ފާފު ވޮލީމުބާރާތް 2024 ގައި މޮޅު ކުޅުމެއް ދައްކަމުން އައި ފީއަލީ ފިރިހެން ޑިވިޝަންގެ މައްޗަށް ކުރިހޯދައި މަގޫދޫން އެޓީމުގެ ފެންވަރު ދައްކާލައިފިއެވެ. މިމުބާރާތުގެ ދެ ޑިވިޝަންގެ ޗެމްޕިއަންކަން ރަށަށް ހޯދައި ދިނުމުގެ ޢަޒުމުގައި ވަރަށް ރަނގަޅަށް މުބާރާތަށް ތައްޔާރުވުމުގެ މަސައްކަތް ފެށި މަގޫދޫން މިއަދު ހަވީރު އަމިއްލަ ސަޕޯޓަރުންގެ ކުރިމަތީގައި ކުޅުނު މެޗު ކާމިޔާބުކުރީ ފީއަލިން ދެ ސެޓު ކާމިޔާބުކޮށްފައި ވަނިކޮށް ފަހަތުން އަރައި 3 ސެޓު ދެސެޓުންނެވެ.

މަގޫދޫން މި މެޗު ކުޅެފައިވަނީ އަނިޔާގައި ހުރި އެޓީމުގެ އެއް ނަމްބަރު ސެޓަރު ނަދީމް ނުލައެވެ. މެޗުގެ ފުރަތަމަ ދެ ސެޓު ފީއަލިން ކާމިޔާބުކުރީ ރަނގަޅު ލީޑެއްގައި އޮވެގެންނެވެ. އެގޮތުން ފުރަތަމަ ސެޓް 25-16 އަދި ދެވަނަ ސެޓް 25-19 ގެ ތަފާތުން ފީއަލިން ކާމިޔާބުކުރިއިރު މަގޫދޫގެ ސަޕޯޓަރުންގެ ފޯރިއާއެކު ހިތްވަރު ލިބިގެން މަގޫދޫ ޓީމުން ތިންވަނަ ސެޓް 22-25 އިން ކާމިޔާބުކުރިއެވެ.

މުޅި މެޗުގައިވެސް ދެޓީމުގެ ކުޅުންތެރިންގެ އިތުރުން ސަޕޯޓަރުންވެސް ފެނިގެން ދިޔައީ ވަރަށް ފޯރިގަދަކޮށެވެ. މެޗުގެ ހަތަރުވަނަ ސެޓުވެސް ދެޓީމުން ވަރަށް މޮޅު ކުޅުމެއް ދައްކާފައިވާއިރު މަގޫދޫން މިސެޓް ކާމިޔާބުކުރީ 24-26 އިންނެވެ. މެޗުގެ ފަހު ސެޓު މަގޫދޫއިން ކާމިޔާބުކުރީ 11-15 އިންނެވެ.

މެޗުގެ މޮޅު ކުޅުންތެރިއަކަށް ހޮވުނީ މަގޫދޫ ޓީމުގެ ޖާޒީ ނަމްބަރު 9 އަހްމަދު ނާޔިޕް އެވެ.

މިމުބާރާތުގައި މިއަދު ހަވީރު ކުޅެވުނު އަންހެން ޑިވިޝަނުގެ މެޗުވެސް ކާމިޔާކުރީ މަގޫދޫންނެވެ. މި މެޗު 3 ސެޓު 1 ސެޓުން މަގޫދޫން ކާމިޔާބުކުރި އިރު، ފުރަތަމަ ސެޓް އެޓީމުން ހޯދާފައިވަނީ 12-25 ގެ ލީޑަކުން ނިންމާލައިގެންނެވެ. ފުރަތަމަ ސެޓުގައި ފީއަލިން ހެދުނު ގޯސްތައް ރަނގަޅުކޮށް ކުޅުމުގެ ތެރެއަށް އެނބުރިއައިސް އެޓީމުން ދެވަނަ ސެޓް ކާމިޔާބުކޮށް އުއްމީދު އާކުރިއެވެ. މި ސެޓު ފީއަލިން ކާމިޔާބުކުރީ 25-18 އިންނެވެ.

އެހެންނަމަވެސް މި ސެޓަށް ފަހު ތިންވަނަ ސެޓުންވެސް ފެނިގެން ދިޔައީ ފީއަލީ ޓީމަށް ގޯސްތަކެއް ހެދުނުތަނެވެ. ޒުވާން ކުޅުންތެރިންނާއެކު މުބާރާތުގައި ވާދަކުރަމުންދިޔަ ފީއަލީގެ މައްޗަށް އަނެއްކާވެސް މަގޫދޫން ކުރިހޯދައި ތިންވަނަ ސެޓު 20-25 އިން ކާމިޔާބުކުރިއެވެ. އަދި މި މެޗުގެ ފުރަތަމަ ސެޓޭ އެއްފަދައިން ހަތަރު ވަނަ ސެޓުވެސް މަގޫދޫން ކާމިޔާބުކުރީ 12-25 ގެ ބޮޑު ތަފާތަކުންނެވެ.

މި މެޗުގެ މޮޅު ކުޅުންތެރިއަކަށް ހޮވުނީ މަގޫދޫ ޓީމުގެ ޖާޒީ ނަމްބަރު 6، ޒުނާހާ އަހުމަދެވެ. ޒުނާހާ ވަނީ އެޓީމުން އިއްޔެ ނިލަންދޫއާއެކު ކުޅުނު މެޗުގެވެސް މޮޅު ކުޅުންތެރިޔާގެ މަގާމު ހޯދާފައެވެ.

ފާފު ވޮލީ މުބާރާތުގައި މާދަމާ ކުޅުމަށް ހަމަޖެހިފައިވަނީ ދަރަނބޫދޫ އަދި ނިލަންދޫގެ މެޗުތަކެވެ.