ގޯލްޑަން ފުޓްސަލް ޗެލެންޖުގެ ޒޯން ބުރުގައި މ. އަތޮޅުގެ ޗެމްޕިއަން ދިއްގަރު ބަލިކޮށް ދަރަނބޫދޫގެ ފެށުން ރަނގަޅު ކޮށްފިއެވެ. މި މުބާރާތުގައި މ، ފ އަދ ދ އަތޮޅު ހިމެނޭ ޒޯން 5 ގެ މެޗުތައް ކުޅެން ފަށާފައިވަނީ ރޭގައެވެ.
ރޭ ކުޅެވުނު ޒޯން މެޗު ފަށައިގެން ފަސްވަނަ މިނެޓުގައި ލީޑު ނެގީ ދަރަނބޫދޫންނެވެ. ދަރަނބޫދޫ ޓީމުގެ ކެޕްޓަން މުޒްދާން މި ލަނޑު ކާމިޔާބުކުރިއިރު، ފުރަތަމަ ހާފް ނިމެން ހަވަރަކަށް މިނެޓު ވެފައިވަނިކޮށް އޭނާވަނީ އިތުރު ލަނޑެއް ކާމިޔާބުކޮށް ނަތީޖާ 2-0 އަށް ބަދަލު ކޮށްފައެވެ. މިއީ މިއަހަރުގެ މުބާރާތުގައި މުޒްދާން ޖެހި 7 ވަނަ ގޯލެވެ. މެޗުގައި ދަރަނބޫދޫން ޖެހި ތިންވަނަ ގޯލަކީ މުޒްދާނުގެ ޕާހަކުން މުއައްލިމް ޖެހި ގޯލެކެވެ.
ދިއްގަރު ޓީމުން މިމެޗުގައި ޖެހި ހަމައެކަނި ލަނޑު ފެނިގެން ދިޔައީ މެޗުގެ ދެވަނަ ހާފްގެ ހަވަނަ މިނެޓުގެ ތެރޭގައެވެ. މިއީ ދިއްގަރު ޓީމުގެ އިކުރާމަށް ދަރަނބޫދޫ ގޯލްކީޕަރު ކުރި ފައުލަކާއި ގުޅިގެން ލިބުނު ޕެނަލްޓީއަކުން ކާމިޔާބުކުރި ލަނޑެކެވެ. މި ޕެނަލްޓީ ދިއްގަރަށް ކާމިޔާބު ކޮށްދިނީ އެޓީމުގެ ޖާރޒީ ނަމްބަރު 5، މުޙައްމަދު އަލީއެވެ.
މި މެޗުގެ މޮޅު ކުޅުންތެރިއަކަށް ހޮވިފައިވަނީ ދަރަނބޫދޫ ޓީމަށް ދެގޯލު ކާމިޔާބުކޮށްދިން އެޓީމުގެ ކެޕްޓަން މުޒްދާނެވެ.
މި މުބާރާތުގެ ޒޯން ގައި ރޭ ދެން ކުޅެފައިވަނީ ދ. އަތޮޅު ޗެމްޕިއަން ކުޑަހުވަދޫއާއި މ.އަތޮޅު ރަނަސްއަޕް މުލަކެވެ. މި މެޗު ނިމިފައިވަނީ 2-2 އިން އެއްވަރު ވެގެންނެވެ.
ޒޯން ފަހެއްގެ ދެވަނަ މެޗުތައް ކުޅޭނީ މިމަހުގެ 6 ވަނަ ދުވަހުގައެވެ. އެދުވަހުގެ މެޗުތަކުގައި ބައްދަލުކުރާނީ ފ.އަތޮޅު ޗެމްޕިއަން ދަރަނބޫދޫ އާއި ދ.އަތޮޅު ޗެމްޕިއަން ކުޑަހުވަދޫއެވެ. އަދި މ. އަތޮޅު ޗެމްޕިއަން ދިއްގަރާއި އެއަތޮޅުގެ ރަނަރއަޕް މުލަކުގެ މެޗެއް އޮންނާނެއެވެ.
