ދަރަނބޫދޫ އޭކްސް ސްޕޯޓްސް ކުލަބުން އިންތިޒާމްކޮށްގެން ބާއްވަމުން އަންނަ “ދިޔޯކަޕް” ގެ ދެވަނަ މުބާރާތް އެކުލަބުން އިޢުލާނު ކޮށްފިއެވެ.

ދިޔޯކަޕްގެ ދެވަނަ މުބާރާތް ބޭއްވުމަށް ނިންމާފައިވަނީ އަންނަ ފެބްރުއަރީ މަހުގެ ތެރޭގައެވެ. މުބާރާތް އިޢުލާނު ކުރުމުގެ ގޮތުން އޭކްސް ސްޕޯޓްސް ކުލަބުންވަނީ އެފަރާތުގެ މީސްމީޑިއާގައި އެކަން ހާމަކޮށް މުބާރާތުގެ ފުރަތަމަ އަހަރުގެ ހަނދާންތައް ހިއްސާކޮށްފައެވެ. ދިޔޯކަޕްގެ ފުރަތަމަ މުބާރާތް ބާއްވާފައިވަނީ މިއަހަރުގެ މާރޗް މަހުގައެވެ.

އޭކްސް ސްޕޯޓްސް އިން މިހާރުވަނީ މިމުބާރާތް ސްޕޮންސަރ ކުރުމުގެ ފުރުޞަތު އާންމުކޮށް ހުޅުވާލާފައެވެ. އެގޮތުން މުބާރާތުގެ ޓައިޓްލް ސްޕޮންސަރ، މެއިން ސްޕޮންސަރގެ އިތުރުން ކޯ-ސްޕޮންސާރ އާއި އެހެނިހެން ސްޕޮންސަރ ކުރުމުގެ ފުރުސަތު 2025 ވަނަ އަހަރުގެ ޖަނަވަރީ 10 ވަނަ ދުވަހުގެ ނިޔަލަށްވަނީ ހުޅުވާލެވިފައެވެ.

ދިޔޯކަޕަކީ ދަރަނބޫދޫގެ ކަނބަލުންނަށް ވޮލީގެ ހުނަރު އިތުރު ކުރުމާއި އެކުވެރިކަން އާލާކުރުމުގެ މަޤްޞަދުގައި ބާއްވާ މުބާރާތެކެވެ. މިއީ މިހާރު ދަރަނބޫދޫގައި އަންހެނުންނަށް އަމާޒުކޮށްގެން ބޭއްވޭ ހަމައެކަނި ވޮލީ މުބާރާތެވެ. މިމުބާރާތް އަތޮޅުގައިވެސް ފާހަގަކޮށްލެވޭ “ބްރޭންޑެޑް” މުބާރާތަކަށް ހެދުމަށް ގިނަ މަސައްކަތްތަކެއް ކުރެވިފައި ވީނަމަވެސް، ދެމެހެއްޓެނިވި ގޮތެއްގައި ކާމިޔާބުކަމާއެކު މުބާރާތް ކުރިއަށް ގެންދިއުމަށް ސްޕޮންސަރުންގެ އެހީތެރިކަން އޭކްސް ސްޕޯޓްސް ކުލަބަށް ވަރަށްބޮޑަށް ބޭނުންވާކަން އެކުލަބުން ހާމަކުރެއްވިއެވެ.

ދިޔޯކަޕްގެ ފުރަތަމަ މުބާރާތް ބާއްވާފައިވަނީ ދަރަނބޫދޫގެ ޓީމުތަކަށް އެކަނި މުބާރާތުގައި ބައިވެރިވެވޭ ގޮތަށެވެ. އެހެންނަމަވެސް ކޮންމެ ޓީމެއްގައިވެސް ރަށުން ބޭރު ކުޅުންތެރިއެއްގެ ގޮތުގައި ފ.އަތޮޅަށް ނިސްބަތްވާ ކުޅުންތެރިއަކު ހިމެނުމުގެ ފުރުޞަތު އޮތެވެ. އެހެން ނަމަވެސް ފުރަތަމަ މުބާރާތުގެ ތަޖުރިބާއަށް ބިނާކޮށް މިއަހަރުގެ ޤަވާއިދަށް ބަދަލުތަކެއް ގެނައުމުގެ ވިސްނުން އެކުލަބުން ގެންގުޅެއެވެ.

