކޫލުގެ މާޙައުލުން ބޭރުން އެކުދިންނަށް ފުރުޞަތެއް ފަހިކޮށް ދިނުމެވެ. އެގޮތުން މި މުބާރާތުގެ މެޗްތަކާއި ގުޅިގެން ޚަބަރު އުފައްދައި އެ ޚަބަރެއް ލިޔުމުން ދަނިއުސްއަށް ފޮނުވުމުން އެދަރިވަރެއްގެ ނަމުގައި ނުވަތަ ދަރިވަރުންގެ ޤުލްޝަނުގެ ނަމުގައި އެ ޚަބަރެއް މި ވެބްސައިޓްގައި ޝާއިއުކުރުމަށް ފުރުސަތުވަނީ ދެވިފައެވެ. އަދި މުބާރާތް ނިމުމުން މުބާރާތުގެ ޚާއްސަ ރިޕޯޓެއް ހުށަހެޅުމުން އެކުދިން ކުރި މަސައްކަތަށް ދަނިއުސްއިން އަގުދެވޭނެއެވެ.
ދަރިވަރުންގެ ޤުލްޝަނުގެ އިންޓަހައުސް ފުޓްސަލް މުބާރަތް މިއަދު ހަވީރު ފެށުމަށް ހަމަޖެހިފައިވާއިރު، މުބާރާތް ކުރިއަށްދާނީ ކުޑަކުދިންނާއި ބޮޑެތި ކުދިންނަށް ވަކިންނެވެ. އެގޮތުން ކޮންމެ ދުވަހަކުވެސް ދެ ގުރޫޕުގެ ކުދިންނަށް އެއް މެޗް ކުޅުމަށް ހަމަޖެހިފައިވެއެވެ.
މި މުބާރާތުގެ ފައިނަލް މެޗްތައް ކުޅުމަށް ހަމަޖެހިފައިވަނީ މި ހަފްތާގެ ބުރާސްފަތި ދުވަހުގެ ހަވީރުގައެވެ.
