ފާފު ވޮލީމުބާރާތް 2024 ގެ މެޗު ދުވަސް 8 ގެ ފިރިހެން ޑިވިޝަންގައި މި މުބާރާތުގެ އެންމެ ފަހުގެ ޗެމްޕިއަން ނިލަންދޫ ކަޓުވާލުމަށްފަހު ފީއަލިން ފައިނަލްގެ ޖާގަ ކަށަވަރު ކޮށްފިއެވެ. މި ދެ ޓީމަކީ މިދިޔަ އަހަރުގެ ފައިނަލްގައި ވާދަކުރި ދެޓީމެވެ.
މިއަދު ހަވީރު ކުޅެވުނު މި މެޗު ބަލާލުމަށް ދެރަށުގެ ވަރަށް ގިނަ ޢަދަދެއްގެ ސަޕޯޓަރުންވަނީ މަގޫދޫއަށް ޒިޔާރަތްކޮށްފައެވެ. މިއީ މިމުބާރާތުގައި މިހާތަނަށް އެންމެ ގިނަ ސަޕޯޓަރުން މެޗެއް ބަލާލުމަށް ދަނޑަށް ދިޔަ ފަހަރުކަން ފާހަގަ ކުރެވެއެވެ.
ދެޓީމުގެ ފަރާތުން ވަރަށް ބާރު ހަމަލާތަކެއް ފޮނުވާލި އަދި މޮޅު ކުޅުމެއް ދެއްކި މި މެޗުގެ ފުރަތަމަ ސެޓު ފީއަލިން ކާމިޔާބުކުރީ 25-23 އިންނެވެ. މެޗުގެ ދެވަނަ ސެޓު 25-18 އިން އެޓީމު ކާމިޔާބުކުރިއިރު ތިންވަނަ ސެޓުގައިވެސް ފީއަލިންވަނީ ލީޑުނަގައި ދަމަހައްޓާފައެވެ. މިއާއެކު އެޓީމަށް ތިން ސެޓު ލިބޭނެކަމަށް ބެލެވުނު ނަމަވެސް ނިލަންދޫ ސަޕޯޓަރުން މެދުކެނޑުމެއްނެތި ދެމުން ދިޔަ ސަޕޯޓާއެކު ހިތްވަރު ލިބިގަނެގެން ނިލަންދޫންވަނީ އުނދަގޫކަމާއެކު މި ސެޓު ކާމިޔާބުކޮށްފައެވެ. އެގޮތުން މި ސެޓު ނިލަންދޫން ކާމިޔާބުކުރީ 32-30 އިންނެވެ. މިއީ މިމުބާރާތުގައި ވަރަށް ނުފެންނަ ނަތީޖާއެކެވެ. ފާފު ވޮލީ މުބާރާތުގައި މިކަހަލަ ނަތީޖާއެއް މީގެކުރިން ފެނިފައިވަނީ މިދިޔަ އަހަރު ކުޅެވުނު އަންހެން ޑިވިޝަންގެ ފައިނަލްގައި ފީއަލި އަދި މަގޫދޫ ބައްދަލުކުރި މެޗުގެ ފުރަތަމަ ސެޓުގައެވެ. އެ ސެޓު ނިމިގެން ދިޔައީ 32-34 ން މަގޫދޫ ކުރި ހޯދައިގެންނެވެ.
މިއަދުގެ މެޗުގެ ތިންވަނަ ސެޓު ނިލަންދޫން ކާމިޔާބުކުރިނަމަވެސް އެޓީމުގެ ކުޅުންތެރިންނާ ސަޕޯޓަރުންގެ ފޯރިއާއެކުވެސް ދޫ ދިނުމެއްނެތި ހަތަރުވަނަ ސެޓް ކާމިޔާބުކުރީ ފީއަލިންނެވެ. ފީއަލިން މި ސެޓް ކާމިޔާބުކުރީ 25-22 ންނެވެ. މިއާއެކު މިމުބާރާތުގެ ދެވަނަ ފައިނަލަކަށް ފީއަލި ދަތުރުކޮށްފައިވާއިރު، އެޓީމު ފައިނަލްގައި ބައްދަލު ކުރާނީ މުބާރާތް ހޯސްޓް ކުރާ މަގޫދޫއާއެވެ.
މި މުބާރާތުގެ ފައިނަލަށް 1 ދުވަހުގެ ބްރޭކެއް ދިނުމަށް ނިންމާފައިވާއިރު، ފައިނަލް މެޗު އޮންނާނީ 2024 އޯގަސްޓް 21 ވަނަ ދުވަހުގެ ހަވީރުގައެވެ.
މިއަދުގެ މެޗުގެ މޮޅު ކުޅުންތެރިއަކަށް ހޮވުނީ ފީއަލީ ޓީމުގެ ޖާޒީނަމްބަރު 19 އަޒީމް މުޙައްމަދެވެ.
މިމުބާރާތުގެ އަންހެން ޑިވިޝަންގައި މިދެރަށް ބައްދަލުކުރި މެޗު ނިމިގެން ދިޔައީ ފަސޭހަކަމާއެކު ފީއަލި މޮޅުވެގެންނެވެ. ފީއަލިން މިމެޗު ސީދާ 3 ސެޓުން ކާމިޔާބުކުރިއިރު، ފުރަތަމަ ސެޓް އެޓީމުން ކާމިޔާބުކުރީ 25-16 އިންނެވެ. ދެވަނަ ސެޓް 25-14 އިން ނިމުނު އިރު ތިންވަނަ ސެޓް ނިމިފައިވަނީ 25-17 އިންނެވެ.
މި މެޗުގެ މޮޅު ކުޅުންތެރިއަކަށް ހޮވުނީ ފީއަލީ ޓީމުގެ ޖާޒީނަމްބަރު 8 މިޒްނާ އިބްރާހީމެވެ.
ފާފު ވޮލީ މުބާރާތުގެ އަންހެން ޑިވިޝަންގެ ފައިނަލުގައި މިމަހުގެ 21 ވަނަ ދުވަހު ބައްދަލުކުރާނީ ދަރަނބޫދޫ އަދި މަގޫދޫއެވެ. މަގޫދޫ އަކީ މިމުބާރާތުގެ އަންހެން ޑިވިޝަންގެ އެންމެ ފަހުގެ ޗެމްޕިއަން ޓީމެވެ. މިއަހަރުގެ މުބާރާތުގައި މި ދެޓީމު ގްރޫޕް ސްޓޭޖްގައި ބައްދަލުކުރި މެޗު 3 ސެޓް 1 ސެޓުން ކާމިޔާބުކުރީ ދަރަނބޫދޫންނެވެ.
