ފުއްޓަރު ސްޕޯޓްސް ކުލަބުން ދަރަނބޫދޫގެ ކުޅިވަރު ޓީމުތަކަށް އަމާޒުކޮށްގެން ކުރިއަށް ގެންދިޔަ ޖަޒީރާ ލީގު24 ފުޓްސަލް މުބާރާތުގެ ޗެމްޕިއަންކަން ވެސްޓް ސިޓީން ހޯދައިފިއެވެ. މިއީ މިމުބާރާތުގެ ޗެމްޕިއަންކަން ވެސްޓް ސިޓީން ހޯދި ފުރަތަމަ ފަހަރެވެ.
ވެސްޓް ސިޓީން ޗެމްޕިއަންކަން ހޯދީ ފައިނަލުގައި ބީސީ ސްޕޯޓްސް ފަސޭހަކަމާއެކު ބަލިކޮށްގެންނެވެ. ފައިނަލަށް ނިކުތްއިރު ވެސް އަނިޔާގެ މައްސަލަތައް ބޮޑު ބީސީގެ މައްޗަށް ވެސްޓުން ކާމިޔާބު ހޯދީ 4-1 ގެ ނަތީޖާއަކުންނެވެ.
މި މެޗުގައި ވެސްޓުގެ މުޙައްމަދު ނަސީރުވަނީ ހެޓްރިކެއް ހަދާފައެވެ. އެޓީމުގެ ރިޝްވާނު ޓީމަށް އިތުރު ގޯލެއް ކާމިޔާބު ކޮށްދިން އިރު، ބީސީން މިމެޗުގައި ޖެހި ހަމައެކަނި ގޯލު ޖަހާފައިވަނީ ދާއިންއެވެ.
ޖަޒީރާ ލީގު މިހާތަނަށް ހަތަރު ފަހަރެއްގައި ބާއްވާފައިވާއިރު، މި މުބާރާތުގެ ޗެމްޕިއަންކަން އެއްވެސް ޓީމަކަށް ދެފަހަރަކު ހޯދިފައެއް ނުވެއެވެ. މީގެ ކުރިން މިމުބާރާތުގެ ޗެމްޕިއަންކަން ހޯދާފައިވަނީ ގަޓްސިޓީ، އެޑް ޖަމިއްޔާ އަދި ބީސީ ސްޕޯޓްސް ކުލަބުންނެވެ. ބީސީ ވަނީ މިމުބާރާތުގެ ހުރިހާ ފައިނަލެއްގައިވެސް ކުޅެފައެވެ.