ފާފު އަތޮޅު ވޮލީ މުބާރާތުގެ ޗެމްޕިއަންކަން ހޯދުމަށް ފީއަލިން ކުރަމުން އައި އުއްމީދަށް ހުރަސް އަޅައި އެޓީމު ބަލިކުރުމަށްފަހު މަގޫދޫއިން މިމުބާރާތުގެ ފިރިހެން ޑިވިޒަނުގެ ޗެމްޕިއަންކަން ހޯދައިފިއެވެ.

ވޮލީގައި ގަދަބާރެއްގެ ގޮތުގައި ފާހަގަ ކޮށްލެވޭ ފީއަލި ޓީމުވަނީ މިދިޔަ އަހަރުގައިވެސް ފައިނަލްގައި ކުޅެ ބަލިވެފައެވެ. މަގޫދޫގައި ކުރިއަށް ގެންދިޔަ މި މުބާރާތުގެ ފައިނަލްގައި ބައްދަލުކުރި މަގޫދޫ އަދި ފީއަލި ޓީމަކީ ހުރިހާ މެޗެއްގައިވެސް ވަރުގަދަ ރީތި ކުޅުމެއް ދެއްކި ދެޓީމެވެ.

މިއަދު ހަވީރު ކުޅެވުނު މިމެޗުގެ ފުރަތަމަ ސެޓު ފީއަލިން ކާމިޔާބުކުރީ 25-20 އިންނެވެ. މި ސެޓުގައި ދެޓީމުގެ ފަރާތުންވެސް ވާދަވެރިކުޅުމެއް ފެނިގެން ދިޔައެވެ. ނަތީޖާއެއްގެ ގޮތުން މެޗުގެ ދެވަނަ ސެޓު މަގޫދޫން 22-25 ގެ ނަތީޖާއިން ކާމިޔާބުކުރިއެވެ. ތިންވަނަ ސެޓް ފަށައިގެން މޮޅަށްކުޅެ، ފަރަގު ބޮޑުކޮށް ސެޓު ކާމިޔާބުކުރީ ފީއަލިންނެވެ. އެޓީމުން މި ސެޓު ކާމިޔާބުކުރީ 25-15 ގެ ތަފާތަކުންނެވެ.

މި ނަތީޖާއާއެކު ހަތަރުވަނަ ސެޓަށް ފީއައްޔަށް ބޮޑު އުއްމީދެއް ލިބުނު ނަމަވެސް، ދަނޑު ސަރަޙައްދުން މަގޫދޫ ސަޕޯޓަރުން ހުއްޓުމެއްނެތް އާދަޔާ ޚިލާފު ހިތްވަރެއް ޓީމަށް ގެނައުމަށް ބުރަކޮށް މަސައްކަތް ކުރަމުންދިޔަ ތަން ފެނުނެވެ. ސަޕޯޓަރުންގެ ފަރާތުން ހިތްވަރު ލިބިގެން އާދަޔާ ޚިލާފު މޮޅުކުޅުމެއް ހަތަރުވަނަ ސެޓުގައި ދައްކާފައިވެއެވެ. އަދި ފީއަލީ ޓީމާއި ސަޕޯޓަރުން ސިއްސުވާލުމަށްފަހު މަގޫދޫން މި ސެޓު ކާމިޔާބުކުރީ 19-25 އިންނެވެ.

ހަތަރު ސެޓުކުޅުނު އިރު މެޗުގެ ނަތީޖާ 2-2 އިން އެއްވަރުވެފައި ވުމުން ޗެމްޕިއަން ޓީމު ކަނޑައެޅުމަށް ކުޅުނު ފަސްވަނަ ސެޓުގައި މަގޫދޫން ވަނީ 8-15 ގެ ނަތީޖާއިން ފީއަލީ ބަލިކުރުމަށްފަހު، މިމުބާރާތުގެ ޗެމްޕިއަންކަން ހޯދާފައެވެ.

މިއީ ފާފު ވޮލީ މުބާރާތުގެ ފިރިހެން ޑިވިޒަނުގެ ޗެމްޕިއަންކަން މަގޫދޫއިން ހޯދި ފުރަތަމަ ފަހަރެވެ. އަދި މިއީ މިމުބާރާތުގެ ރަނަރއަޕްކަން ފީއައްޔަށް ލިބުނު ދެވަނަ ފަހަރެވެ.

މިއަދުގެ މެޗަށްފަހު، ފިރިހެން ޑިވިޝަންގެ އެކިއެކި މަގާމްތަކަށް ހޮވުނު ކުޅުންތެރިންނާއި ޓީމުތަކަށް އިނާމު ދިނުމުގެ ރަސްމިއްޔާތުވަނީ ބާއްވާފައެވެ.