ގޯލްޑަން ފުޓްސަލް ޗެލެންޖު 2025 ގެ ފ. އަތޮޅު ޗެމްޕިއަންކަން ފ. ދަރަނބޫދޫއިން ހޯދައިފިއެވެ. މިއީ މި މުބާރާތުގެ ޗެމްޕިއަންކަން ދަރަނބޫދޫ އިން ހޯދި ފުރަތަމަ ފަހަރެވެ.
ހުޅުމާލޭ ރެހެންދި ފުޓްސަލް ދަނޑުގައި މިރޭ ކުޅެވުނު ފ. އަތޮޅު ބުރުގެ ފައިނަލްގައި ދަރަނބޫދޫ ބައްދަލުކުރީ މަގޫދޫއާއެވެ. މި މެޗު ދަރަނބޫދޫން ކާމިޔާބުކުރީ 2-1 އިންނެވެ.
މެޗު ފަށައިގެން ފުރަތަމަ ހާފްގެ 5 ވަނަ މިނެޓުގައި މެޗުގެ ލީޑު ފުރަތަމަ ނެގީ ދަރަނބޫދޫއިންނެވެ. މި ލަނޑު ކާމިޔާބުކުރީ ދަރަނބޫދޫ ޓީމުގެ ޒުވާން ކެޕްޓަން މުޒްދާން ހަސަނެވެ. މިއީ މި އަހަރުގެ މުބާރާތުގައި މުޒްދާން ޖެހި 5 ވަނަ ލަނޑެވެ. މި ލަނޑާއެކު އޭނާވަނީ ފ.އަތޮޅު ބުރުގެ އެންމެ ގިނަ ގޯލްޖެހި ބިލެއްދޫ ޒީދާނާއި ލަނޑުގެ ގޮތުން އެއްވަރު ވެފައެވެ.
މިރޭގެ ފައިނަލުގައި މަގޫދޫއިން ނަތީޖާ ހަމަހަމަކުރި ގޯލު ޖެހީ ފުރަތަމަ ހާފްގެ ކުޅުން ނިމެންވެފައިވަނިކޮށް އެޓީމުގެ ޖަޒްލާނެވެ. ދެޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔަ މި މެޗުގައި ދަރަނބޫދޫން މޮޅުވި ލަނޑު ޖެހީ މެޗު ނިމެން ކުޑަ ވަގުތު ކޮޅަކަށް ވެފައިވަނިކޮށް ސާޖިދު އަޙުމަދެވެ. ސާޖިދުގެ މި ލަނޑަކީ މުބާރާތުގެ ފުރަތަމަ މެޗުގައި ނިލަންދޫ އަތުން ދަރަނބޫދޫ ފަހު ވަގުތު މޮޅުވި މެޗުގައިވެސް އޭނާޖެހި ކަހަލަ ގޯލެކެވެ.
މި ނަތީޖާއާއެކު 2-1 އިން ދަރަނބޫދޫ މޮޅުވެ ޗެމްޕިއަން ތަށި ފުރަތަމަ ފަހަރަށް އުފުލާލި އިރު، ފައިނަލް މެޗުގެ މޮޅު ކުޅުންތެރިއަކަށް ހޮވިފައިވަނީ ދަރަނބޫދޫ ޓީމުގެ ކެޕްޓަން މުޒްދާން ހަސަނެވެ.
