މިހާރު ކުރިއަށްދާ ރާއްޖޭގެ އެންމެ ބޮޑު ފުޓްސަލް މުބާރާތް، ގޯލްޑަން ފުޓްސަލް ޗެލެންޖުގެ ފ.އަތޮޅު ބުރުގެ ފައިނަލުގައި ދަރަނބޫދޫ އާއި މަގޫދޫ ވާދަކުރާ ގޮތަށް ހަމަޖެހިއްޖެއެވެ.

މިމުބާރާތުގެ ފ.އަތޮޅު ލީގު ބުރުގެ އެންމެ ފަހުގެ މެޗުތައް ރޭކުޅެފައިވާއިރު، ރޭގެ މެޗަށް ނިކުތް އިރުވެސް ދަރަނބޫދޫއަށް އޮތީ ފައިނަލްގެ ޖާގައެއް ކަށަވަރުވެފައެވެ. މެޗު ފެށުމުގެ ކުރިން ދަރަނބޫދޫ އާއި ފައިނަލުގައި ބައްދަލުކުރުމުގެ ފުރުސަތު ބިލެއްދޫ އަދި މަގޫދޫއަށްވެސް އޮތްއިރު، ބިލެއްދޫއަށް ފައިނަލުން ޖާގަ ނުލިބުނީ ރޭ ދަރަނބޫދޫ އަދި މަގޫދޫ ބައްދަލުކުރި މެޗު އެއްވަރުވުމުންނެވެ.

މާބޮޑު ވާދަވެރިކަމެއް އަދި ޕްރެޝަރެއްނެތި މަގޫދޫ އަދި ދަރަނބޫދޫ ރޭގެ މެޗު ކުޅެފައިވާއިރު މި މެޗުގެ ފުރަތަމަ ލަނޑު ޖަހާފައިވަނީ ދަރަނބޫދޫއިންނެވެ. ދަރަނބޫދޫގެ މުޒްދާން މަގޫދޫ އޭރިއާއަށް ފޮނުވާލި ހުރަހަކުން މި ލަނޑު ކާމިޔާބުކުރީ އާލިފް އެވެ. މެޗުގެ ދެވަނަ ހާފް ނިމެން ކުޑައިރުކޮޅަކަށް ވެފައިވަނިކޮށް މަގޫދޫ ޓީމުގެ މާހިލްވަނީ ގޯލެއް ކާމިޔާބުކޮށް ނަތީޖާ ހަމަހަމަކޮށްފައެވެ.

މިނަތީޖާއާއެކު މެޗު ނިމިގެން ދިޔައީ 1-1 އިން ދެޓީމު އެއްވަރު ވެގެންނެވެ. މި މެޗުގައި ދަރަނބޫދޫ ޓީމަށް ބަލާލާއިރު، ގިނަ ކުޅުންތެރިންނަށް ކުޅުމުގެ ފުރުސަތު ދީފައިވާކަން ފާހަގަކުރެވެއެވެ.

މިމުބާރާތުގެ ފ.އަތޮޅު ލީގު ބުރުގައި ރޭ ދެން ކުޅެފައިވަނީ ބިލެއްދޫއާއި ފީއައްޔެވެ. މި މެޗުގައި ބިލެއްދޫ މޮޅުވެފައިވަނީ 6-0 ގެ ނަތީޖާއިންނެވެ. މި ނަތީޖާއާއެކު ފ.އަތޮޅުގެ ޕޮއިންޓް ތާވަލުގެ 1 ވަނައިގައި ދަރަނބޫދޫ އޮތީ ކުޅުނު 4 މެޗުން 10 ޕޮއިންޓް ހޯދައިގެންނެވެ. ދެވަނައިގައި މަގޫދޫއަށް 8 ޕޮއިންޓް ލިބިފައިވާއިރު އެންމެ ފަހުގެ ޗެމްޕިއަން ބިލެއްދޫއަށް ލިބުނީ 7 ޕޮއިންޓެވެ. ތާވަލުގެ ހަތަރުވަނައިގައި ނިލަންދޫ 3 ޕޮއިންޓުގައި އޮތްއިރު މެޗަކުން ޕޮއިންޓެއް ނުލިބި ފުލުގައި އޮތީ ފީއައްޔެވެ.

ގޯލްޑަން ފުޓްސަލް ޗެލެންޖު 2025 ގެ ފ. އަތޮޅު ފައިނަލް މެޗު ކުޅުމަށް ހަމަޖެހިފައިވަނީ އަންނަ ބުދަ ދުވަހުގެ ރޭގަނޑުގައެވެ.