މުބާރާތާއި ބެހޭގޮތުން ދަނިއުސްއަށް މަޢުލޫމާތު ދެއްވަމުން އޭކްސް ސްޕޯޓްސް ކުލަބުގެ ރައީސް މުއައްދު މުޙައްމަދު ވަނީ ޤަވާއިދަށް ބަދަލުތަކެއް އައުން އެކަށީގެންވާކަން ހާމަކުރައްވާފައެވެ. އެގޮތުން މިއަހަރުގެ މުބާރާތުގައިވެސް ދަރަނބޫދޫއިން ޓީމުތައް ބައިވެރިވުމުގެ އިތުރުން، ފ.އަތޮޅުގެ އެހެން ރަށަކަށް ދަޢުވަތު ދީގެން އެރަށަކުން ޓީމެއް ބައިވެރިކުރުމުގެ ފުރުޞަތު ދެވޭނެކަމަށް އެކުލަބުގެ ރައީސް ހާމަކުރެއްވިއެވެ. އެހެންނަމަވެސް ދަޢުވަތު ދެވޭނީ ކޮން ރަށަކަށްކަމެއް އަދި ކަނޑައަޅާފައި ނުވާކަމަށް އޭނާ ހާމަކުރެއްވިއެވެ.

ޤަވާއިދުގެ ދެވަނަ ބަދަލެއްގޮތުގައި ރަށުން ބޭރު ކުޅުންތެރިއެއް ގޮތުގައި ދިވެހި ކޮންމެ އަންހެން ކުޅުންތެރިއެއް ޓީމެއްގައި ހިމެނުމުގެ ފުރުސަތު ދިނުމަށް މަސައްކަތްކުރާކަމަށްވެސް އޭނާ ހާމަކުރެއްވިއެވެ. އެހެންނަމަވެސް، ރަށުން ބޭރު ކުޅުންތެރިއެއްގޮތުގައި ހިމަނާ މި ކުޅުންތެރިއާއަކީ ދިވެހި ޤައުމީ ވޮލީ ޓީމުގައި ނުހިމެނޭ ކުޅުންތެރިއަކަށް ވާންޖެހޭނެއެވެ. މި ބަދަލުތައް ގެންނާނީ ޓީމުތައް ހިމެނޭގޮތުން މަޝްވަރާ ކުރުމަށްފަހުކަމަށް އެކުލަބުންވަނީ މަޢުލޫމާތު ދީފައެވެ.

މިއަހަރުގެ މާރޗް މަހު ބޭއްވުނު ދިޔޯކަޕްގެ ފުރަތަމަ މުބާރާތަކީވެސް ވަރަށްގިނަ ފަރާތްތަކުގެ އެހީތެރިކަން ލިބިގެން ބޭއްވިފައިވާ ކާމިޔާބު މުބާރާތެކެވެ. އެ މުބާރާތުގެ ގޯލްޑް ސްޕޮންސަރ އަދި މީޑިއާ ޕާޓްނަރަކީ ދަނިއުސް އެމްވީއެވެ.

ދިޔޯކަޕް ގެ އެންމެ ފުރަތަމަ ޗެމްޕިއަނަކީ އޭކްސް ސްޕޯޓްސް ކުލަބެވެ. އެކުލަބުން ޗެމްޕިއަންކަން ހޯދީ ފައިނަލުގައި އެޑް ޖަމްޢިއްޔާއާއި ވާދަކޮށް 3 ސެޓް 1 ސެޓުން މޮޅުވެގެންނެވެ.