ބިލެއްދޫން މެޗު ނުކުޅެން ނިންމުމުން ތިން ސެޓުން ނިލަންދޫ މޮޅުވެއްޖެ

ބިލެއްދޫން މެޗު ނުކުޅެން ނިންމުމުން ތިން ސެޓުން ނިލަންދޫ މޮޅުވެއްޖެ

Bilvsnil

ބިލެއްދޫން މެޗު ނުކުޅެން ނިންމުމުން ތިން ސެޓުން ނިލަންދޫ މޮޅުވެއްޖެ

ލިޔުން ކިޔާލެވޭނީ ގާތްގަޑަކަށް < 1 މިނިޓުން

ފާފު ވޮލީ މުބާރާތް 2024 ގައި މިރޭ ކުޅެން ހަމަޖެހިފައި އޮތް ބިލެއްދޫ އަދި ނިލަންދޫ އަންހެން ޑިވިޒަނުގެ މެޗު ނުކުޅެ ދޫކޮށްލުމުން ސީދާ ތިން ސެޓުން ނިލަންދޫ ޓީމު މޮޅުވެއްޖެއެވެ.

މެޗު ފެށުމުގެ ކުރިން ދެ ޓީމުގެ ކުޅުންތެރިންނާއި އޮފިޝަލުންވެސް ދަނޑަށް ހާޒިރުވެ، މެޗަށް ތައްޔާރުވުމަށް ވާމްއަޕް ކުރަމުން ދިޔައެވެ. އެހެން ނަމަވެސް، މެޗު ފެށުމަށް ގުރުލުމަށް ދެޓީމުގެ ކެޕްޓަނުންނަށް ރެފްރީން ގޮވާލެއްވުމުން ބިލެއްދޫ ޓީމުން ގޮސްފައެއް ނުވެއެވެ. އެވަގުތުވެސް ކުޅުންތެރިންނާ އޮފިޝަލުން ބެންޗު ސަރަޙައްދުގައި ތިއްބެވެ. ބިލެއްދޫ ޓީމު ކެޕްޓަން ގުރުލުމަށް އައުމަށް އެކަށީގެންވާ ވަގުތު ދިނުމަށްފަހުވެސް، ނުދިއުމުން ރެފްރީގެ ކަށިގަނޑާއެކު މެޗު ނިންމާލުމާއެކު، ބިލެއްދޫ ޓީމުގެ ކުޅުންތެރިންވަނީ ނިލަންދޫ ޓީމުގެ ކުޅުންތެރިންނާ ސަލާމްކުރުމަށްފަހު ދަނޑުން ފައިބައިގެން ގޮސްފައެވެ.

މިއީ ފާފު ވޮލީ މުބާރާތުގެ ތާރީޚުގައި ޓީމަކުން މެޗެއް ނުކުޅެ ދޫކޮށްލި ފުރަތަމަ ފަހަރުކަން ފާހަގަ ކޮށްލެވެއެވެ.

ދަނިއުސްއަށް މަޢުލޫމާތު ލިބުނު ގޮތުގައި ބިލެއްދޫން މެޗު ކުޅުމަށް ދެކޮޅު ހެދި އެންމެ ބޮޑު އެއް ސަބަބަކީ މިއަދު ހަވީރު މިދެޓީމު ބައްދަލުކުރި ފިރިހެން ޑިވިޒަނުގެ މެޗުގައި ރެފްރީންގެ ފަރާތުން ހިތްހަމަ ނުޖެހޭ ކަންތައްތަކެއް ތަކުރާރުކޮށް ފެނި، އެ ރެފްރީންގެ މައްސަލަތައް ބެލުމަށް އެޓީމުން ހުށަހަޅާފައިވާ މައްސަލައަށް ގޮތެއް ނިންމާފައި ނުވުމެވެ. އަދި އެ ރެފްރީން ލައިގެން މެޗުތައް ކުޅެން ބޭނުން ނުވާތީކަމަށް މަޢުލޫމާތު ލިބިފައިވެއެވެ.

މިކަމާއި ގުޅިގެން މުބާރާތުގެ އިންތިޒާމް ކޮމެޓީން ނިންމާފައިވަނީ ކޮން ގޮތަކަށްކަމެއް އަދި ސާފެއް ނުވެއެވެ. މި މުބާރާތުގެ ޤަވާއިދުގައިވާ ގޮތުން މުބާރާތުގައި ބައިވެރިވެފައިވާ ޓީމެއް މެޗުކުޅުމަށް ދަނޑަށް ހާޟިރުވެ އެ މެޗެއް ނުކުޅެފިނަމަ އެޓީމެއް 1000 ރުފިޔާއިން ޖޫރިމަނާކުރާނެއެވެ. އަދި މެޗަކުން މޮޅުވުމުން ލިބޭ 3 ޕޮއިންޓް އެޓީމަކުން އުނިކުރެވޭނެއެވެ.

މި މުބާރާތުގައި ދެން ކުޅެވޭނީ ފީއަލި އަދި ދަރަނބޫދޫގެ މެޗުތަކެވެ. ފީއަލީ ދެ ޓީމުވެސް ވަނީ މިމުބާރާތުގައި ބިލެއްދޫއާ ވާދަކޮށް މޮޅުވެފައެވެ. ދަރަނބޫދޫއަށް ބަލާލާއިރު އެރަށު ފިރިހެން ޓީމުވަނީ މަގޫދޫއާ ވާދަކޮށް ބަލިވެފައެވެ. އަދި ދަރަނބޫދޫ އަންހެން ޓީމުވަނީ މަގޫދޫއާ ބައްދަލުކޮށް މޮޅުވެފައެވެ.

ޙިއްސާ ކުރައްވާ:

ގުޅުންހުރި