ގޯލްޑަން ފުޓްސަލް ޗެލެންޖު 2025 ގެ ޒޯން ފަހެއްގެ ފައިނަލަށް ދަރަނބޫދޫއާއި ކުޑަހުވަދޫ ދަތުރު ކޮށްފިއެވެ. މިހާރު ކުރިއަށްދާ ޒޯންބުރުގެ ފަހު މެޗުގައި މިރޭ މި ދެޓީމު ބައްދަލުކުރިއިރު 6-2 ގެ ބޮޑު ތަފާތަކުން މެޗު ކާމިޔާބުކުރީ ކުޑަހުވަދޫންނެވެ. މެޗުން ބަލިވިނަމަވެސް، ދަރަނބޫދޫ ފައިނަލަށް ދަތުރުކުރީ މިރޭ ކުޅެވުނު ޒޯން ފަހެއްގައި މުލަކަށް މޮޅު ނުވެވުމުންނެވެ.
ޒޯން ފަހެއްގެ ފަހު މެޗުތައް މިރޭ ފެށިއިރުވެސް މި ޒޯނުގެ މީމު އަތޮޅު ޗެމްޕިއަން މުލަކަށް މުބާރާތުގެ ފައިނަލަށް ދަތުރުކުރެވޭނެ އެއްވެސް ފުރުސަތެއް ނެތެވެ. މުލަކު ކައިރިން މޮޅުވެގެން ދިއްގަރަށް ފައިނަލަށް ދިއުމުގެ ފުރުސަތު އޮތީ ދަރަނބޫދޫ މިރޭ ކުޅުން މެޗުން ބަލިވެގެންނެވެ. އެހެންނަމަވެސް މުބާރާތުން ކަޓާފައިއޮތް ދިއްގަރު އަތްދަށުވެ މުލަކަށް ފުރުސަތު ގެއްލުނީއެވެ. އެ މެޗުގައި މުލަކު ބަލިވެފައިވަނީ 2-1 އިންނެވެ.
ދަރަނބޫދޫއާއި ކުޑަހުވަދޫ މިރޭ ބައްދަލުކުރި މެޗުގައި ފުރަތަމަ ލީޑު ނެގީވެސް ކުޑަހުވަދޫންނެވެ. މި މެޗުގައި ކުޑަހުވަދޫއަށް ލަނޑުތައް ޖަހައިދިނީ ޖުމައިލް ޖަމީލް (ޖުމްބެ) އާއި ހާރޫން އިބްރާހީމާއި، ހުސައިން އައިހަމްގެ އިތުރުން ހުސައިން އިފްހާމެވެ. ދަރަނބޫދޫގެ ލަނޑުތައް ޖެހީ މުއައްލިމް އުމަރާއި ސާޖިދު އަޙްމަދެވެ.
މިރޭގެ ނަތީޖާއާއެކު ކުޑަހުވަދޫ މިވަނީ މިމުބާރާތުގެ ޒޯން ފައިނަލަށް ޖެހިޖެހިގެން ތިންވަނަ ފަހަރަށް ދަތުރުކޮށްފައެވެ. އަދި ފާއިތުވީ ދެއަހަރުވެސް ޒޯން ޗެމްޕިއަންކަން ހޯދާފައިވާ ކުޑަހުވަދޫ ޓީމު މިއަހަރުގެ ފައިނަލަށް ނިކުންނާނީ ޖެހިޖެހިގެން ތިންވަނަ ފަހަރަށް ޒޯން ތަށި ކާމިޔާބުކުރުމުގެ އަޒުމުގައެވެ.
މިރޭގެ މެޗަށްފަހު މުބާރާތުގެ ޕީއާރު ޕާޓްނަރަށް ދިން އިންޓަވިއުގައިވެސް ކުޑަހުވަދޫ ޓީމުގެ ކެޕްޓަން ޖުމްބެ އެކަން ފާހަގަކުރިއެވެ. އޭނާ ފާހަގަކުރިގޮތުގައި ކުރީއަހަރަށްވުރެ މިއަހަރުގެ އަތޮޅު ބުރާއި ލީގުބުރު ދިޔައީ ވަރަށް އުދަގޫކޮށް ކަމަށެވެ. އަދި މިރޭ ދަރަނބޫދޫ ބަލިވިނަމަވެސް، އެޓީމު ފައިނަލަށް އަންނާނީ މިރޭ ހެދުނު ގޮސްތައް ރަނގަޅުކޮށްގެން ކަމަށްވާތީ ފައިނަލް މެޗު އެއްވެސް ވަރަކަށް ފަސޭހައެއްނުވާނެއެވެ.
މިމުބާރާތުގެ ފައިނަލް މެޗު އޮންނާނީ އަންނަ އަންގާރަ ދުވަހުގެ ރޭ 21:00 ގައެވެ.
