ފުޓުސަލްގައި ފ.އަތޮޅުގައި ޒަމާނުއްސުރެ ވާދަވެރިކަން އޮންނަ ދަރަނބޫދޫއާއި ނިލަންދޫ ބައްދަލުކުރި ފޯރިގަދަ ޑާބީ މެޗު ދަރަނބޫދޫއިން ކާމިޔާބުކޮށްފިއެވެ. ގޯލްޑެން ފުޓްސަލް ޗެލެންޖު 2025 ގެ ފ. އަތޮޅު ލީގު ބުރުގައި ރޭ މި ދެޓީމު ބައްދަލުކުރި މެޗު ނިމިގެން ދިޔައީ 5-4 ގެ ނަތީޖާއިން ދަރަނބޫދޫ މޮޅުވެގެންނެވެ.
ދެޓީމުގެ ފަރާތުން ވާދަވެރި ފޯރިގަދަ ކުޅުމެއް ފެނިގެން ދިޔަ މިމެޗުގައި ފުރަތަމަ ލީޑު ނަގާފައިވަނީވެސް ދަރަނބޫދޫއިންނެވެ. މި މެޗުގައި ނިލަންދޫގެ ލަނޑުތައް ޖަހާފައިވަނީ ރިޒްވާން އަދި އީޖާޒްއެވެ. މިއިން ކޮންމެ ކުޅުންތެރިއަކު 2 ލަނޑު ޖަހާފައިވާއިރު، ދަރަނބޫދޫގެ މުޒްދާންވަނީ ހެޓްރިކް ހަދާފައެވެ. މުޒްދާންވަނީ މިދިޔަ އަހަރު ކުޅުނު މިމުބާރާތުގެ ޑާބީ މެޗުގައިވެސް ނިލަންދޫ ކޮޅަށް ހެޓްރިކް ހަދާފައެވެ. މި މެޗުގައި ދަރަނބޫދޫގެ މުއައްލިމް ވެސް ލަނޑެއް ޖަހާފައިވާއިރު، ދަރަނބޫދޫ ޓީމު މޮޅުވި ގޯލު ޖަހާފައިވަނީ ސާޖިދު އަޙްމަދެވެ. ސާޖިދުގެ މި ގޯލަކީ ނިލަންދޫ ކުޅުންތެރިއަކު ޖެއްސި ޕާހެއް ދަރަނބޫދޫ ގޯލް އޭރިއާ ތެރެއިން ހޯދާ ނިލަންދޫގެ ދެ ކުޅުންތެރިން ކައިރިން ކަޓުވާލައި ގޯލުގެ މެދަށް ފޮނުވާލައިގެން ކާމިޔާބުކުރި ރީތި ސޯލޯ ގޯލެކެވެ.
މި މެޗުން ނިލަންދޫ ބަލިވުމާއެކު ކުޅުނު ދެމެޗުންވެސް އެޓީމަށް ޕޮއިންޓެއް ނުލިބި ފައިނަލަށް ދިއުމުގެ އަމިއްލަ ބާރު އެޓީމަށްވަނީ ގެއްލިފައެވެ. މުބާރާތުގައި މިހާތަނަށް ދެމެޗު ކުޅެފައިވާ ބިލެއްދޫ އަދި މަގޫދޫއަށްވަނީ 4 ޕޮއިންޓް ލިބިފައެވެ. ފީއައްޔަށް ކުޅުނު އެއްމެޗުން ޕޮއިންޓެއް ލިބިފައިނުވެއެވެ.
ފ. އަތޮޅު ޑާބީ މެޗުގައި މޮޅު ކުޅުންތެރިއަކަށް ހޮވިފައިވަނީ ދަރަނބޫދޫ ޓީމުގެ ސާޖިދު އަޙްމަދެވެ. ސާޖިދު ވަނީ މުޅި މެޗުގައިވެސް މޮޅު ކުޅުމެއް ދައްކައި މެޗު ކާމިޔާބު ކުރި ލަނޑު ޖެހުމުގެ އިތުރުން ލަނޑު ޖެހުމަށް ރަނގަޅު ފުރުސަތުތަކެއްވެސް ފަހި ކޮށްދީފައެވެ.
ރާއްޖޭގައި ބާއްވަމުން އަންނަ އެންމެ ބޮޑު ފުޓްސަލް މުބާރާތް ކަމަށްވާ ގޯލްޑެން ފުޓްސަލް ޗެލެންޖުގައި ދަރަނބޫދޫގެ ދެވަނަ މެޗު އޮންނާނީ މިމަހުގެ 16 ވަނަ ދުވަހުގެ ހަވީރު 17:00 ގައެވެ. މި މެޗުގައި ދަރަނބޫދޫއިން ނިކުންނާނީ ފީއަލީ ޓީމާއި ދެކޮޅަށެވެ.
