މާލޭގައި މިހާރު ކުރިއަށްދާ ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތުގައި ވާދަކުރާ ދަރަނބޫދޫ ޓީމުގެ ސާޖިދު އަޙްމަދު އާއިލީ ބޭނުމެއްގައި ރަށަށް އައިސްފިއެވެ. މިއާއެކު މި މުބާރާތުގައި ކުރިއަށްއޮތް ފީއަލީ މެޗުގައި ސާޖިދު ނުފެންނާނެ ކަމަށް ވަރަށް ބޮޑަށް ބެލެވެއެވެ.

ދަރަނބޫދޫގައި މިހާތަނަށް އުފެދުނު އެންމެ މޮޅު ފުޓްސަލް ކުޅުންތެރިޔާ ސާޖިދަކީ މިހާރު ކުރިއަށްދާ ގޯލްޑަން ފުޓްސަލް މުބާރާތުގައިވެސް ޓީމުގެ އެންމެ މުހިންމު ކުޅުންތެރިޔާއެވެ. ސާޖިދުގެ ކޮއްކޮ މުޒްދާންގެ ލީޑަރޝިޕްގެ ދަށުން ދަރަނބޫދޫ މިފަހަރު މުބާރާތުގައި ކުޅެމުން ދިޔަނަމަވެސް، ޓީމުގައިހުރި އެންމެ އިތުބާރުހިފޭ އަދި އެންމެ ތަޖުރިބާހުރި ކުޅުންތެރިޔަކީ ސާޖިދެވެ.

މިއަހަރުގެ ގޯލްޑަން ފުޓްސަލް ޗެލެންޖުގައި ދަރަނބޫދޫ އަދި ކުޅެފައިވަނީ އެންމެ މެޗެކެވެ. މިދިޔަ އާދީއްތަ ދުވަހުގެ ރޭ ކުޅެވުނު ފާފު ޑާބީގެ ނަމުން މަޝްހޫރު ނިލަންދޫއާ ދެކޮޅަށް ކުޅުނު ވާދަވެރި މެޗުގައިވެސް ސާޖިދުވަނީ އޭނާގެ މުހިންމުކަން ޓީމަށް އޮތް މިންވަރު އެ މެޗުގައިވެސް ދައްކައިދީފައެވެ. އެގޮތުން މެޗު ނިމެން ގާތްވެ ދެޓީމު އެއްވަރުވެފައި ވަނިކޮށް އޭނާގެ ހުނަރު ދައްކާލައި ފަހުވަގުތު ސާޖިދުވަނީ މޮޅު ގޯލެއް ޖަހައި ދަރަނބޫދޫ މޮޅުކޮށްދީފައެވެ. އަދި އެ މެޗުގެ މޮޅު ކުޅުންތެރިޔާގެ އެވޯޑުވެސް އޭނާވަނީ ހޯދާފައެވެ.

މި މުބާރާތުގައި ދަރަނބޫދޫ އަދި ފީއަލީވެސް ކުޅެފައިވަނީ އަދި އެއްމެޗެވެ. ފީއަލީ ވަނީ ފުރަތަމަ މެޗުގައި މަގޫދޫ އަތުން 3-2 އިން ބަލިވެފައެވެ. ދަރަނބޫދޫވަނީ އެބައިމީހުންގެ ފުރަތަމަ މެޗުގައި ނިލަންދޫއާ ވާދަކޮށް 5-4 ގެ ނަތީޖާއިން މޮޅުވެފައެވެ. ލީގު އުސޫލުންކުޅޭ މިމުބާރާތުގައި ފ.އަތޮޅު ރައުންޑުގައި ދެން ވާދަކުރާ ބިލެތްދޫ އަދި މަގޫދޫވަނީ ކުޅުނު ދެމެޗުން 4 ޕޮއިންޓް ހޯދާފައެވެ. އެހެންކަމުން މިމުބާރާތުގައި ކުރިއަށް ދިއުމަށް ފީއަލީ މެޗަކީ ދަރަނބޫދޫއަށް މުހިންމު މެޗަކަށް ވެގެންދާނެއެވެ.

މުހިންމު މެޗެއް ކުރިއަށް އޮއްވައި ޓީމުގެ މުހިންމު ކުޅުންތެރިއަކު ދަނޑުމަތިން ނުފެނުމަކީ ޓީމަށް އެކަމުން އަސަރުތަކެއް ކުރާނެކަމެކެވެ. ފީއަލީ މެޗުގައި ސާޖިދު ނުފެނުނު ނަމަވެސް ޓީމުގައި އަރަމުން އަންނަ ޒުވާންކުދިން ތިބިކަން ފާހަގަކުރެވެއެވެ. އަދި ސާޖިދުގެ މަޤާމު އަދާކުރާނެ ތަޖުރިބާހުރި ކުޅުންތެރިންވެސް ޓީމުގައި ތިބިއިރު، ބެލެވޭ ގޮތުގައި ކުރިއަށް އޮތް މެޗުގައި ޒުވާން ކުޅުންތެރިންނަށް ކޯޗު ޒުއްބަ އިތުރު ފުރުސަތުތަކެއް ފޯރުކޮށްދޭނެއެވެ.

މި މުބާރާތުގައި ދަރަނބޫދޫ އަދި ފީއަލި ބައްދަލު ކުރާ މެޗު އޮންނާނީ އަންނަ ބުރާސްފަތި ދުވަހުގެ ހަވީރު 17:00 ގައި ހުޅުމާލޭ ރެހެންދި ފުޓްސަލް ދަނޑުގައެވެ.