ގޯލްޑަން ފުޓްސަލް ޗެލެންޖުގެ ޒޯން 5 ގެ ބުރުގައި ދަރަނބޫދޫ އަދި މ. މުލަކު މިރޭ ބައްދަލުކުރި މެޗު 2-2 އިން އެއްވަރުވެއްޖެއެވެ.
މިރޭ ކުޅެވުނު ފޯރިގަދަ މި މެޗުގެ ފުރަތަމަ ހާފްގެ ފުރަތަމަ މިނެޓުގައި ގޯލެއް ޖަހައި ލީޑު ނެގީ ދަރަނބޫދޫންނެވެ. މި ގޯލު ދަރަނބޫދޫއަށް ކާމިޔާބު ކޮށްދިނީ ޓީމުގެ ޒުވާން ހުނަރުވެރި ކުޅުންތެރިޔާ މުއައްލިމެވެ. މެޗުގެ ކުރީކޮޅު ދަރަނބޫދޫއިން ލީޑު ނެގިނަމަވެސް މާގިނައިރުތަކެއްނުވެ މުލަކުންވަނީ ގޯލެއް ކާމިޔާބުކޮށް ނަތީޖާ ހަމަހަމަކޮށްފައެވެ. މި ގޯލު އެޓީމަށް ކާމިޔާބުކޮށްދިނީ އެޓީމުގެ އާދަމް ޝަހީމް (އާނާ)އެވެ. އާނާއަކީ 2014 ވަނަ އަހަރު ނިލަންދޫގައި އެފްއޭއެމް އިން ބޭއްވި ޒޯން5 ފުޓްބޯޅަ މުބާރާތް ކާމިޔާބުކުރި މުލަކު ޓީމުގައިވެސް ފާހަގަކޮށްލެވުނު މޮޅު ކުޅުންތެރިއެކެވެ. އަދި އޭނާއަކީ އެ މުބާރާތުގެ އެންމެ މޮޅު ކުޅުންތެރިޔާވެސް މެއެވެ.
މިރޭގެ މެޗުގެ އިތުރު ލަނޑުތައް ފެނިގެންދިޔައީ ދެވަނަ ހާފްގެ ކުޅުން ނިމެން 5 މިނެޓަށްވެފައި ހުއްޓައެވެ. މެޗުގައި ދެވަނަ ފަހަރަށްވެސް ދަރަނބޫދޫ އިން ލީޑު ނެގި އިރު މި ގޯލު އެޓީމަށް ކާމިޔާބުކޮށްދިނީ އާލިފް އަލީއެވެ. މި ލަނޑަށްފަހު މެޗު ނިމެން ސިކުންތު ކޮޅަކަށް ވެފައިވަނިކޮށް މުލަކުންވަނީ އިތުރު ގޯލެއް ކާމިޔާބުކޮށް ނަތީޖާ އަނެއްކާވެސް ހަމަހަމަކޮށްފައެވެ.
މުލަކު ޓީމުންޖެހި މިގޯލަކީ އެޓީމުގެ ބަދަލު ކީޕަރު މިފްދާދު އެއްލި ބޯޅައެއް މަތިންގޮސް ދަރަނބޫދޫގެ ކީޕަރު އަލީ ނަސީރު އަތުގައި ޖެހިފައި ވަން ގޯލެކެވެ. މިގޯލް ވަންއިރު މުލަކު ޓީމުގެ ޖާރޒީނަމްބަރު 27، އަހުމަދު ކީޕަރު ކުރިމަތީގައިހުރެ ފައުލްކުރިކަމަށް ދަރަނބޫދޫ ޓީމުން ބުނަމުން ދިޔަނަމަވެސް ކީޕަރު އަތުގައި ޖެހިފައިވަނުމުން ރެފްރީވަނީ ފައުލް ނުވާކަމަށް ނިންމާފައެވެ.
މިރޭގެ މެޗުގެ މޮޅު ކުޅުންތެރިއަކަށް ހޮވިފައިވަނީ މުލަކު ޓީމުގެ ޖާޒީ ނަމްބަރު 10، އާދަމް ޝަހީމް (އާނާ) އެވެ.
މި ނަތީޖާއާއެކު މެޗު ނިމިގެން ދިޔައިރު ޒޯން ފަހެއްގެ ފައިނަލަށް ދަތުރުކުރާނެ ޓީމުތައް ކަނޑައެޅުން އޮތީ ބުރުގައި ކުޅޭ ފަހު މެޗުތަކުންނެވެ. މި ޒޯނުގައި މިރޭ ކުޅެވުނު ދެވަނަ މެޗު ކުޑަހުވަދޫންވަނީ ދިއްގަރު 2-1 އިން ބަލިކޮށްފައެވެ. އެއާއެކު ދިއްގަރަށް މުބާރާތުގެ ފައިނަލަށް ދިއުމުގެ ފުރުސަތު ގެއްލިފައިވާއިރު، މިރޭ މެޗުން އެއްވަރުވެ، މުލަކަށް ލިބިފައިވަނީ ކުޅުނު ދެމެޗުން 2 ޕޮއިންޓެވެ. ދަރަނބޫދޫ އަދި ކުޑަހުވަދޫއަށް ދެމެޗުން 4 ޕޮއިންޓް ލިބިފައިވާއިރު ދެން އޮތީ މި ދެޓީމު ބައްދަލު ކުރާމެޗެވެ.
މި މުބާރާތުގެ ޒޯން 5 ގެ ފައިނަލަށް ދަތުރުކުރާ ޓީމުތައް ކަނޑައަޅާ މެޗުތައް އޮންނާނީ މިމަހުގެ 8 ވަނަ ދުވަހުގެ ރޭ 10 ޖަހާއިރުގައެވެ.
