ފ. ނިލަންދޫ ރަށްވެހި ގްރޫޕުން އެރަށުގައި މިހާރު ފަށައިގެން ކުރިއަށް ގެންދާ ރަށްވެހި ޗެލެންޖް 2024 ފުޓްބޯޅަ މުބާރާތުގައި ކުޅުނު ހުރިހާ މެޗަކުން ތަފާތު ބޮޑު ނަތީޖާއަކުން ބަލިވެ ދަރަނބޫދޫ ޚައިރު ސްޕޯޓްސް އެކަޑެމީ މުބާރާތާއި އަލްވަދާޢު ކިޔައިފިއެވެ.

ޖުމުލަ ހަތަރު ޓީމު ވާދަކުރާ މިމުބާރާތަކީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ދެ ޓީމު ފައިނަލަށް ދަތުރުކުރާ ގޮތަށް ކުރިއަށްދާ މުބާރާތެކެވެ.

މިމުބާރާތުގައި ކޭއެސްއޭގެ ފުރަތަމަ މެޗު ކުޅެފައިވަނީ މިމަހުގެ 27 ވަނަ ދުވަހުގައެވެ. ނިލަންދޫގެ ސްޕޯޓްސް ކުލަބް ފަހުލަވާނާއި ބައްދަލުކުރި މިމެޗުން ކޭއެސްއޭ ބަލިވެފައިވަނީ 9-2 ގެ ނަތީޖާއިންނެވެ. މި މެޗުގައި ފެނިގެންދިޔަ 2 ލަނޑު ފިޔަވައި މިމުބާރާތުގައި ކޭއެސްއޭ އަށް އިތުރު ލަނޑެއް ކާމިޔާބު ކުރެވިފައި ނުވެއެވެ. ކޭއެސްއޭ އަށް މިމުބާރާތުގައި ލަނޑުތައް ކާމިޔާބުކޮށްފައިވަނީ މަޙްމޫދު ސިޔާމާއި ސާއިން ޢަލީއެވެ.

ކޭއެސްއޭގެ ދެވަނަ މެޗު މިމަހުގެ 29 ވަނަ ދުވަހު ނިއު ޖެނެރޭޝަން ކުލަބާއި ދެކޮޅަށް ކުޅުނުއިރު އެ މެޗުން ކޭއެސްއޭ ބަލިވެފައިވަނީ 9-0 ގެ ބޮޑު ލީޑަކުންނެވެ. މުބާރާތުގައި އެޓީމުން ކުޅުނު ފަހު މެޗުގައި މިއަދު ހަވީރު ނިލަންދޫ ސުޕަރ ޖެނެރޭޝަން ކުލަބް (އެސްޖީސީ) އާއި ބައްދަލުކޮށްފައިވާއިރު، އެސްޖީސީން މެޗު ކާމިޔާބުކޮށްފައިވަނީ 12-0 ގެ ބޮޑު ތަފާތަކުންނެވެ. މިއަދުގެ ނަތީޖާއާއެކު ކުޅުނު ހުރިހާ މެޗަކުން ބަލިވެ ތާވަލުގެ އެންމެ ފަހަތުގައި އޮތް ކޭއެސްއޭއަށް ވަނީ މުބާރާތް ނިމިފައެވެ.

ރަށްވެހި ޗެލެންޖުގައި ބައިވެރިވި ޚައިރު ސްޕޯޓްސް ކުލަބުގެ ކުޅުމާއި ބެހޭގޮތުން އެޓީމުގެ ކޯޗު އިއްޔެ ދީފައިވާ ބަސްދީގަތުމެއްގައި ބުނެފައިވަނީ އެޓީމުން މުބާރާތުގައި ބައިވެރިވީ ބޮޑު ދަނޑެއްގައި ވާދަވެރި މުބާރާތެއްގައި ކުޅުމުގެ ފުރުޞަތު އެކަޑެމީގެ ޒުވާން ކުޅުންތެރިންނަށް ހޯދައި ދިނުމަށް ބޭނުންވާތީއެވެ. ޓީމުގައި ގިނައިން ތިބީ 16 އަހަރުން ދަށުގެ އެކަޑެމީ ކުޅުންތެރިން ކަމަށާއި އެކުދިންނަށް މިފަދަ މުބާރާތްތަކުގައި ގިނައިން ވާދަކުރަން ލިބޭނަމަ ކުރިއެރުންތަކެއް ލިބިގެންދާނެކަމަށް ކޯޗު ހާމަކުރިއެވެ.

މީގެ އިތުރުން ޒުވާން ޓީމަށް ދިމާވި އެންމެ ބޮޑު ޗެލެންޖަކީ ދަރަނބޫދޫގައި ފުޓުބޯޅަ ކުޅުމަށް އަދި ޕްރެކްޓިސްކުރުމަށް ރަނގަޅު ބޮޑު ދަނޑެއް ނެތުން ކަމަށާއި، ރަށުގައި ކުޑަ ދަނޑެއްގައި ޕްރެކްޓިސްކޮށްފައި ބޮޑު ދަނޑެއްގައި މެޗުތައް ކުޅެންޖެހުމުން ކުޅުންތެރިންނަށް އެކަށީގެންވާވަރަށް ޕާފޯމް ނުކުރެވޭ ކަމަށެވެ. އެހެންނަމަވެސް މިކަހަލަ ބޮޑެތި މުބާރާތްތަކުގައި ބައިވެރިވެ ލިބޭ ތަޖުރިބާއިން ކުޅުންތެރިންނަށް އެދެވޭ ކުރިއެރުންތަކެއް ލިބިގެންދާނެކަމަށް ކޯޗު ހާމަކުރިއެވެ.