ފާފު ވޮލީ މުބާރާތް 2024ގައި މިއަދު ހަވީރު ދަރަނބޫދޫ އަދި ނިލަންދޫން ބައްދަލުކުރި ފިރިހެން ޑިވިޝަނުގެ މެޗު ފަސޭހަ ކަމާއެކު ނިލަންދޫން ކާމިޔާބު ކޮށްފިއެވެ. ނިލަންދޫން މި މެޗު ކާމިޔާބުކޮށްފައިވަނީ ސީދާ 3 ސެޓުންނެވެ.

މިއަދުގެ މެޗު ބަލާލުމަށް ނިލަންދޫގެ ގިނަ ޢަދަދެއްގެ ސަޕޯޓަރުން މަގޫދޫއަށް ދަތުރުކޮށްފައި ވެއެވެ. މެޗު ފެއްޓިގެން ދެޓީމުގެ ފަރާތުން ވާދަވެރިކުޅުމެއް ފެނިގެން ގޮސްފައިވާއިރު، ފުރަތަމަ ސެޓު ނިލަންދޫން ކާމިޔާބުކުރީ 21-25 އިންނެވެ. މި ސެޓުގައި ދެޓީމުގެ ފަރާތުން މޮޅު ބްލޮކް ތަކާއި ސްޕައިކްތަކެއް ފެނިގެން ދިޔަނަމަވެސް ދެވަނަ ސެޓުން ދަރަނބޫދޫ ޓީމު ފެނިގެން ދިޔައީ ގިނަ ގޯސްތަކެއް ހެދިތަނެވެ. އޭގެ ފައިދާ ނަގައި ނިލަންދޫން ދެވަނަ ސެޓް 16-25 ގެ ބޮޑުތަފާތަކުން ނިންމިއިރު ތިންވަނަ ސެޓު ނިލަންދޫން ކާމިޔާބުކުރީ 14-25 އިންނެވެ.

މި ނަތީޖާއާއެކު މުބާރާތުން ދަރަނބޫދޫ ޓީމުވަނީ ކަޓާފައެވެ. މި މުބާރާތުން ބިލެއްދޫ ވަކިވެފައިވާއިރު، އެޓީމުއަތުން ދަރަނބޫއަށް 3 ޕޮއިންޓް ލިބިފައިވާއިރު، ދަރަނބޫދޫ އަދި ފީއަލީ ބައްދަލުކުރި މެޗުން އެޓީމަށް 1 ޕޮއިންޓް ލިބި ޕޮއިންޓް ތާވަލުގައި ދަރަނބޫދޫ އޮތީ ހަތަރު މެޗު ކުޅެގެން ތިންވަނައިގައެވެ.

މިއަދުގެ މެޗުގެ މޮޅު ކުޅުންތެރިއަކަށް ހޮވުނީ މި މެޗުގައި މޮޅު ކުޅުމެއް ދެއްކި ނިލަންދޫގެ ޖާޒީ ނަމްބަރު 9، ޖަލްވާން މުޙައްމަދެވެ.

މިމުބާރާތުގެ އަންހެން ޑިވިޝަންގައި މިރޭ މިދެރަށް ބައްދަލުކުރި މެޗު ފަސޭހަ ކަމާއެކު ކާމިޔާބުކުރީ ދަރަނބޫދޫންނެވެ. މި މެޗު ދަރަނބޫދޫންވެސް ކާމިޔާބުކުރީ ސީދާ 3 ސެޓުންނެވެ.

މެޗުގެ ފުރަތަމަ ސެޓު 25-09 އިން ނިމުނު އިރު ދެވަނަ ސެޓު ނިމުނީ 25-18 އިންނެވެ. އަދި ތިންވަނަ ސެޓު 25-13 އިން ދަރަނބޫދޫ ކާމިޔާބުކުރިއިރު، މިއީ ބިލެއްދޫ ވަކިވުމުން ޓީމުތަކަށް ސެޓުތައް ލިބިފައިވާ އަދަދު ފިޔަވައި އެންމެ ބޮޑު ތަފާތަކުން މިއަހަރުގެ މެޗެއް ކާމިޔާބުކުރި ފަހަރެވެ.

މި ނަތީޖާއާއެކު މިމުބާރާތުގެ އަންހެން ޑިވިޝަނުގެ ފައިނަލަށް އެއްވަނަ ޓީމުގެ ގޮތުގައި ދަރަނބޫދޫވަނީ ދަތުރު ކޮށްފައެވެ. އަދި ދެވަނަ ޓީމުގެ ގޮތުގައި މަގޫދޫ ދަތުރު ކޮށްފައިވާއިރު މި ޑިވިޝަންގައި ބާކީ އެއް މެޗު ނިލަންދޫ އަދި ފީއައްޔަށް އެބައޮތެވެ. އެހެން ނަމަވެސް އެ މެޗުގެ ނަތީޖާ ކޮންމެ ގޮތަކަށް ނިކުތްނަމަވެސް މި ދެޓީމަށް ޕޮއިންޓްގެ ގޮތުން ކުރިހޯދައިގެން ފައިނަލަށް ދިއުމުގެ ފުރުސަތުވަނީ ގެއްލިފައެވެ.

މި މެޗުގެ މޮޅު ކުޅުންތެރިއަކަށް ހޮވިފައިވަނީ ދަރަނބޫދޫ ޓީމުގެ ޖާޒީ ނަމްބަރު 14، ފާތިމަތު ޠަހޫރާއެވެ.

ފާފު ވޮލީ މުބާރާތުގެ މެޗުދުވަސް 8 ގައި މާދަމާ ކުޅުމަށް ހަމަޖެހިފައިވަނީ ފީއަލީ އަދި ނިލަންދޫގެ މެޗުތަކެވެ.